على شرف سيناء

أحبائي وأعزائي المشاهدين.. أهلاً ومرحباً بكم.. شالوم حاطّوم شلشيع حاتساييم.. ننقل إلى حضراتكم وقائع المباراة الودية بين منتخبنا الوطني المصري والمنتخب الإسرائيلي في احتفالية مرور خمسين عاماً على اتفاقية السلام كامب ديفيد.. وبالسلام احنا بدينا بالسلام..

المباراة مقامة على أرض مدينة السلام في استاد السلام، شرم الشيخ رمز السلام العالمي.. لتكون المباراة رمزاً عالمياً من رموز السلام في وسط سحر شرم الشيخ الخلاب الذي طالما يسحر ملايين البشر سنوياً من شتى أنحاء العالم..

جهاز منتخبنا الوطني بقيادة الكابتن سالم أبو سليم اختار ثمانية عشر لاعباً من أجل هذه المبارة المقامة على شرف سيناء واتفاقية كامب ديفيد العالمية التي صارت مثلاً يحتذى به لحل كل النزاعات العالمية.. المحلية منها والدولية.. وتحرّى الكابتن سالم أن يكون اللاعبين بيسفولي أورينتد يعني متأصلين على السلام.. ومش أي سلام السلام العادل فقط.

صحيح أن هذه المباراة لا فائدة فنية منها تماماً.. فليس إسرائيل - الشقيق - أي تاريخ في كرة القدم ولم يساهموا في إثراءها ولو عكسياً حتى ولكن هذه المباراة لها أبعاد أخرى.. فيحضر هذه المبارة السيد رئيس الوزراء الإسرائيلي شالوم أبوجاموس ونظيره المصري السيد نعناع أبو نعينع.. وطبعاً أنا قلت الإسرائيلي الأول عشان هو الضيف.. ولا هو مش ضيف ؟؟

وطبعاً المباراة مذاعة عالمياً ومن قبل شتى محطات الإذاعات العالمية.. يعني لو حضرتك بصيت كده تلاقي السي إن إن، لو بصيت كده تلاقي البي بي سي.. لو بصيت كده تلاقي قناة تو الإسرائيلية.. مع غياب قناة النيل للرياضة لإن المباراة مش مذاعة أرضياً، ومحتكرة فضائياً لصالح قنوات الجزيرة الرياضية..

نازل فريق مصر بلباسه الأحمر، ونازل فريق إسرائيل بلباسه الأزرق في أبيض.. والفريقين واقفين زناهير.. والسلام الوطني لإسرائيل.. الأمل..

طالما في القلب تكمن

نفس يهودية تتوق

وللأمام نحو الشرق

عين تنظر إلى صهيون

أملنا لم يضع بعد

أمل عمره ألفا سنة

أن نكون أمة حرة في بلادنا

بلاد صهيون وأورشليم القدس

"تصفيق بارد بعد سماع الكلمات وفهم مغزاها والحسرة على الكرامة التي ضاعت".

و.. و.. الآن نستمع إلى السلام الوطني المصري..

بلادي بلادي

لك حبي وفؤادي

أنت غايتي والمراد

وعلى كل العباد

كم لنيلك من أيادي

بلادي بلادي لك حبي وفؤادي

"برود وعدم إحساس بالكلمات، مشاعر جافة لا قيمة لها، تصفيق روتيني من الجمهور الحاضر"..

ويسلم الفريقان على بعض في روح محبة وود وتسامح وسلام وحمام.. ومع الصورة التذكارية للفريقين والتي أصرت اللجنة المنظمة أن تجمع الفريقين مع بعضهما البعض للتعبير عن التسامح والسلام..

حكم اليوم من الولايات المتحدة الأمريكية ديفيد فوركس، وبسرعة نبدأ المباراة.. ويبدأ الفريق الصهيـ... الإسرائيلي ضربة البداية..

الكرة مع ديفيد.. يدّيها لسمحون.. يمررها موشى.. يباصي باصة طولية لولبية ماكرة بن حاييم.. يقفش عليه من ورا خالد جمعة.. تيييييت.. الحكم بيقول فاول يا روح امك.. الكرة لما تبقى مع بن حاييم تسيبوا يايضيعها هو يايجيب هو جول.. مالكش دعوة بيه خالص.. حلق عليه بس..

طبعاً الفاول من على احدى البقاع السحرية في غز.. أقصد في الملعب على بعد ياردات من التمانتاشر.. فين أيام زمان كانت لعبة الكابتن أبوتريكة دي متخيبش معاه.. الحكم بيدي تعليماته للحيطة تقف على بعد تسعتاشر ياردة على أن تكون المنطقة اللي في النص منزوعة اللاعبين.. وبييجي بن حاييم يقف وسط الحيطة بلطجة عشان يعمل ثغرة في قلب الحيطة يقوم يسدد بنيامين وتعدي من الخرم اللي في الحيطة لكن يمسكها محمد الحضري بكل سهولة..

هنا، وقف السيد شالوم متذمراً.. إزاي يصد الحارس بتاع مصر الكرة كده بمنتهى الاستهزاء وكأنه بيلاعب بني آدمين مش من طينته.. دي معاداة للسامية.. ده اعتداء على الأمن القومي اليهودي في مصر.. وقال:

"لا يمكن السكوت على إهانة أي يهودي في أي بقعة من العالم، ما بالكم إذا كانت سينا.. أنا بطالب الفاول يتعاد ولما نشوف حسن نوايا اللاعبين المصريين تجاه اللاعبين اليهود"..

طالب ديفيد فوركس المسئولين بضبط النفس وأن الأمر لا يتعدى كونه مباراة كرة بين فريقين شقيقين، لكن شالوم رأسه والف صرمة قديمة تتعاد الكرة..

اتعاد الفاول، وبرضه صدّها الحضري..

"لا بقى دانتو جايبينّا تهزؤنا هنا، إيش حال اننا في بلدنا يعني"، شالوم متذمّراً.

وهنا قام السيد نعناع وانتفض: "أنا مسمحلكش على فكرة".

فغضب شالوم قائلا: "طب وحياة أمي الماتش مش حيكمل إلا لو الفاول اتحسب جول"..

انتفض نعينع وصرخ قائلاً: "لا.. لا.. كله إلا كرامة المواطن المصري.. كله إلا كرامة المواطن المصري.. الريّس بيقول.. حماية الرعايا المصريين مسئولية الدولة.. أيوة.. مسئولية الدولة.. وأمن حراسة المرمى المصري خط أحمر.. مصر هي أمي ونيلها جوه دمّي.. لا يأس مع الحياة.. ولا حياة لمن تنادي"..

رد شالوم هادئاً: "بيني وبينك حكم الماتش هو اللي يفصل بينا"..

نعينع: "فل".

حكم المباراة أوقف الماتش وقال تحسباً أن يتطور النزاع الرياضي إلى نزاع سياسي، نلجأ للتحكيم.. وإمعاناً في النزاهة سأقف في وسط الأرض تماماً عند منتصف دائرة السنتر لنحكم في الأمر، وليأتني قائد الفريق المصري وقائد الفريق الإسرائيلي كلٌ على أرضه لنحكم في الأمر..

فأتى محمد حسن كابتن الفريق المصري وأتى بن حاييم كابتن الفريق الإسرائيلي لعقد المفاوضات لتهدئة الأوضاع.. خاصة أن المباراة مقامة في أجواء سلمية حمامية تنبذ العنف والحرب والكتل.. (الكتل كلمة بديلة لكلمة القتل تدل على الاستنفار التام من الحروب والقتال)..

ديفيد فوركس: شوفوا.. مبدئياً كده احنا لازم نلتزم بضبط النفس، وهدوء الأوضاع، والنوايا السليمة، والسلام.. العالم كله بيتفرج علينا.. واحنا بقى لنا خمسين سنة أهه ضاربين المثل في السلام العالمي.. لازم نفهم الغجر اللي غيرنا إننا أحسن منهم.. واخد بالك يا بن حاييم.. وبعدين يعني ده ماتش كورة.. لا راح ولا جه.. حييجي إيه ده جنب العلاقات الاستراتيجية الرهيبة اللي بينا وبين بعض.. داحنا بين غاز وتطبيع وتضبيط.. فيعني مش حييجي حتة جول هنا ولا هناك يعمل فينا كده..

حسن: بس ده ماجاش جول يا كوتش، الكورة مسكها حارس المرمى بتاعنا..

بن حاييم: شوفت.. شوفت.. أهه من أولها أهه مفيش نوايا سليمة.. وفي معاداة للسامية..

فوركس: ماتضبط يا حسن انت فاكر نفسك مين..

حسن: ياعم أنا قلت حاجة.. بقول الكورة مسكها الحضري..

بن حاييم: انتو عمركو محتعترفوا بينا.. نجيبلكم خبرا في الزراعة، نعمل معاكو الكويز.. مفيش فايدة.. حتفضلوا تعادونا كده.. ماتشات كورة اللي بتحبوها ولعبناها معاكو في إيه تاني ؟؟

فوركس: شوف يا حسن.. أنا شايف عشان نخرج من المزنق ده.. إحنا نقسم البلد نصّين.. الكورة تعاد بناتلي.

حسن: إيه.. ده يبقى ظلم.. الكورة معانا أصلاً.. بأمارة إيه تتعاد بلن.

بن حاييم: أحسن ما تتحسب جول..

حسن: تتحسب جول إزاي.. ياجدعان ده صدها..

فوركس: محدش شاف إنه صدها.. الكاميرات الموجودة مجابتوش وهو بيصدها.. وأنا كحكم شايف إنه اللعيب بتاعك استهزأ بالمنافس وده في المقاوم الأول ضد الروح الرياضية وبعدين كده بيعرض نفسه للإصابة وبالتالي يستحق إنذار.. كمان اعترض قبل كده إن الكرة تتعاد وده يستوجب انذار كمان يعني طرد.. وبعدين انت كمان اعترضت دولقتي أكثر من مرة يعني المفروض تاخد لك انذارين في السريع يعني طرد.. وممكن أسلوبك الغير محترم في الاعتراض ده يخليني أبعت شكوى للفيفا تخليك تتوقف لك كام شهر.. أنا مش شايف إن كل ده يساوي بنالتي يتلعب وممكن ميجيش..

حسن: خلاص، بس بسرعة قبل الجماهير تاخد بالها..

وهكذا تنازل الفريق المصري أولاً.. فجرّ التنازل تنازلاً أكبر منه.. اتعاد الفاول وما كانش المفروض يتعاد.. وبعدين بقى بنالتي.. طالما وافقت على البنالتي.. استحمل أذاه.. حمّلت الحارس مسئولية هو كان ممكن يتجنبها في البداية.. ويعيش الماتش عيشة كريمة واثق في نفسه.. لكنك حمّلته همّ وقرف.. لو البنالتي دخل.. بقى هو اللي غلطان وهو اللي تهاون في حفظ كرامة مصر.. ولو صدّه.. مسيرك تضيّع انجازه ده بتنازلات تانية أعمق وأوغل..

الموت الزؤام.. ولا أن يزعمني عادل إمام

على خلفية المناوشات بين الشيخ خالد الجندي والزعيم على نفسه عادل إمام..

الحقيقة اللي جاي في الكلام فيه ده مالوش علاقة بزعلة الشيخ الجندي من عادل إمام، ولكن الحادثة استفزت الواحد وأنا لما أستفز أكتب على طول..

لو حنتكلم عن الفن والفنانين وأهل الفن والوسط الفني.. م الآخر.. أنا كل يوم يثبت لي إنه الوسط ده صعب النجاة منه، وإنه كل اللي بيخشه لو كان بيخشه بنية سليمة وقلب أبيض لازم نيته حتشوب وقلبه مش حبفضل ناصع البياض.. ولما أهل الفن بيجرجروا الناس الطيبين ليه عادة بتبتقى آخرتهم مش طيبين.. عشان المعظم إسفاف ولو مش إسفاف بيبقى فيه تجاوزات كبيرة غير مقبولة.

يعني مثلاً محدش يصدق إنه بنت الشيخ الحصري - شيخ عموم المقارئ المصرية وأفضل من يعلم ترتيل القرآن وأفضاله على الأمّة كلها صدقة جارية له، رحمه الله رحمة واسعة - بنته اشتغلت مغنية وخرجت عن المألوف تماماً لعيلة زي عيلة الشيخ الحصري.. ورغم نقاء طفلة زي ديه.. إلا أنه أهل الفن غووها.. وخلوها تكابر وتعند وتبقى ضد إرادة أبوها الشيخ الحصري.. حتى وصلوه إنه اتبرّى منها.. وقال لا هي بنته ولا يعرفها.

وأهي دي بنت شيخ من أجلّ الشيوخ المصريين، وفضله مش على المصريين بس ده على الأمة كلها.. ياما ناس تعلموا ترتيل القرآن الكريم على إيديه.. وياما ناس تعلموا الاتقان في مخارج الحروف على إيديه.. وشرايطه لسه صدقة جارية ربنا يجازيه بها خير ويرحمه برحمة منه.. لكن رغم إنها بنت علامة زي ده.. إلا أن أهل الفن غووها وغرروها وأكيد قالولها انتي مش حتغني غنى فاحش ولا فيه عري ولا قلة أدب ولا حاجة.. بس حرام ندفن موهبة زي دي.. وحتماً هي اقتنعت وخرجت على إرادة أبيها وعلى القيم اللي تربت عليها..

دلوقتي إحنا لما بنشوف ممثل مش بيعمل سفالة في أفلامه أو مشاهد جنسية بنقول عليه يا سلام ده محترم وابن ناس وعنده دين.. رغم إنه ممكن يكون بيتجاوز عن الطبيعي بكثير.. بس احنى بالمقارنة بنقول ده راجل لقطة.

فهو و سط فيه شبهات كثير.. وملغّم.. وم الآخر كده شرّه أكثر من خيره..

ده حتى اللي بتعتزل منه وبتحاول تتجنب القرف ده بيلعبولها في دماغها يا إما يتريقوا عليها يإما يغووها بالفن والفنانين التاني فمنهم اللي بيضعف ومنهم اللي بيثبت على موقفه..

نرجع بقى لموضوع الزعيم على نفسه عادل إمام.. واللي بدأ بداياته ككومبارس ولا حتة ممثل يطلع في الأفلام يضّرب ويتسكع على قفاه.. لغاية أما في السبعينيات ولا الثمانينيات عمله كام فيلم بطولة لوحده صدق نفسه فيهم.. وهاص في أفلام المقاولات لما قال يا كفى.. وعمل أفلام مش نظيفة وقايمة على السفالة والانحطاط الأخلاقي لما قال يا بس.. والظاهر إنه كونه كان بيترقع على قفاه وهو لسه بليه عاملاله عقده نفسيه - عقدة نقص - لإنه دلوقتي الاتجاه دايماً في أفلامه أو مسرحياته إنه هو البوب وهو النجم وهو الأوحد وهو الزعيم والباقي أحقار.. غاوي يعظم في نفسه في الأفلام حتى لما يكون الدور اللي طالع يؤديه دور واحد هلاس بتاع نسوان برضه بيعظم في نفسه.. حتى في فيلم ليه اسمه مرجان أحمد مرجان في استعراض في آخره هو بيطلع وسط الناس لفوق والناس كلها بتبديله التعظيم والتبجيل وينحنوا أدامه.. رغم أن المفروض شخصيته في الفيلم مكسورة عينه عشان مش متعلم.. بس تقول إيه بقى.. عقد النقص بتحنّ..

والزعيم على نفسه عادل إمام غاوي من صغره يطلع بتاع نسوان وحرمجي.. والظاهر برضه إن الفيلم اللي عمله وهو صغير وكان طالع فيه مهنته كومبارس أثر فيه نفسياً.. لما كان بيضّرب ويطلع البطل هو اللي يبوس البطلة.. وهو يقعد ويصرخ يقول عاوز أبوس.. الظاهر إنه ده عمله عقدة نفسية لغاية دلوقتي.. مش بيراعي حتى سنّه.. لغاية دلوقتي في أفلامه بيطلع مع بنات قد أحفاده ولا عامل حساب أخلاق ولا دين ولا حرمة بيوت.. ولا حاطط في دماغه إن الأفلام بتاعته دي بتخش البيوت كلها.. وفوق ده وده.. في عز أفلام اللي بيطلع فيها بتاع نسوان وزنا رسمي يبان إنه هو ده المواطن المصري الأمثل وإنه يا ريت كل المصريين يبقوا زيه.. زي ما قال له الضابط بتاع العمارة في فيلم السفارة في العمارة.. رغم إن الضابط ده كان بيشوفوا كل يوم وهو داخل العمارة بالغانيات زي كل يوم.. هو ده المواطن الأمثل اللي كل المصريين لازم يبقوا زيه.. يزني يسكر طالما مبيفكّرش يبقى زي الفل..

وطبعاً ما كان عادل إمام ليكون لولا الإعلام ومساندته ليه.. ماهو يعمل الفيلم القبيح من دول وياخد جوايز ويبقى مقرب من السلطة.. وهو راخر بيليّس تمام أوي للسلطة.. هو يخبط في كله زي ما هو عايز.. ويتريق على الحكومة زي ما هو عايز.. بس ييجي كل فترة والتانية يمدح ويشكر في الريس ويشيد بحكمته ومهارته..

وطبعاً عادل إمام مسابش حاجة إلا أما دخل فيها.. يعني سياسة مسابش.. هلس مسابش.. لازم بقى يخش في الدين.. وبالفعل.. دلخة عادل إمام في الدين كانت زي دخلته في الهلس بالضبط.. لازم يطلع الراجل أبو جلبية ولحية ده إرهابي.. ولو مش إرهابي يبقى نصّاب.. ولو مش نصّاب يبقى بتاع نسوان.. أو ممكن يبقى دول كلهم.. يعني الراجل الملتحي ده بقى هو أسّ الفساد.. عادل إمام هو أكبر من ساهم في نشر الفكر العام إنه السنّي ده متشدد متزمت حيجيبنا ورا.. وفي الواقع.. مش جايبنا ورا غير عادل إمام وأمثاله..

أنا بصراحة مش بطيق عادل إمام.. ومش معنى إننا بنضحك على كام إفيه قاله هنا ولا هناك إنه يبقى رمز لنا.. لا معلش.. عادل إمام لو زعيم يبقى زعيم على نفسه أو على اللي بيرضوا يطلعوا معاه يتسكعوا على قفاهم في المسرحيات.. هو يقبلوا إنه يبقى زعيم عليهم هما حرّين.. لكن احنا الحمد لله لنا شخصية وعارفين يعني إيه نقبل علينا زعيم..

وبقول للشيخ الجندي.. بغضّ النظر عن أساس المشكلة اللي بينك وبينه.. ده ميهمناش في شئ.. اللي يهمنا إنك راجل لك كلام كويس وعلم كبير وبتفيد غيرك كثير.. لكنك بتحط نفسك أحياناً كثيرة في زمرة الناس دي، لما تقول الفن ومفنّاشي واحنا بنحترم الفنانين.. أنهي فنانين اللي بتحترمهم.. يعني إيه مفهومك عن الفن المحترم ؟؟ آه اللي مفيهوش ابتذال مفيهوش عري مفيهوش قيم ضحلة مفيهوش قرف وسم هاري في بدن شبابنا.. حلو أوي.. الفن الجميل ده كام في الميّة بقى من الموجود.. كام في المية ده لو موجود.. وهل قصدك بالفن المحترم ده إنه يكون فن الزمن الماضي.. أخاف من كده.. ما هو ده اللي جاب ده.. ودوكوهمّا هم اللي عملوا فينا دهوّه.. واهو كله على كله.. ولما تشوفه قلّه..

وأخيراً يا شيخ خالد.. متحطّش نفسك في زمرة هؤلاء.. ولا تجيب سيرتهم على لسانك.. ومتقولش عشان تخرج نفسك من الغلط إنه عادل إمام له تاريخ.. تاريخ إيه.. ما هو أي واحد له تاريخ.. ما شارون له تاريخ.. بس تاريخ زفت على دماغه ودماغ اللي جابو أبوه..

في كلمة أختم بها للأستاذ الدكتور أحمد عكاشة رئيس جمعية الأطبّاء النفسيين العالمية بيقوللك إيه: التليفزيون والسينما يوزعان العلل النفسية والتشوهات الاجتماعية على الجميع بالعدل والقسطاس.

البرادعي.. والميكروفونات

امبارح قرأت تصريح للسيد وزير شئون مجلسي الشعب والشورى السيد مفيد شهاب وهو الوزير الأسبق للتعليم العالي، قرأت له تصريح بيقوللك إيه بقى.. إنه خطأ انه الدكتور محمد البرادعي يترشح للانتخابات الرئاسية.. ليه بقى ؟؟.. لأنه يفتقد الخبرة الحزبية ومتطلبات العمل السياسي..

واحد رئيس هيئة دولية معترف بها في الدنيا كلها وبيتعامل مع كل رؤساء العالم وخبير في التفاوض وخبرة في الحقوق والقانون مش منتظر منه يكون عنده خبرة سياسية.. !!!.. أمال مين اللي عنده خبرة سياسية..

لا حقيقي يعني إذا كان واحد زي ده معندوش خبرة سياسية.. ولا عنده فكرة عن الخبرة الحزبية - قال يعني هنا في أحزاب أساساً - يبقى مين اللي عنده.. سيادته اللي كان وزير تعليم عالي محناش عارفين لازمته إيه.. ولا لما كان وزير شئون مجلسي الشعب والشورى اللي لدح دلوقتي - فعلاًَ - مش عارف إيه لازمة المنصب ده.. تحس كده إنه عامل زي منصب محمود الجوهري لما اتعيّن المدير الفني للاتحاد المصري - وزير الشئون الكروية - بس الفرق إنه الجوهري مستحملش الهجص ده وحس إن وجوده مالوش لازمة فاستقال.. إنما ده على أي أساس بيعتبر إنه البرادعي مفتقد للخبرة السياسية..

لا وكمان في حملة من الصحف القومية على البرادعي مش مفهوم سببها.. لمجرد إنه بني آدم شاف في نفسه الأهلية إنه ممكن يبقى رئيس للبلاد.. عادي يعني يا جدعان هو كان عمل إيه.. ما هو لو فيه انتخابات محترمة حيخش ولو هو فعلاً مش مناسب - الناس مش شايفاه مناسب للحكم - حسيقط في الانتخابات وخلصنا.

أنا شايف ان واحد زي ده ممكن يبقى مفيد للبلد - وله من المؤهلات ما يساعده للوصول للمنصب ده - على الأقل فيه ممارسة سياسية عملها وعارف العالم بيمشي إزاي والعالم كمان عارفه كويس أوي ومش مفروض علينا من حد..

أعتقد إنه الرئيس مبارك نفسه مش حيحط في دماغه واحد عشان حب يفكر يترشح قصاده.. مبدئياً المفترض إنه مش فاضي للكلام ده وكمان هو عارف - ولازم يعرف - إنه لازم يبقى في غيره يقدر يشيل المسئولية.. وإلا تبقى فعلاً خربت.

المشكلة في الأرزقية والمنافقين وأصحاب الأبواق اللي بيليّسوا للحكم والحاكم أياً كانوا.. هو اللي يخربوا أجدعها بني آدم يمسك..

جماعات الضغط

جماعات الضغط وهي جماعات المصالح المشتركة والتي لديها من الوسائل ما يؤهلها لتنفيذ رغبتها حيال قرار اقتصادي أو سياسي.. ويطلق لقب لوبي على جماعة الضغط.. وهو لدينا ارتبط باليهود أو الصهاينة فنقول اللوبي اليهودي أو اللوبي الصهيوني ولكن الحقيقة أن الأمر لا يتعلق باليهود والصهاينة فقط.

ولكن أي جماعة تنتمي لفكر أو مصلحة مشتركة يمكن اطلاق عليها اسم جماعة ضغط، أو لوبي..

ولا يعتبر الكثير ذلك عيباً ولكنه عمل، يعني لم يمنع أحداً المسلمين في أمريكا من تكوين جماعات ضغط على الحكومة الأمريكية لاستصدار قرارات تخدم مصالحهم، ولكن الفكرة بأي شئ ستضغط هذه الجماعات.

اللوبي اليهودي يضغط لأنه يمتلك الاقتصاد والإعلام.. وهذه هي أدوات ضغطه..

ونتيجة تغلغله في الإعلام بشدة أوحى للشعب الأمريكي المغيب أنه المسكين وأنه المظلوم وأن على أمريكا الوقوف بجانب إسرائيل - شعباً وحكومة - لتحقيق حلم دولة اليهود على أرض فلسطين المسلمة. بينما فشل المسلمون في توصيل الحقيقة للعالم وهي أن أرضهم اغتصبت.. فلا سعوا لاسترداد حقهم بالقوة - كما هو الواجب - ولا بيّنوا للناس الحقيقة.. والحق أن الحقيقة لا يمكنها الوصول للناس إلا من منطلق القوة.. ومن هذه الزاوية تسعى إسرائيل بكامل طاقاتها للريادة في المنطقة وتقنع أمريكا أنها نجاتها في المنطقة وبالتالي عليها تسليحها ليكون لها الغلبة في كل الأحوال.. مع ضمان تدني مستوى المسلمين والعرب التسليحي والعلمي.. والأخلاقي.

ويمكن لجماعة الضغط أن تنتمي لمجموعة اقتصاديين بضغطهم يديرون اقتصاد البلاد في صالحهم من خلالهم ضغوطاتهم التي تمارس على الحكومة أو من خلال البرلمان.. مثلاً من الكتل الهامة في الولايات المتحدة الأمريكية اتحاد الصناعات.. والذي من أجله قد تتخذ الحكومة قرارات قد تضر بمصالح غيرها من الشعوب ولا تبالي.. حتى أنه من النظريات التي بحثت في أسباب الحرب على أفغانستان والعراق هو السلاح.. وتشغيل مصانع السلاح.. فالحرب الباردة انتهت وسباق التسلح بين أمريكا وروسيا انتهى بسقوط الاتحاد السوفيتي.. فعلى هؤلاء أن يجدوا ذريعة لقيام حرب أخرى تخدم مصالحهم وتدرّ عليهم المليارات.

كذلك المؤسسات النفطية التي لها علاقة برؤساء الحكومات، فلا يخفى على أحد أن شركة هاليبرتون يرأسها - أو كان يرأسها - ديك تشيني نائب رئيس الجمهورية الأسبق، وكان ممولها جورج بوش الرجل الحذاء.. وتسببت حرب العراق في رخاء وغنى منقطع النظير لشركة هاليبرتون وأهل هايبرتون من جراء شفط خيرات العراق النفطية من غير رادع.

ولا تحسبنّ أن بلادنا تخلو من جماعات الضغط، بل هي متوغلة في شتى المجالات ولعلها أحد أسباب الفساد في كثير من المواطن، وربما تفسر بعض الأحداث على علة جماعات الضغط، فمثلاً:

- قررت وزارة الصحة فرض صورة منفّرة على كل علب السجائر الهدف منها تنبيه من يدخن أن التدخين عاقبته الموت وأنه لا فائدة منه.. فكانت الصورة لمريض يضع جهاز التنفس الصناعي ويرقد في غيبوبة.. وبالفعل كان لها أثرها على الأقل من أصر على التدخين علم أنه يهلك نفسه فأصبح يقيناً بالنسبة له أنه كما المنتحر. ونتيجة لذلك، حتماً، تضررت شركات الدخان وعلى رأسها المصنع الأوحد للدخان في مصر وهي الشرقية للدخان..

فجأة يظهر صاحب الصورة في الإعلام ويقول أنه ليس مريضاً بل هو ممثل اتفق مع وزارة الصحة أن يصوروه وهو في هذه الحالة، ولا أساس من الصحة لهذه الصورة.. ليس هذا فحسب، بل أنه ادعى أن وزارة الصحة أكلت عليه ماله الذي اتفق أن يتقاضاه منهم..

طبعاً كانت النتيجة أولاً: انعدام تأثير الصورة على المدخن الذي يتلكأ لكي لا يشعر نفسه بالذنب أو الخطر من التدخين.

وثانياً: تم إزالة الصورة أساساً بواحدة أقل حدة - لكي لا يشعر المدخن بالتوتر وهو يدخن ويقبل على شراء السجائر - وهي عبارة عن طفل يضع منديلاً على أنفه.. يعني الدخان مضايقه.. خلاص يعني لو دخنت في مكان ليس فيه أطفال إذاً في الأمر حسن..

ثالثاً: حتى هذه الصورة أزيلت، ووضع مكانها رسماً كاريكاتورياً لإمرأة حامل، يدخل الدخان إلى بطنها وعبارة ساذجة بجانب الصورة تفيد أن التدخين يضر الحوامل.. إذاً البراح أصبح أوسع وأفسح.. دخّن كما شئت.. وفي الأماكن العامة.. ولكن إذا كانت تجلس بجانبك إمرأة حامل، انفخ الدخان في الناحية الثانية..

أتصور أن هذا بفعل جماعات الضغط الذين يتسفيدون من الدخان والذين يدخنونه.. شركة كالشرقية للدخان لا يمكن أن تتنازل عن تعريفة واحدة اكتسبتها فيما مضى، بل تأمل في الزيادة دائماً.. نعم، شركة الشرقية للدخان ثاني أكبر إيرادات في مصر، بعد قناة السويس!.

- كذلك من النماذج التي توحي بفعل جماعات الضغط، شغل الرنات والزيرو تسعمائة.. كان وزير الإعلام قد أصدر قراراً بمنع الزيرو تسعمائة من التليفزيون، وبالفعل منعت لفترة.. ثم ما لبثت أن عاودت ثانية.. طبعاً فوراء هذه الرنات وهذا الهراء رجال أعمال ثقيلو المستوى، وأصحاب القنوات يتضجرون من منع ما كان يكسبهم الملايين على قفا الفراغ والتفاهات.

متيجوا نعمل جماعة ضغط ضد الفساد، وتكون أدواة ضغطها المقاطعة..

يعني نعمل لوبي المقاطيع..

اللي ميعجبناش نقاطعه.. وما أكثر ما لا يعجبنا في هذا البلد.. شرط ألا نقاطع ما كان مقاطعته خراباً مستجلاً والأذى منه أكبر من نفعه.. يعني مثلاً مينفعش نقاطع الحكومة.. منركبش أوتوبيسات ولا نطلع شهادات ميلاد ولا تعاون مثلاً مع وزارة الصحة في الانفلونزا مثلاً.. ولكن مثلاً ممكن نقاطع حديد عز بسبب الاحتكار وقانون الاحتكار اللولبي الذي تم تقييفه مؤخرا.. مثلاً نقاطع الكورة ومشاهدة الكورة عشان القرف اللي حصل مؤخراً ده مش عايزين نفتكره.. مثلاً نقاطع تامر حسني عشان ده مثال سيئ للشباب لتهربه من الخدمة العسكرية والتزوير.. نقاطع القنوات المسفّه السافلة اللي خربت الأخلاق وخربت الدنيا ولا ليها لجام ولا حاكم..

نقاطع الاستبداد وحب النفس والسلبية التي تملكت منا شعباً وحكومة.