السبت، ديسمبر 28، 2013

صديق مؤثر (2) - مصطفى رشدي

في فترة الكلية كان بياخُدنا نروح معاه دروس الشيخ محمود المصري، وكان - ولا زال - مُذكِّر لمن حوله في عمل الخير وتقوى الله والبُعد عن الحرام والشُبُهات. عربيته اللادا ياما شافت مننا الصراحة، تملي كان يوصلنا معاه وإحنا راجعين من الكلية، لحد ما العلام فرَّقنا بقى فمبقيناش نعرف نبرشط عليه في الرجوع من الكلية (اكمنه كان ميكانيكا انتاج واحنا ميكاترونيكس).

نروح نعبِّي معاه كياس شُنَط رمضان..

نروح نصلّي معاه في مسجد بلال بن رباح ورا الشيخ رضا في رمضان،

أشوفه كده كل يوم أما آجي أصلي في الزاوية اللي قُدام بيته لَزَم..

إنه الصديق الشقيق مُصْطفى بن رُشْديّ بارك اللهُ في وقته ورزقه وبلغه أعلى درجات الجنة

Mostafa Roshdy

#صديق_مؤثر

الجمعة، ديسمبر 27، 2013

نسيان القضية..

الحاجة اللي كُنا خايفين منها زمان، بدأت تبقى واقع عايشينه على الأرض دلوقتي. دلوقتي بقى العدو حماس والمقاومة الفلسطينية، وإسرائيل بقت دولة مجاورة مفيش أي مانع لإقامة علاقات معاها.. القضية اتنسِت، وبقى الكلام على إنه إسرائيل دولة محترمة متقدمة ديمقراطية علينا أن نتعاون معها، ونعمل لها ألف حساب في اتخاذ القرار الوطني.

يا جماعة إحنا أهالينا ربّونا على نُصرة القضية اللي هي "حق"، دلوقتي الشباب الجُداد طالع شايف إسرائيل بلد متطورة محترمة ديمقراطية بتواجه إرهاب ولها حق الدفاع عن نفسها فيه!

يا شباب، المهمة صعبة.. ومحتاجين صبر وعلم وعمل وإخلاص لله وحده.

الموضوع أصبح لا يحتمل إننا نتهاون في أي من أساسيتنا اللي تربينا عليها، خليك عارف كويس إنك لما بتتهاون في تربية ابنك دلوقتي فانت بكده بتطلع بني آدم خالي من القيم والمبادئ ومعندوش قضية في الحياة.. وسلبيات ده مش على ابنك لوحده، انت كده بتساهم في ضياع المجتمع كله.

باللهِ عليكم متاخدوش كلامي إنه أفوَرَة، إحنا فعلًا اتلعب بينا كويس أوي، وعرفوا يخشوا لنا من مداخل الدنيا والهوان، لغاية ما وصلنا للحالة اللي إحنا فيها دي.. وعمرنا ما كنا هنوصل لها لو كنا تمسكنا بالدين والمبادئ ونُصرة الحق.

التربية يا إخوة لا تهاون فيها..

"وإن تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لا يَكونوا أَمْثالَكُم"..


---------------
شاهد إن شئت مثال حي على ما وصلنا إليه من تقبل فكرة وجود الكيان الصهيوني المحتل على أرض فلسطين وأن الطريق هو نبذ الخلافات بيننا وإقامة علاقات حقيقية بين الدولتين: https://www.youtube.com/watch?v=RHzTZxAUOkA 

الخميس، ديسمبر 26، 2013

ألقاب الدين - كتبها: الشيخ محمد عبد البر

من أضر ما حصل للخطاب الإسلام ظهور ألقاب لدين الله تعالى مثل (الإسلام الوسطي) أو (الإسلام المعتدل) أو (الإسلام الحضاري) أو (الإسلام السياسي)
والذي أراه أن ذلك كان نتاج فكرتين:

الأولى: أن غير المتخصصين استباحوا النظر في النصوص الشرعية لاستنباط الأحكام والمفاهيم غير منضبطين بعلوم الآلة (التي هي اللغة العربية والمنطق وأصول الفقه) فرأوا الإسلام بأعين متشبعة بآرائهم المتلقاة من خبراتهم ونظراتهم في الحياة وفي تخصصاتهم السياسية والتربوية والاستراتيجية وغيرها، فلما اطلع العلماء (التقليديون) على نتاج منهاجهم حصل النقاش بينهم وبينهم، فوجدوا أنفسهم أمام التعارض بين ما استنبطوه بآرائهم وبين قواعد العلوم، فإذا بهم يُطَوِّعون قواعد العلوم بدلا من مراجعة استنباطهم، فإذا ما اصطدموا بالأحكام الفقهية مثلا قالوا ما نقدمه ليس هو الفقه (التقليدي) وإنما هو الفقه (الاستراتيجي) أو (الحضاري) وإذا ما اصطدموا بقواعد الأصول قالوا نحن نتبع الأصول (المقاصدية) لا الأصول التقليدية، وإذا ما اصطدموا باللغة قالوا نحن نتبع اللغة (كوعاء حضاري فكري) لا اللغة التقليدية.. وهكذا يكون الناتج شيئا جديدا لا يعرفه ولم يعرفه علماء الإسلام بحال.

والثانية: ظن بعض (المشايخ) أنهم مطالبون بالنتائج، فراحوا يقدمون للناس الخطاب الذي يرضيهم لا الذي ينفعهم، وبذلك تحول الطبيب إلى تابع لأهواء المريض!

ونتج عن هاتين الفكرتين أن راح أهل الخطاب الإسلامي (المعاصر) يخرجون عللى البيئة العلمية بعملية جديدة تماما سموها (التأصيل) أي البحث عن أصل شرعي لواقع موجود أو فكرة مستنبطة من مصدر ما، وهكذا يضعون العربة أمام الفرس، لأن الذي نعرفه في تراثنا الفقهي هو (التفريع) لا التأصيل، وهو البدء بالأصل ثم الوصول منه إلى الفرع الذي يفرض نفسه علينا نتيجة لاتباع المنهج الأصولي اللغوي المنطقي في البناء على الأصل، وبذلك يكون المنهج المذكور هو الذي جاء بالنتيجة لا نحن..

راحوا يتلون قوله تعالى (ولو كنت فظا غليظ القلب لانفضوا من حولك) فقالوا إن الله تعالى يوجه النبي صلى الله عليه وسلم إلى قياس الرأي الجمعي للجماهير ومراجعة الذات، وقوله تعالى (ادع إلى سبيل ربك بالحكمة والموعظة الحسنة) فيستنبطون أن الإسلام يخلو تماما من كل فعل عنيف أو شديد، وبناء عليه فكل حكم فقهي يشتمل على شدة فهو مؤول أو منسوخ أو حتى مردود وإن كان مبنيا على نص صحيح أو محل إجماع من العلماء..

النتيجة هي دين جديد مصطبغ بصبغة بشرية خاضعة لتطورات العصور، دين يتغير فيه حكم الخالق تبعا لمراد المخلوق وفهمه ((للمصلحة))

=======================================
أرجو الانتباه هنا إلى أني لا أغفل تغير الحكم بتغير الواقع في "بعض" المسائل، وإنما أدعو لاتباع المناهج الأصولية اللغوية المنطقية في بحث المسائل لا أية مناهج أخرى ولا بلا مناهج على الإطلاق
=======================================

أما أنا فلا أعرف إلا أن ربي وخالقي عز وجل وصف لسان حال المؤمنين بقوله (صبغة الله ومن أحسن من الله صبغة ونحن له عابدون) وقوله (وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم) وقوله (فلا وربك لا يؤمنون حتى يحكموك فيما شجر بينهم ثم لا يجدوا في أنفسهم حرجا مما قضيت ويسلموا تسليما)

أيها العلماء: قوموا بوظيفتكم يرحمكم الله .. انزلوا للساحة واظهروا بين الناس وأعلنوا عن أنفسكم واشرحوا الدين ووضحوا مناهجه الصحيحة.

يا أهل التخصصات العلمية والمدنية والسياسية و... إلخ: ارحمونا (أبوس إيديكم) .. اشتغلوا بتخصصاتكم واتركوا علماء الدين يقومون بدورهم، دعوهم يبينوا الإسلام المجرد غير ملقب بلقب أو مصطبغ بصبغة، الإسلام فقط، الإسلام الذي أنزله الله بلا زيادة ولا نقصان.

صديق مؤثر (1) - أسامة فوزي السقا

ما شاء الله كان من أكثر الطلاب المحبوبين في المرحلة الابتدائية، وأتذكر لما قرر ينقل لمدرسة الطلاب الموهوبين الفصل كله قعد يعيَّط تقريبًا :)، ولما جالنا زيارة الفصل شاله على الأكتاف - دي حقيقة فعلًا

بعد كده ربنا كرم والواحد بقى يشوفه تاني في مصنع الرجال - هندسة عين شمس - وكان سبب سبَّبَه الله سبحانه وتعالى للواحد إنه يلتزم بالصلاة في المسجد ويعتبرها أمر أساسي مش فضل..

صحيح هو ألشاته عفى عليها الزمن خلاص، بس يشفع له في ذلك إن أبوه يعرف أبويا


إنه أخي اللي نفسي أشوفه وخايف ليكون شكله اتغيَّر: أسامة فوزي السقَّـــا
Ossama Fawzy El Saka

‫#‏صديق_مؤثر

الأربعاء، ديسمبر 25، 2013

النقاش المصري الطبيعي بعد أي تفجير

الأول: ذنبهم إيه اللي ماتوا بالتفجير ده؟! يا إخوان ياولاد الكلب! انتم حلال فيكم الحرق في المزابل، أنا لو بس أطول أشوف واحد شايل علامة رابعة دي أتملك منه بس وأنا أطلع تلاتة أربعة سبعتلاف سلسفيل عيلته كلها..
العادي: معقولة لحقوا يعملوا تحقيقات وطلع إن اللي عملوا كده إخوان؟
الأول: إيه ده؟! انت عاجبك وفرحان أوي باللي بيموتوا ضباط الشرطة ويحرقوهم! انت إيه يا أخي!
العادي: يا عم مين اللي قال إن اللي عمل كده إخوان؟ أو إن اللي معملش كده إخوان؟
الثاني: إيه ده انت قصدك إن اللي عمل كده إخوان؟
الأول: مين اللي قال إن اللي معملش كده إخوان برضو؟
الثاني: هي تُهَم جُزاف يابني انت؟!
العادي: لا ماهو برضو ممكن يكون اللي عمل كده مش إخوان طبعًا!
الأول: إيه ده انت قصدك إن مش الإخوان اللي عملوها؟ انت إخوان ولا إيه؟
العادي: يا عم مين اللي قال إن اللي عمل كده إخوان؟ أو إن اللي معملش كده إخوان؟
الثاني: إيه ده انت قصدك إن اللي عمل كده إخوان؟
الأول: مين اللي قال إن اللي معملش كده إخوان برضو؟
الثاني: هي تُهَم جُزاف يابني انت؟!
العادي: لا ماهو برضو ممكن يكون اللي عمل كده مش إخوان طبعًا!
الأول: إيه ده انت قصدك إن مش الإخوان اللي عملوها؟ انت إخوان ولا إيه؟
العادي: يا عم مين اللي قال إن اللي عمل كده إخوان؟ أو إن اللي معملش كده إخوان؟
الثاني: إيه ده انت قصدك إن اللي عمل كده إخوان؟
الأول: مين اللي قال إن اللي معملش كده إخوان برضو؟
الثاني: هي تُهَم جُزاف يابني انت؟!
العادي: لا ماهو برضو ممكن يكون اللي عمل كده مش إخوان طبعًا!
الأول: إيه ده انت قصدك إن مش الإخوان اللي عملوها؟ انت إخوان ولا إيه؟

---
‫#‏السبام_إرادة_شعب‬
‫#‏النقاشات_كلها_بقت_سبام‬
‫#‏الحلقة_المفرغة‬
‫#‏البخت_مام_من_النقاشات_السبام

الأربعاء، نوفمبر 27، 2013

قضاء السلطان!

هو من امتى كان القضاء المصري حقاني على طول الخط، القضاء المصري اللي القضايا بتقعد فيه بالخمستاشر سنة ميتحكمش فيها ولما تبقى قضية رأي عام مُسيَّسة تلاقي الحُكم طالع في نُص يوم! القضاء اللي كان أداة حسني مبارك في تقنين كل البلاوي اللي كان بيعملها، وكان بيصدَّق له على اعتقالات الناس بالجُملة ومفتحوش بقهم في عصر التلاتين سنة طوارئ - إلا من رحم ربي - هيكون إيه غير مؤسسة مشوهة مهمتها بالأساس نفاق الحاكم - لو بيوجع وأداة بطشه فتاكة - ونرجع نقول إلا من رحم ربي برضو..

إحنا إزاي نبتدي نفوق دلوقتي لما نشوفهم بيحكموا بـ 11 سنة سجن على بنات تهمتهم إنهم كانوا معاهم بلالين وإحنا عارفين إن القضا المصري بتاعنا عينه مبرَّقة ومفتَّحة أوي ع الغلابة ومتغمِّية عن التقال اللي في البلد اللي واكلينها في كرشهم!

لما تكون تُهَم حسني مبارك المزوِّر المستبد اللي أفسد الحياة السياسية اللي خلى الداخلية أداة بطش وإذلال للشعب المصري مش خدمة له اللي فسد وساب اللي حواليها ينهبوا في البلد سنين.. أما تكون تُهَمُه اللي بيتحاكم عليها هي: قتل المتظاهرين في ثورة 25 يناير!! طب وبالنسبة للأسباب اللي خلت المتظاهرين دول يقوموا عليه في 25 يناير؟! يعني الناس قامت بالثورة دي وضحِّت بنفسها وماتوا عشان كانوا متضايقين شوية مثلًا فهو تسرَّع وقتلهم ودي هي كل جريمته؟! يعني لو أُثبِت إن الناس دي كانت هتهجم على منشآت حيوية فالشرطة اضطرت إنها تتعامل معاهم بالقوة فمات من المتظاهرين ناس وطلع منها براءة خلاص كده مبارك برئ؟!!!!!

معملش فينا حاجة خالص مبارك؟! يعني البلد كانت بيرلانت سياسيًا وسياديًا واقتصاديًا ونزاهةً بس الشرطة اتغاشمت في 28 يناير؟! هو ده كل اللي عمله حسني مبارك وحبيب العادلي؟! معنى كده إن الشعب عايش في رغد ونعيم وهو مش واخد باله!!! 

قضاء مشلول أداة في إيد السُلطان ميعرفش يجيب حق حد غير لو السُلطان راضي عن كده، إنما لو المظلوم ده مغضوب عليه من السًلطان - لأي سببٍ كان - فمعلش بقى يابني شوف لك بلد تانية تعيش فيها أكرم لك..

الحُكم بتاع 11 سنة ده تتويج لجهود القضاء الفاسد على مدار عقود.. ده إحنا كنا بنقول: "لا لمحاكمة المدنيين عسكريًا" على اعتبار إنه المفترض المدني يتحاكم أمام قاضيه الطبيعي، طب لما يبقى القضاء الطبيعي دراع السُلطان اللي بيلوي بها عنق معارضيه وبيبطِش بها عليهم نقول "لا" لمحاكمة الناس في مصر بقى بصفة عامة؟!

المظلوم في البلد دي مالوش غير ربنا وكفى به ناصرًا، واللهِ العظيم سيقف هذا القاضي أمام رب العزة وسيُحاسَب وحده، سيُحاكم وحده.. وقتها مش هيبقى فيه سُلطان يقف جنبه ولا شعب قبل كده كان فرحان بأحكامه الظالمه في حق خصومه..

القضاء مش وظيفة إدارية الغلطة فيها تقف على إمضا غلط ولا توجيه غلط، القضاء ابتلاء عظيم يا إما اللي يتولى المسئولية فيه يكون راجل ويحكم بالحق والحق بس، يا إما يروح في ستين داهية.

اللهم مكِّن لهذه البلاد أمرَ رُشد يُعَز فيه أهل طاعتِك ويُتاب فيه على أهل معصيتك، إنك وليُّ ذلك والقادرُ عليه..

السبت، نوفمبر 23، 2013

في التشريفة!


- علينا برضو نعطي كل ذي حقٍ حقه، الجيش فاهم الشعب والبلد أكتر مننا بكتير، عارف إيه اللي بيهِت الناس وبيرمي الرهبة في قلوبهم.

لازم يبقى فيه تشريفة للريس وهو معدي، والناس تتقرف مش مهم بس في النهاية هيخافوا، ويبقوا عارفين إنه عشان ده الريس لازم يبقى بينك وبينه كتير

مينفعش تبقى عادي كده جنب لجنب مع رئيس الجمهورية، وإلا هـ"يضعف" قصادك.

مرسي مفهمش دي ومكنش بيعمل تشريفة عشان يعدي، يدوبك يوقف العربيات خمس دقايق يعدي وبعدين الحركة تمشي طبيعي عادي..

ده كان من ضمن الحاجات اللي خلِتُه هِتية قصاد الناس، وبقت اللبانة في بق الناس: بقى ده رئيس ده؟ ياخي ده حتى حسني مبارك كان مالي مركزه!

طبعًا مرسي خربها في حاجات كتير أساسًا، بس ده مش موضوعنا.. أنا افتكرت موضوع التشريفة ده لما وقفت في تشريفة عدلي منصور أما كان معدي.

وأنا رأيي إنه مسألة التباسط زيادة مع الناس مش قاعدة ع المطلق، تتواضع طبعا لكن لو طبيعة الشعب يستهزأ بك لو تباسطت زيادة عن اللزوم، يبقى لأ

التويتات السابقة لا تدعو أي رئيس جمهورية إنه يعمل تشريفة مثلًا! دي بتؤكد بس إن للأسف الشعب ده خلى الحُكام بتوعه يركبوه بالطريقة دي!

الخميس، نوفمبر 21، 2013

العدل والقانون!

ذاع أمر الجريمة فوصل للحي كله، وعلم الجميع بما حدث أمس من الشقيّ.. إذ تجرَّد من كل ما لديه من إنسانية - أو ما اتصل بالإنسانية - وخطف الطفلة ذات الست سنوات وصعد بها إلى سطح العمارة، فأراد أن يغتصبَها في غفلةٍ من أهلها، فأبت وصرخت، فغلى الدمُ في عروقه وسَرَت النار فيه، فعمد أن يغصبها على فِعلَتِه بعنف أكثر وأكثر حتى فدفعها من أعلى السطح فوقعت على الأسفلت قتيلة.

ورآها أهلها بعد ذلك فبكوْا وانتحبوا، ولما عرفوا أنه هو الذي قام بفعلته هذه قدموا فيه بلاغًا للقسم ليقتصوا منه جزاء جريمته الشنعاء، ولأن الشرطة لم تجد ما يثبت بالدليل القاطع والقرينة الواضحة ما يدين المجرم على فعلته، ولأن أهل الحي آثروا السلامة عن أن يشهدوا بما رأوْه.. خرج المجرم من القضية ولم يُصِبْه أي مكروه!

وبكى أهل الطفلة بكاءً حتى ابيضَّت عينا والد الطفلة، وانتحبت الأم عويلًا.. فلم ينتصر لابنتهم أحد، ولم يقتصوا لها.. والمجرم يسير في الحارة مطمئنًا، فأهلها جبنوا أن يتعرضوا له، فهو البلطجي ابن البلطجي الذي طالما يذيقهم المُر، هو وصُحبته فُتُوَّات الحيّ.

حتى جاء أخو الطفلة وقد شَدَّ بُنيانَه وتفتَّقَت عضلاته، تنظر في عينيه فترى الشَّرار يتناثَرُ منها، انطلق إلى حيث يجلس هذا الشقيّ فتملَّكَه بيدٍ واحدةٍ - أمام أصحابه الذين لم ينطقوا ولم يتحركوا لينصروا زميل حيوانيَّتَهم لهوْل ما عاينوه - ثم رمى به إلى حائط المكان، فأخرج من جيبه مسمار فدكَّه في يدِ المُجرم وثبَّتها به في الحائط، وكذلك فعل في يدِه الأخرى، ثم تناول رقبته فخنقه حتى كاد أن يُصْرَعَ في يدِه، فأبى أن تكونَ نهايته بهذه السرعة، فأتى بمنشارٍ فنشَرَ به رِجْلَه، فانفجر الدم من قدميْه، ثم علا بالمنشار فقطع به من فخذِه، فانفجر بركانٌ من الدم، ثم قطع ذكره.. ورغم صرخات المُجرم واستغاثته لأصحابه إلا أن أصحابه أبوْا أن ينصروه.

فقد كانوا ينظرون إلى وحشِ كاسرٍ نظرة عينيه وحدها كفيلة أن تصرُعَهم مكانهم، إنهم لا يعرفونه على الرغم من أنهم يعرفونه! إنه شخصٌ آخر غير الذي اعتادوا أن يمروا عليه يسخرون منه كل يوم.. حوَّله دافع الانتقام وغياب العدالة والقِصاص إلى شخص غير الذي يعرفونه تمامًا.. كأنه أضخم بكثير، وأقوى بكثير.. من خوفِهم منه لم يستطيعوا حتى أن يهربوا منه! 

وبينما كان المجرم يلفظ أنفاسه، مسك أخو البنت برقبته وضغط عليها فقال له: "إن كان لي أن أفعل فعلتي هذه مئة مرَّة، وفي كل مرة أرى في وجهِك علامات الفزع والصَّرَع والخوف والقُرب من الموت لفعلت.. إني في غاية السعادة أن أراك في هذه الصورة، فلست إلا كَلْبًا عقورًا لا تَمُت للإنسانية بصِلة! وإن كان لي أن أفعل ذلك بكل من تركك تُعَرْبِد في البلاد هكذا لفعلت وأنا مُرتاح الضمير، حتى وإن لاقيْت عقاب القتلِ في سبيل ذلك".

فلما مات المُجرِم تركه والتفت لأهل الحي الذين أتوْا من كل حدبٍ وصوب يشاهدون المجرِمَ وهو يموت فقال لهم: "إنكم قومَ بؤسِ وُلِيَ عليْكُم من هو منكم لا يهتم لشأنِكم ولا يعنيه أن تُزْهَق أرواحُكُم كلكم في غير ما يحل لها. ولئن وُليتُ عليكم لأحْكُمنَّكم بالحديدِ والنار حتى أقتص من كل فذ منكم إلى من استضعفه، ولا تعنيني قوانينُكم الحمقاء التي تكتبونها في الكتب وتدرسونها لأنفسِكم، فإن مداري العدل والعدل فقط!"

الأحد، نوفمبر 17، 2013

محمد محمود 2013

إذا كان الإخوان قد آثروا "البرلمان" في عهد محمد محمود الأولى وشَنَّ بعض قادتها على المتظاهرين وقتها السب والاتهامات الجُزاف بغير حق، فإن الشرطة كانت هي من تقتلهم. فإن كنت ترى أن الإخوان باعوا فإن الشرطة وقتها هي من قتل، وإن كنت ترى أن الشرطة وقتها كانت على حق إذ زعمت أن المتظاهرين كانوا على وشك اقتحام الوزارة فليس لك أن تتكلم عن خيانة الإخوان ولا بيعهم للقضية. فإذا كان غضبك من الإخوان وقت محمد محمود أنهم كـ"تنظيم" اهتموا بالبرلمان و"باعوا" المتظاهرين في محمد محمود، فإن هذا لا ينزل بهم إلى منزلة ودرك القتلة!

وتعالى نقيِّم الأمور ونضعها في نِصابها الصحيح من غير تهويل للأمور، وسيكون ذلك مقبولًا اليوم بما أن الأحداث الجِسام قد ولَّت:

- أنا غير مقتنع أن المتظاهرين صُدِموا من موقف الجماعة وقت محمد محمود وقرارها بعدم النزول، وذلك لأن الجميع كان يعلم أن الإخوان منذ أن تُرِك ميدان التحرير وهم يلعبون السياسة، وحتى خلال الثورة - ما قبل 11 فبراير - استجاب الإخوان - مع من استجابوا - إلى الحوار مع عمر سليمان رمز النظام العتيق. وهذا لأن الإخوان إصلاحيون كأسلوب حياة، وإصلاحيون هنا لا تعني أنهم على حق، بل تعني أنهم يفضلون دومًا السُبل الإصلاحية من مفاوضات ومساومات وتوزيعات إن كانت متاحة عن الاحتجاجات والثورات.. وهذه ليست أول مرة والتاريخ منذ عهد عبد الناصر موجود.

- فإذا لم نكن نتوقع منهم أن يُعلنوا صراحةً عن النزول، ورأينا من شبابهم من نزل في محمد محمود على مسئوليته الشخصية وبدافعه الثوري البحت فلا يمكن لصق كلمة الإخوان بالخيانة أو البيع. وبالتالي فإني أرى بالفصل بين مواقفهم الرسمية ومواقف الشُبان الواقعية على الأرض. 

وكون أن موقف الجماعة الرسمي مخيب للآمال فإن ذلك لا يجعلهم بدعةً من الكيانات الموجودة، فتقريبًا لا يوجد موقف رسمي واحد منذ اندلاع الثورة جاء مناصرًا لها في الوقت المناسب، اللهم إلا إلغاء التوقيت الصيفي! أما غير ذلك فكل المواقف الرسمية إما تكون مخيبة للآمال أو أنها تأتي في وقت متأخِر فيكون ضاع أثرها.

ومن ذلك فإني لا أتصوَّر كيانًا ذا نظام إداري وروتين وقواعد تحكمه أن يكون ثوريًا أصلًا، وإلا ما الذي دفعه لتكوين نفسه بهذا الأسلوب الرسمي المنظَّم.

الحقيقة لا أجد ما أعلق به على بيان الشرطة والذي يقول فيه: المجد كل المجد لشهداء محمد محمود!! هل كان المتظاهرون يتظاهرون في وادٍ آخر وقتلهم أناسٌ أتوْا من كوكب آخر أم ماذا؟! أليست الشرطة هي التي قتلتهم؟! وهل يمكن لأي طفل أن يصدق أن الشرطة تغيرت وتهيكلت بكاملها فعرفت أن قتلها للمدنيين السلميين جريمة؟! كيف ولم يمضِ على أبشع مجازر تاريخ مصر الحديث بضعة أشهر، ولا تزال أيديهم ملوَّثة بدماء إخواننا الذين نحتسبهم عند الله شهداء ممكن كانوا يعتصمون برابعة والنهضة وغيرهم!! هؤلاء يمثِّلون أنفسهم تمامًا للمثل المصري الشهير: يقتل القتيل ويمشي في جنازته.

حسبنا الله ونِعم الوكيل.. حسبنا الله ونعم الوكيل.. حسبنا ونعم الوكيل!

الخميس، نوفمبر 14، 2013

أربع صوابع وأربع دول.. انت بتلاعبني بالصوابع؟

مُنتظرًا استلام ساندوتش البورغَر جِبنة، وبجانبِه صاحب المحل تقريبًا..

- بقول لحضرتك لو أنا حابب أبعت دليفري بس على واحد كريب نوتيلا بس ممكن؟
- ... يعني حضرتك إيه مش فاهم؟
- .. بـ.. بقول على أساس إن الأوردر صغيَّر يعني..
- الدنيا واقفة والحالة زي مانتا شايف، لا طبعًا يا باشا أجيلك في أي حتة.. انت عارف إحنا المصريين فينا الطبع ده، بنميِّل على بعض في الشدايد يعني، وبعدين أديك أهو بقيت تعرف قيمة نفسك فخلاص بقى!
- (يحاول يستوعب)..
- ده البلد دي كانت هتتقسِّم أربع دول.. (مشاورًا أربعة بأصابعِه).. (لا يزال يشاور بالأصابع)..
- آه..
- وكان هيُعلن ده في 26 ديسمبر..
- آآآآآآه..
- زي ما كان كاتب هيرتِزل بالضبط..
- ...
- شوف من ساعة ألف وتُمنميَّة مخطَّطين يقسموا مصر لأربع دول، في احتفالات الكريسماس بتاعة 2013..
- هيرتزل..
- أيوة هيرتزل..
- صهيوني هو؟
- آه طبعًا أمال إيه..
خلصت الحواوشي بتاع الراجل ابعته عليه بقى.. (لي:) اتفضل يا أستاذ استريح لحد ما الحاجة تخلص..

---
لو مشوفتوش حل للشعب ده يا جدعان يضبَّط عيشته قولوا عليه بالسلامة.. لأ ريلي بالسلامة يعني.

#أيقونة_ثلاثين_يونيو
#إيه_اللي_وداني_هناك
#شاور_لي_باربع_صوابع_اقفش

الثلاثاء، نوفمبر 12، 2013

الكورة في السياسة، السياسة في الكورة!



- يا كابتن، الأهلي هيبيع أحمد عبْظاهِر.. نشتري؟
- استنى..
(صوت زراير تون التليفون)
بييب بييب بييب تراك..
- (صوت خَشِن): ألو!
- أهلًا أهلًا سيادة الفريق.. معلش لو بكلم معاليك في وقت مش مناسب (يرتسِم على وجهِه ابتسامة سِنتيحة).. يا فندم كلك ذوق كتَّر خيرك.. آه.. كنت بقول لمعاليك، دلوقتي عرفنا إن النادي الأهلي عارض الواد عبظاهر للبيع.. أيوة يا فندم طبعًا عارف إن معاليك عارف.. كنت بقول لحضرتك هل في مشكلة أو حاجة لو حبينا نشتري.. ممم؟.. أستنى حضرتك على التليفون؟ آه آسف أستنى حضرتك لما تقول لي نشتريه ولا لأ.. حاضر يا فندم.. حأ.. حاااضر يا فندم.. آسفين يا فندم ع الإزعاج، في رعاية الله يا فندم، نشوفك على خير يا فندم، مع ألف سلامة يا فندم.

هنستنى شوية يا كابتن معلش.. لحد الإشارة بس.

#السياسة_في_الكورة_لأ
#الكورة_في_السياسة_لأ
#أسياد_إفريقيا
#إيه_اللي_وداه_ناحية_الجول؟

الاثنين، نوفمبر 11، 2013

فاصل تنفيسي (2) - نزوهة المرور..

ينزل من بيتِه ليركب السيارة مُتجهًا للعمل، مهموم بما عليه من "تارغِت" ويفكر كيف يخبط الخبطة الذهبية التي تجعله مرتاح البال هنيئًا، رغم أنه يعرف أن هذا لن يجعلَه مُرتاح البال في كل الأحوال يعني، وذلك لأن البلد ذاتها من غير أي مسئولية منه تجيب الضَّغْط والعِلَّة عافانا الله وإياكم منها..

يستقل سيارته ويتجه فأول ما يبدأ به يومه المروريّ الجميل سيارة آتية بالاتجاه العكسي للاتجاه الصحيح لهذا الشارع الضيق، ليست المشكلة في ذلك تمامًا فهذا أصبح أمر عادي جدًا ولكن المشكلة هي في العربيات التي تركِن صف ثاني في هذا الشارع الضيق، مما يجعل مسألة رجوع أيّ منا عن قرارِه في العبور أمرًا طبيعيًا مُلزِمًا إذا أراد كلٌ منا العبور في هذا اليوم الجميل! وبما أنه هو الذي يسير في الاتجاه المخالف فمنطقيًا وبمنتهى البداهة عليه أن يرجع هو إلى الخلف - من غير أن يشعر بأي غضاضة في نفسِه يعني - لينساب المرور من جديد.

إلا أن أخينا المخالف يأبى ذلك، ويُصر أن نـرجع نحن القادمون بالاتجاه الصحيح، إلى هنا هذا أمرٌ طبيعيٌ جدًا في قاهرتنا الجميلة المحروسة اللي زي العسل، ولكن أكثر ما يغيظ هي مبررات المخالف لارتكاب مخالفته فمثلًا في هذا اليوم كان يقول:

- اليافطة بتقول إن اتجاهي صح..
- إزاي حضرتك ده اليافطة اللي بتتكلم عليها دي هي اللي بتقول إن اتجاهك كده غلط!
- طب والناس اللي راكنة في الاتجاه اللي أنا ماشي فيه ده كلها غلط هي كمان؟
- أيوة غلط.
- يا سلام؟! وانتو بقى اللي صح؟
- متشوف اليافطة اللي على نهاية الشارع من هنا ومن هنا بتقول إن الاتجاه واحد اللي هو كده (يشاوِر بغِلظة كما لو يود أن تخزِّق أصابعَه عيْنيه)
- يا سلام! وكل الناس اللي راكنة دي غلط؟!
- ...
- أنا بقالي عشِّين سنة بعدي من هنا في الاتجاه ده..
- بتعدي كده غلط نعمل لك إيه!!!!!!

وعلى الرغم من أن أحد من كانوا في الاتجاه الخاطئ يقنعونه أنهم على خطأ إلا أن ذلك لم يجعله يتراجع عن رأيِه أبدًا! ولم يرجِع حتى رأي الناس كُلها بلا استثناء ضده، ولم يمنعه رجوعه للحق أن يُبَرْطِم بالكلام..!

يعبر هذه النزهة المرورية اللطيفة ليركب الشارع الرئيسي مُتجهًا إلى العمل في قمة النشاط والحيوية، ولكنه يُحْبَط حينما يرى تكدُس السيارات فوق بعضِها البعض من كل الاتجاهات.. والحقيقة لا أدري لماذا يُحبَط؟ فمُفترض أنه اعتاد أن يرى هذه المناظر كل يوم، وملّ من المحاولات المُستَميتة لتحليل الموقف وللإجابة على سؤال: لماذا كل يوم زحمة؟ لماذا يغلقون الشوارع والميادين؟ لماذا يركب الناس على بعضهم البعض في المرور؟ لماذا..// حتى يُفاجأ بمن يدخل اليوتِرن عكسي، فتقفل لعبة الدومَنة تمامًا.

وهنا، يخرج من السيارة - بكل أدب - ويغلق السِنتر لوك - بكل أدب - ثم يلتفت لينظر إلى وجه هذا المواطن - بكل أدب - فيتحرَّك نحوه - بكل أدب - وهو لا يعرف ما الذي سيفعله حينما يلاقيه - بكل أدب - وما إن أتى ناحيته حتى..

Hey, what about yesterday
(What about us)
What about the seas
(What about us)
The heavens are falling down
(What about us)

I can't even breathe

ومع تصاعد العااااااااااااا تطير السيارات كلها وتشكل حلقة دائرية في السماء، يُدَبْدِب هو في الأرض صارخًا:

WHAT ABOUT US!!!!

ثم ترتطِم كل السيارات ببعضِها البعض وأصوات انفجارات، وتعود في الصورة الشوارع وهي فاضية تمامًا وبياع الحلابِسَّة واقف في الكوربة وبياع السميط ع الكورنيش ومعه مكملاته الغذائية - البيض والجبنة - ، وتتصحَّر القاهرة من جديد..

ثم يأتي في الخلفية إمبان بارون يقول: ائتوني بالقلم والمسطرة التي لأخطِّط لكم مصر الجديدة، فيقاطعه صاحبنا يقول:

وحياة والدك خلِّ الشوارع سبعتاشر حارة، والجراجات في كل حتة تحت الأرض متعدِّدة الطوابق وضباط المرور واقفين في كل رُكنة اللي يركن صف ثاني يُلقى في أي ثقب زمني لا نعرف منتهاه واللي يكسِر على أخيه السائق نمسِكه نعلقه كلنا فوق القصر بتاعك واللي يسيب بالوعة مفتوحة ندفنه فيها ونقفل عليها ونسفلِت ونَعتَبَرْها شارع عادي، والعسكري اللي واقف زي قلته نحطُه في أولِّتُه والمحافظ كده كده نولَّع فيه والبنزينات تبقى في الصحرا والعربيات تموِّن من العيون والـ..

ثم يُدرك أنه كان في حلم باليقظة..
ولكنه يكتشف أن أطرافه تراخت وأن أعصابه ارتاحت..

فيعود ويطفئ محرك سيارته وينام بداخلِها في سُكون..

----
#فاصل_تنفيسي
#MJ

الأحد، نوفمبر 10، 2013

فاصل تنفيسي (1) - استفتاح اليوم

يستفتِح يومَه واقفًا على باب الأسانسير للنزول، يأتي الأسانسير مُحْدِثًا صوتًا عاليًا كما لو كانت مفاصله كلها تحتكّ ببعضِها البعض أو كما لو كان بئر الأسانسير ضاق عليه فجأة! يفتح الباب، يدخل يتلفت لباب الكابينة في حركة لا إرادية لا ينشُدُ منها أي شئ غير أنه يريد ثباتًا انفعاليًا لئلا يظهر منه أي رد فعل تجاه مستفِزَّات الحياة اليومية العادية، ولكن يأبى البعضُ ذلك فأول ما يستفتح به يرى على باب الأسانسير وحوائط الكابينة:

الـ CC قاتل (مشطوبًا عليها) ومكتوب تحتها:
مرسي خائن وعميل وبتاع أمريكا (مشطوبًا عليها) ومكتوب تحتها:
الـ CC خائن وو*خ (غير مشطوب عليها)
مرسي *** والمرشد ***

وفيما يبدو أن الحِبر نفذ من الرجل فكحت ببرجل فيما يبدو على استانلس باب الأسانسير:

سـ..يسي عمـيـ..ل

يتسائل وأنا مال اللي جابوا ديك ديوك سلف كل معارفي، كان أولى بكما أن تمسِكا في خناق بعضِكما البعض!

حتى نزل فهُيِّئ له أنه يرى أحد هؤلاء الأشقياء يقوم بمزاولة عادته اليوميَّة، فسقط اللابتوب من قبضة يده، و"بحلق" فيه كأنما رأي صيدًا غاليًا.. ظل يتأمَّل فيه ويفكِّر فيما يمكن فعله، فإذا به يقفز عليه كما "ريْدِن" في Mortal Kombat فيُلصِقه بالجدار، ثم يمسك منه القلم فيكتب على وجهِه: مُشوِّه للحياة مُستفز للأعين، خائن قاتل!. ثم يُنصِبُهُ في الجدار ويرسم حوله "كلاود" حمراء خارج منها سَهم يقول: "مكبوت ولا أجد مكانًا أعبِّر فيه عن معاميعي والفيسبوك قلب كاندي كراش"..

----
- الرسالة لا تناقش أي آراء سياسة.
- #فاصل_تنفيسي

الجمعة، نوفمبر 01، 2013

من تفسير سورة الكهف للمراغي - الصاحبان

ودخل جنته وهو ظالمٌ لنفسه قال ما أظُنُ أن تبيدَ هذه أبدًا، وما أظُنُ الساعةَ قآئمةً ولئن رُدِدتُ إلى ربي لأجِدَنَّ خيرًا منها مُنقلبًا..

قال له صاحبه وهو يحاوره أكفرت بالذي خلقك من ترابٍ ثُم من نُطْفةٍ ثُم سوَّاكَ رَجُلًا؟

***
بعد أن أمر الله نبيه بصبر نفسه مع فقراء المؤمنين، وعدم طاعة أولئك الأغنياء من المشركين الذين طلبوا منه صلى الله عليه وسلم طرد هؤلاء الصعاليك، وأن يعين لهم مجلسا وللسادة مجلسا آخر حتى لا يؤذوهم بمناظرهم البشعة، وروائحهم المستقذرة، وحتى لا يقال إن السادة ومواليهم يجتمعون في صعيد واحد، ويتحدثون وإياهم حديث الند للند، وفى ذلك امتهان لكبريائهم وخفض من عزتهم - قفى على ذلك بمثل يستبين منه أن المال لا ينبغي أن يكون موضع فخار، لأنه ظل زائل، وأنه كثيرا ما يصير الفقير غنيا والغنى فقيرا، وإنما الذي يجب أن يكون أساس التفاخر، وعمدة التفاضل، هو طاعة الله وعبادته والعمل على ما يرضيه في دار الكرامة حيث لا ينفع مال ولا بنون إلا من أتى الله بقلب سليم.

"ودخل جنته وهو ظالمٌ لنفسه قال ما أظُنُ أن تبيدَ هذه أبدًا، وما أظُنُ الساعةَ قآئمةً ولئن رُدِدتُ إلى ربي لأجِدَنَّ خيرًا منها مُنقلبًا.."

أي ودخل هذا الذي جعلنا له جنتين من أعناب وأشجار ونخيل، ومعه صاحبه، هاتين الجنتين وطاف به فيهما مفاخرا وقال حين عاين ما فيهما من أشجار وثمار وزروع وأنهار مطردة: ما أظن أن تفنى هذه الجنة أبدا ولا تخرب - كما قال (وهو شاك في المعاد إلى الله والبعث والنشور) ما أظن أن يوم القيامة آت كما تقولون، وقد كان في كل ذلك ظالما لنفسه، إذ وضع الشيء في غير موضعه، فقد كان أليق به أن يكون شاكرا لتلك النعم، متواضعا لربه، لا أن يكون كافرا به، منكرا لما جاء به الوحي، وأقرته جميع الشرائع.

"ولئن رُدِدتُ إلى ربي لأجِدَنَّ خيرًا منها مُنقلبًا.."

أي ولئن كان معاد ورجعة إلى الله ليكوننّ لي هناك أحسن من هذا الحظ عند ربي، والذي جرّأه على هذا الطمع وعلى تلك اليمين الفاجرة - اعتقاده أن الله إنما حباه بما حباه به في الدنيا لما له من كرامة لديه، ولما فيه من مزايا استحق بها أن ينال ما نال.

"قال له صاحبه وهو يحاوره أكفرت بالذي خلقك من ترابٍ ثُم من نُطْفةٍ ثُم سوَّاكَ رَجُلًا؟.."

أي قال له صاحبه المؤمن واعظا وزاجرا عما هو فيه من الكفر: أكفرت بالذي خلقك من التراب؟ إذ غذاء والديك من النبات والحيوان، وغذاء النبات من التراب والماء، وغذاء الحيوان من النبات، ثم يصير هذا الغذاء دما يتحول بعضه إلى نطفة يكون منها خلقك بشرا سويا على أتم حال وأحكمه بحسب ما تقتضيه الحكمة - فهذا الذي خلقك على هذه الحال قادر على أن يخلقك مرة أخرى.

والخلاصة - كيف تجحدون ربكم، ودلالة خلقكم على وجوده ظاهرة جلية يعلمها كل أحد من نفسه، فما من أحد إلا يعلم أنه كان معدوما ثم وجد، وليس وجوده من نفسه. ولا مستندا إلى شيء من المخلوقات، لأنها مثله، وقد أشار إلى ذلك بقوله: "لكنَّا هو الله ربي": أي لكن أنا لا أقول بمقالتك، بل أعترف بالوحدانية والربوبية وأقول هو الله ربي، "ولا أُشْرِكُ بربي أحدًا..": فهو المعبود وحده لا شريك له.

وفي هذا تعريض بأن صاحبه لما قال بعجز الله عن البعث (وما أظُنُ الساعةَ قائمة) فقد جعله مساويا لخلقه في هذا العجز، وإذا أثبت المساواة فقد أثبت الشريك.

"لولا إذ دخلت جَنَّتك قُلت ما شاء الله لا قُوَّةَ إلا بالله..": وهلا إذ أعجبتك جنتك حين دخلتها ونظرت إليها - حمدت الله على ما أنعم به عليك، وأعطاك من المال والولد ما لم يعط غيرك، وقلت: الأمر ما شاء الله، والكائن ما قدره الله، ليكون ذلك منك اعترافا بالعجز، وبأن كل خير بمشيئة الله وفضله، وهلا قلت: لا قوة إلا بالله، إقرارا بأن ما قويت به على عمارتها وتدبير أمرها فإنما هو بمعونة الله وتأييده.

***
الحمدُ للهِ الذي أَنزلَ على عَبْدِهِ الكِتابَ ولَم يَجْعَل لهُ عِوَجا

الثلاثاء، أكتوبر 29، 2013

الانتشاء..

*يكتب استيتس على الفيسبوك، ويضغط Post..*
وينتظر..
..
..
.
.
Moh'd Kadi El-Brince liked your status
.
.
.
Jerry Benjamin Franco liked your status
.
.
.
ميادة الحناوي commented on your status : إيه الروعة دي، شكرًا بجد
.
.
*يبدأ الانتشاء بالنفس، ويعلو حظَّها وينتفِخ ذاتيًا..*
..
..
يترُك الفيسبوك قليلًا، ثم يعاوِد فتح الأبليكيشن من على الموبايل، ينظُر على الكرة الأرضية أعلى اليمين فيجد رقم 8 مكتوبة، فينتشي ويسعَد، فيفتح فيجد:

ميادة الحناوي shared your status
Amr Shukarelli liked your status
عبد الستار محتار commented on your status: شكرًا أخي الكريم، دماغك ألماظات!
Balotelli Mango Halabessa shared your status

فيُعجَب بنفسِه، ويظُن في نفسِه غير ما فيها تمامًا، ويفكِّر هل يعلق الآن أم ينتظر حتى يفرغ معجبيه من التعليق على كلامِهِ - بالإعجاب طبعًا -، ثم يعلق عليهم: شكرًا، لمجاملتكم الرقيقة.

ولكنه يظن في نفسِه أنها ليست مجاملات، وإنما هو تعبير عن بعضِ ما به من حِكمة وخبرة السنين..!

وهنا يترسَّخ لديه أنه عليه أن يعلِّق على كل ما يجري في البلاد وإن حدث فيها ما لا يفهم فيه مُطلقًا استعان بكلماتٍ لا يفهمها كلها ممن يتكلمون فيه، ويُصر على أن ينضَم لأيٍّ من الرأيين ليدافع عنه..

مع أنه في الواقع،

- مش لازم تقول رأيَك في كل حاجة..
- الأدهى بقى، Guess what?: مش لازم يبقى لك رأي فيها أساسًا؟! علشان انت مش الخبير العالمي الحكيم الدولي المُطلق اللي بيفهم في كل حاجة! ممكن تحصل حاجة حواليك متبقاش فاهمها.. فإيه رأيك متعلَّقش غير على اللي بتفهم فيه؟! إيه رأيك؟!
- إيه رأيك تقتنع إن الاستيتس على الفيسبوك زيَّها زي الكلام بالضبط اللي خارج من لسانِك، يعني هتتحاسب عليها زي ما بتتحاسب على كل كلمة بتقولها.. ده الاستيتس ولا التويتة على الفيسبوك أمرها أسخَم عشان بتنتشر في الوسط كالنار في الهَشيم، على الأقل الكلمة اللي بتقولها لواحد ولا اتنين.. فلو كنت بتفتي أهو على الأقل الموضوع مُتدارَك، إنما التويتة ولا الفيسبوك ده مصيبة.. خاصةً بقى لو كان لك فولورز كتير، وفريندز كتير.. فاللبسة هتكون كبيرة.
- وعامةً أهي فُرصة يعني نشوف بعض بقى، ونعيش الحياة على حقيقتِها كده، لما نعوز بعض نتكلم على التليفون مثلًا، لما نحب نتقابل ننزل نتقابل مش نكتب post على الـ Wall عند بعض..

----
#موجهة_بافترا
#يا_ترى_هتسنى_لايكات_للاستيتس_أنا_راخر
#كام_لايك_وشير
#حرام_أن_ترى_بوست_لي_وما_تضغط_لايك

معلم مؤثر (6) - الشيخ عبد الوهاب التاجوري رحمه الله

أمير مقرأة مسجد الخليل إبراهيم (مسجد نادي الطيران) من بعد صلاة الظُهر، كان يقرأ القرءان بالقراءات كلها، وتعلم على يديهِ كثيرون كيف يقرءون كتابَ الله تعالى.

تعلم أبي على يديْهِ اتقان القراءة، وكان يُحب الاستماع لقراءة والدي ويُدقِّق له في تصحيح القراءة بشكلٍ يفوق المُعتاد، فقد كان يفرِّق بين من كان يجيد القراءة ومن كان في بداياتها.

كان ليِّنًا في دعوتِه ورقيقًا في كلامِهِ مع الناس.

كان الناس كلهم يحبونَه،

كان لا يترك صلاة الجماعة في المسجد رغم ظروفه الصحيَّة وكِبَر سنِه..

الشيخ عبد الوهاب التاجوري رحمه الله تعالى رحمةً واسعة، جعله اللهُ سببًا ليتعلم كثيرٌ من خلقِه كيف يُقرأ كتاب الله تعالى. وكان من أجمل الذكريات حينما كنت أسمعه إذا قرأ القرءان بقراءة غير قراءة حفصٍ عن عاصم، فتسمع القرءان كما لم تسمعه من قبل، ويشير إلى بعض أحكام القراءات الأخرى للناس ليعلموا أن كتاب الله يُقرأ بقراءات غير حفص عن عاصم. فيعلم الناس لما يكونوا يعلمونَه عن كتاب ربِّهم.

حزن المسجد كثيرًا لوفاة الشيخ عبد الوهاب، فقد كان يكنُ له الجميع الحُب والعِرفان وجَليل الاحترام.

#معلم_مؤثر

معلم مؤثر (5) - معيد تانية ميكانيكا

كان يبذل قصارى جهده أثناء سكاشن مادته، وإذا قصدته يفهمك حاجة في أي وقت برة أو جوة لكلية ميتأخرش أبدا. كان بيعمل لنا مراجعات قبل الامتحان لمادته في بيت أي من الزملاء ويسهر معانا مهما طال الوقت وفي النهاية يرفض تماما ياخد أي مقابل مادي. كان رافض مبدأ إنه يدي دروس خصوصية في مادته رغم إنه لو كان عمل كده كان ممكن الدفعة كلها تروح تاخد عنده، لكنه كان بيقول إنه لا يجوز يدي دروس خصوصية عشان العقد اللي بينه وبين الكلية يمنع ده وبالتالي حرام يدي دروس بالمخالفة لذلك. وفوق ده كله إنسان قمة في الأدب والاحترام وعفة اللسان مهما زاد الضغط عليه. يحكم عقله في كلمة قبل أن ينطلق بها لسانه.

هو حبيبي وجاري.. مش هقول اسمه، بس هقول: جزاك الله عنا خيرا كثيرا

#معلم_مؤثر

معلم مؤثر (4) - الحاج جعفر

كانت مقرأته لا تنقطع بفضل الله تعالى عن ميعادها من المغرب للعشاء بمسجد يوسف الصحابي. وتعلم على يديح كثير من الناس كيفية قراءة القرءان - منهم والدي - وكان يصر على حضور المقرأة حتى أواخر أيامه رغم تقدمه في السن وتعبه.

وكانت هذه المقرأة لا تتوقف حتى في رمضان إذ كانت تقام من العصر للمغرب. ومع كل ختمة كان أحد الحاضرين بالمقرأة يدعو والناس يؤمنون.

ظل الحاج جعفر أمير مقرأة يوسف الصحابي - المغرب العشاء - حتى توفاه الله فخلفه الحاج سمير قريطم وظل أميرا لها حتى توفاه الله كذلك.

نسأل الله لهما الرحمة والمغفرة، وأن يجزيهما عنا خير الجزاء.

#معلم_مؤثر

الأربعاء، أكتوبر 23، 2013

معلم مؤثر (3) - معيد الثيرموديْنامِكس

ممكن تحسب الكفاءة إنك تقول: اللي عملته / اللي ممكن يتعمل، ودي نظرية موجودة.. لكن النظرية الأدق، إنك تقول إن الكفاءة: اللي عملته / اللي كنت تقدر تعمله.

وانت هتتحاسب قُدام ربنا على كنت تقدر تعمله ومعملتوش، يعني مش هتتحاسب على غزو العراق إنك إزاي محرّكتش الجيوش لنُصرة العراق من الاحتلال الأمريكي، لكن هتتحاسب: إيه اللي كان ممكن تعمله للعراق وقت الحرب، ومعملتوش!

معيد الثيرمودَيْنامِكس، أولى ميكانيكا.

#معلم_مؤثر

معلم مؤثر (2) - الحاج فاروق حيدرة

انت عندك الفاء عليها إيه؟.. والكاف عليها إيه؟ تبقى إيه؟

زي ما اتفقنا النون المُشدَّدة والميم المُشدَّدة بنغُنَّها، يلا تاني الآية من الأول..

بمنتهى الصبر والحِكمة، يحبِّبك في تعلم ترتيل القرءان الكريم، وبعد كل عدد من الآيات ممكن يبقى له خاطِرة عنها أو معلومة لغوية سمعها من قبل عنها فيقولها لتتعلم تذوق جمال لغة القرءان الكريم.

صبر عليّ جامد جدًا لأتعلم التلاوة وأنا صغير في الابتدائي، حتى إذا ما بقيت أقرأ القرءان كويس بقى يهتم جدًا إنه يسمع تلاوة القرءان مني، ويعرَّفني على أصدقائه في المسجد ويدخَّلني معاه في مقارئ الكِبار..

وهو والدي ولا فخر :)، الحاج فاروق حيدرة..

ربنا يجازيه عني بمقدار كل حرف أقرأُه من القرءان، والحمد لله كثيرًا أن رزقنيَ الله بأب مثل أبي علَّمني القرءان وأنا صغير فمتعبتش وأنا كبير عشان أتعلم قراءته.. كله فضل من الله..

لو لم يكن لأبي فضل علي سوى إنه علمني قراءة القرءان الكريم لكفاه، والحمد لله هو علمني غير كده كتير أوي وأسأل الله تعالى أن ينفع الناس به..

جزاكَ اللهُ خيرًا عني يا فاروق بيه

#معلم_مؤثر

معلم مؤثر (1) - مستر طارق آدم

مُدرس متمكِّن من المادة العلمية اللي بيدرِّسها، قمة في الأخلاق.. يجبرك تحترمه ولو كنت أعتى مشاغبي مدرستك..

هو مستر طارق آدم، مدرس العلوم وقت أن كنت في المرحلة الإعدادية.. الراجل ده الواحد كان بيستمتع بالحصة بتاعته.. ليه بقى؟

- جامد فحت في الشرح، وبيحببك في المادة حقيقةً يعني..
- علاقته ممتازة بكل الطلبة، محترم ويجبر الجميع إنه يحترمه.. طلبه ومدرسين بالمناسبة.
- شخصية قوية.

أذكر إن في سنة ثالثة إعدادي كان في درس العلوم عن الجهاز التناسلي للرجل والمرأة، ومش محتاج أقول لكو فترة نمو الشنبات عند الولاد دي بتبقى بتلكك عشان تزيط تلاقي الكلام ده وهاتَك يا تريقة طبعًا، فكان بيبقى Challenge حقيقي لكل مدرس علوم في المرحلة دي إنه يدرِّس الدرس ده من غير ما الطلبة يحفِّلوا عليه..

مستر طارق آدم شرح الدرس والفصل كله كان مبلِّم تبليمة غير عادية..

مكناش مبلمين عشان موضوع الدرس خالص لأ، بس عشان كان فلت من الهيصة اللي طبيعي تتعمل في شرح درس زي ده.. لا أخفي عليكم، العيال تقريبًا كانت مستنية الدرس ده من أول السنة تقريبًا عشان تحفِّل فيه، ولكن بقدرة فائقة أحبط مستر طارق محاولة الزياطة دي بمنتهى البراعة..

بصرف النظر عن الموقف ده تحديدًا، بس الراجل ده فعلًا من أكثر الناس المحترمة اللي الواحد عرفها في حياته، وإن شاء الله أفضل فاكر له دائمًا فضله عليّ وعلى غير من العيال إنه كان معلم "محترم".

جزاهُ الله عنا خيرًا كثيرًا، وربنا يجعل العلم اللي درِِّسهولنا في ميزان حسناته

#معلم_مؤثر

الاثنين، أكتوبر 07، 2013

إِلفُ الدم!

بدأت أشُك أننا نعرف معنى فقدان حياة شخصٍ ما مما أرى من ردود الأفعال من أشباه بني آدم الذي تحولوا إلى مسوخ، يرضون بقتل البشر وإن لم يُعرَف يقينًا أهُم بريئون أم مذنبون.. يستسهِلون قتل الناس وفي داخلِهم يقولون: "خلينا نِخلَص منهم".

دعني أوضِّح لك يا من فقد أي نسب لبني الإنسان ماذا يعني "فقدان إنسان حياته بغير حق"، يتحول المرء لاسم ينتاقله أصحابه بين بعضِهم البعض، وقد يكون لمن قتل أبٌ وأمٌ سينتحبون عليه ما يتبقى من عمرهم حزنًا عليه.. قد يكون له ذرية: يُتِّموا.. فقدوا أباهم! يا من استسهلت تفويض قتلهم، ويا من استمتعت بالرقصِ على دمائهم، ويا من ناشدت سيسيكَ بنحرِهم!!

هل يبقى جميلٌ في أي أرضٍ إذا ما استحل بعضُ أهلِها دمَ البعضِ الآخر؟!

هل تبقى أي إنسانيَّة بريئة في نفوسِ من لا يُنكر قتل الناس في الشوارع مجاهرين؟!

إن الدماءَ التي تُزهَق بغير حقٍ ستظل لعنةً على سافكيها، وعلى من بارك سفكها..

فإن لم يكتب ربُ العزَّة قصاصًا لها في الحياةِ الدنيا، فسيكون القِصاص في اليومِ الآخر على رؤوسِ الأشهاد!

سيأتي الشهيد - بإذن الله - يقول: يارب، سَل هذا، فيم قتلني؟!!



***

إن الحُزنَ على من نحتسبهم عند الله شهداء لا يكون لقلقِنا عليهم، بل لألم الفراق، وللشفقةِ على أهاليهم، أما هم - أي الشهداء - فهم بين يديْ الرحمنِ جل وعلا، هو أرحم بهم منا، وهم إن كانوا من أهلِ الجنة - نسأل الله أن يجعلها مثواهم - فهم حتمًا في أسعدِ حال، ولا يأبهون لهذه اللعاعة التي نعيشها بكل قسوة هاهُنا!

غير أن الفرد منا، ستظل في قلبِه غصةٌ أبدَ الدهر، قد ينسى مع الأيامِ الأحداثَ بأسمائِها، ولكن الأثرَ الذي تتركه فينا هذه الأيام لا أظنه سينجلي تمامًا إلا بقصاصٍ عادل يرتدع به الظالم ويخضع فيه الشقيّ للحق.




السبت، أكتوبر 05، 2013

40 سنة نصر أكتوبر، إيه بقى؟!

 
 
طب بعد أربعين سنة من أكتوبر اللي انتصرت فيها مصر على إسرائيل؛ النهاردة شايف مصر فين وإسرائيل فين؟ مين اللي كسبان دلوقتي يا ترى؟!! يا ترى؟!!!

هي العبرة بالانتصار في معركة حربية من أربعين سنة فاتت؟ ولا العبرة بوضعنا دلوقتي اللي هو تحت ضرسهم؟

إحنا ولا حاجة في العالم.

فوقوا بقى حرام!

الجمعة، أكتوبر 04، 2013

قِف للنشيد ووفِّهِ التبجيلا!!

 
بخصوص موافقة الناس اللي قاعدين في مجلس الوزرا على القانون الذي يجرم عدم الوقوف للنشيد الوطني يتبادر إلى ذهن الفرد منا بعض الأسئلة ذات صلة بالموضوع،

- هل يا ترى الوقوف مُلزم وواجب أم أنه مُستحب عند معالي جناب اللي جابوهم؟ (*)
- هل يا ترى يُرَخَّص لمن لديه عُذر كأن تكون رجله في جبيرة - زي حالاتي حاليًا -؟
- هل يا ترى هذا التشريع عام وشامل؟ يعني هَب مثلًا إني قاعد في مطعم مؤمن.. لا بلاش مؤمن.. هَب مثلًا إني قاعد في كافية سيلانترو مثلًا، وبعدين أصاب مدير الكافية حالة من الوطنية الغير المتوقعة فشَغَّل النشيد الوطني - الذي لحَّنه العبقري سيد درويش رجاء مراجعة سيرته الذاتية - ، هل يتحتَّم عليّ وفقًا للقانون إني أقوم أقف؟
- هل للوقوف هيئة معيَّنة؟ (انتباه، رفع اليدين للتحيَّة، .. إلخ)
- ما هو تعريف النشيد الوطني للبلاد؟ هل سَيُذكر lyrics النشيد في القانون؟ الحقيقة أقترح ذلك خاصةً إن الشعب المصري ميعرفش كلمات هذا النشيد العظيم؟ حتى ميصَحِّش عشان مصطفى كامل حتى.. لأ مش ده.
- كيف أتصرَّف إذا ما سمعت أحد المواطنين بجانبي يزدري النشيد الوطني؟ هل أنبِّهه إلى ما فعل، أم أستخدم حقي المخوَّل إلىّ حسب قانون الضبطيَّة القضائيَّة للمدنيين؟

----------------------

(*) اللي جابوهم هنا تعني اللي جابوهم في السلطة، أي القوات المسلحة المهيبة الرَّكينة اللي المفروض لا تُستجوَب ولا تُسأل وإن الهدف بالنسبة لها إنه محدِّش يجيب سيرتها ولا سيرة قائدها العام وذلك بحسب المقطع المُسَرَّب/المتسرَّب للفريق السيسي وزير الدفاع والقائد العام للقوات المسلحة والنائب الأول لرئيس مجلس الوزراء وحامي حِمى مراجيح مولد النبي.

#عالم_تافهة
#كنتم_نفعتوا_نفسكو

الخميس، سبتمبر 26، 2013

البتاع المُعيَّن هايص!

 
حُق للناس إنهم يعترضوا على إعلان مرسي اللي حصَّن فيه قراراته رغم إنه رئيس منتخب إلا إن ده ميدِّيلوش الحق يغير النظام العام ويضفي قُدسيَّة على قراراته، وهو نفسه قال إنه الإعلان الدستوري ده كان أبرز أخطاءه.

إنما الحلو بقى في اللي مبيعترضوش على أي قرارات يطلَّعها البتاع اللي متعيَّن على دبابة ده ولو كان فيها إهدار لكل الحقوق المتعارف عليها بقالها سنين.. عدلي منصور طلع قرار بإلغاء السقف الزمني للحبس الاحتياطي، يعني عمر وعريني وغيرهم ممكن يفضل يتجدد لهم الحبس الاحتياطي كده لما لا نهاية!

يعني بتاع مش منتخب وجاي على ضهر دبابة وكمان بيطلَّع قرارات تاخد من حقوقك الإنسانية يا مواطن وانت عامل فيها من هولندا!

ناس تعشق اللي يرقعها صحيح!

ربنا يتولانا برحمته.

الثلاثاء، سبتمبر 17، 2013

في المرأة!



"المرأة تساوي الرجل في كل شئ" أكذوبة كُبرى وفي كثير من الأحيان يُضَل بها الكثيرون تحت دعاوي "الإنسانية" وغيره، في حين أني واقعًا أراها مخالفة للفِطرة والواقع وإن كان تحقيق المساواة أمر وارد.

بمعنى أني أرى أن المرأة تكافئ الرجل تمامًا، فهي تقوم بأشياء لا يستطيع هو القيام بها في الحالة السوية، وكذلك فإن الرجل يقوم بأشياء لا تستطيع هي القيام بها في الحالة السوية.

ماذا أعني بـ "لا تستطيع/لا يستطيع في الحالة السوية"؟

يعني يمكن للمرأة أن تقوم بما يقوم به الرجل وبكفاءة عالية ولا يُعد ذلك أمرًا شاذًا عليها، ولكن يسبب ذلك خللًا في المجتمع لأن الدور الحقيقي المنوطة هي به تأثر سلبًا.

وبالتالي فإن القول أن المرأة لا يمكنها القيام بمهام الرجل وأنه لا يمكن القياس على حالات شاذة للمرأة تفوقت فيها فيما يعمل به الرجل (مثال: مارغرت ثاتشر أو شجرة الدر أو حتشبسوت) هو قول مُعتل لديّ ولا أقيم به حجة. لأننا نعيش واقعًا نجد فيه المرأة تقوم بأعمال الرجل كما يقوم هو ولكن ما أريد إثباته هنا أن تقمُص شخصية المرأة للرجل يحدث خللًا بالمجتمع لأن دورها الأساسي تأثَّر سلبًا.

والعكس بالعكسِ.

ثم أني أرى كثيرًا من الحركات النسائية Feminists غير متسقة مع نفسها فيما تدعو إليه، يعني كثيرًا منهن يسوِّقْن لمساواة المرأة بالرجل أن تكون مثله تمامًا، حتى أن كثيرًا منهن يتعمَّدْن لباس لبس الرجل والتعامل كما الرجال. في الحقيقة هذا أمرٌ فيه تناقض، لأنه هذه الدعاوي تحمل في طياتها إعترافًا أنه: "من أجل القيام بأعمال الرجال والمساواة الكاملة معهم علينا أن نكون مثلهم، وبالتالي لكي نكافئ الرجل علينا أن نكون رجالًا نحن الأخروات.. يعني مواصفات القيادة في المجتمع يجب أن تكون ذكورية!"

وفي الحقيقة هذا انتقاص من المرأة، لأن المرأة مرأة، لا يمكن أن تساوي الرجل. وكذلك الرجل لا يمكن يساوي المرأة. بل تتزن العلاقة أن يكافئا بعضهما البعض، فيتحمَّل كلٌ منهما عبئًا مختلفًا عن الآخر وإن كان هدفه الأسمى في النهاية واحد.

إنما خلق الله الرجل والمرأة ليتكاملا لا ليتناحرا في هذه الحياة.. قناعتي أن المنافسة الحياتية بين الرجل والمرأة هي أمر مُبتدَع ولا أصل له في الفطرة الإنسانية. وإن كان يجمعهما تنافسٌ فهو في سبيل الله ورضوانِه.

واللهُ أعلم.

الاثنين، سبتمبر 16، 2013

رأيي في اعتصام المترو (وما يشابهه من أفكار)



تعودت أن أقيِّم الأمور بنتجائها، فتكون الإجابة على سؤال: ما المرجو؟ هي الفيصَل - نوعًا ما - فيما أنوي فعله، ومن هنا فإنه ومع كل فعالية تمُر بها الثورة أسأل نفسي هذا السؤال: ما المرجو من هذه الفعالية؟ لماذا؟ وأستنتج من هنا قرارًا قد يحتمل الصواب وقد يحتمل الخطأ.

بخصوص اعتصام المترو، فالفكرة - حسبما فهمت - كانت تعتمد على الآتي:

- ازدحام شديد جدًا بالمترو يترتب عليه شلل عليه مروري على سطح الأرض.
- ربكة في خط المترو، خسائر لشركة إدارة المترو.
- تعسيف لحركة المواطنين الطبيعية،

وكان الهدف النبيل من ذلك هو:

- شل البلد،
- التأثير سلبًا في الاقتصاد،
- انهيار الحُكم (أي الانقلاب).

بالتأكيد لم يخطط أصحاب الفكرة أن يكون يوم اعتصام المترو هو الذي سيقضي على الانقلاب ولكن لعلهم فكروا أنها خطوة على طريق إسقاط الانقلاب.

***

ما شغل تفكيري هو أن عقلي رفض الاقتناع أن مثل هذا التصرف سيؤثر سلبًا على استقرار الحكم للانقلابيين، يعني هب أن الاعتصام قد نجح وشُلت بالفعل حركة المرور وانهار المترو والاقتصاد كذلك، كيف سيؤدي ذلك بأي سبيل إلى زعزعة حكم الانقلابيين؟ بل على العكس أرى أن الفكرة ستشد من عضدِهم وتثبت لدى العامة أننا ننشُدُ هدمًا لا بناءً، فضلًا عن أن الهدمَ الذي ننشُدُه لا يأتي في سبيل إقامة بناءٍ عادلٍ فيما بعد. لأن الحكاية لا تتعدى تضييق على مصالح العامة لن يُمَس بسببه أصحاب الانقلاب.

سيظل الحكم في مخلب الانقلابي حتى لو انهار الاقتصاد بكاملِه، ولن يؤدي انهيار الاقتصاد إلى انتفاضة الكتلة الصامتة المؤيدة باطنًا لحكم الجيش، لأنه في قرارة نفسِها هي تعلم أن سبب زعزعة الحكم هو تصرفات "الإخوان" لا حكم الجيش، فضلًا عن أن الزن على الأذن أمر من السِحر، فعلى الرغم من الفشل الاقتصادي لحكومة البِبلاوي حتى الآن - بسبب السياسات الحاقنة العاجلة لا بسبب مسيرات مناهضي الانقلاب - إلا أن المواطن العادي لا ينسب الفشل إليهم، بل يصدقهم في كل ما يقولونه بواسطة أبواقهم الكاذبة عن إرهاب الإرهابيين في سيناء وعن بطولات الجيش العرمرم في صد هذا الإرهاب في حين أن حقيقة ما يحدث من سيناء - بحسب ما يصلنا من المراسلين المستقلين هناك - أن الجماعات الجهادية التكفيرية الحقيقية لا يمسُها السوء بينما يضارّ أهالي سيناء الذين لا ناقة لهم ولا جمل مما يحدث.. المواطن العادي لا يعرف ذلك: المواطن العادي يصدق إعلام الجيش مهما قال له، حتى أن قطاعًا واسعًا منهم صدقوا وجود السلاح الكيماوي في رابعة وقت الاعتصام..

حسنًا، نحن لا ننشُدُ المواطن العادي فهؤلاء لا تُقام عليهم الثورة..

إذًا، ما المرجو من الفكرة؟

إذا كان كيان الحكم الانقلابي لن يهتز، وإذا كان الإعلام سيسوِّق للفكرة أنك تتعمد إيذاء الوطن، وإذا كان المواطن العادي لن يستجيب إليك لأنك ضيَّقت عليه حركته الطبيعية في اليوم، وإذا كانت الفكرة لا تسوِّق لنفسها إعلاميًا - لأنها اعتمدت على كتم الهتافات المعادية للانقلاب والاعتماد فقط على محاولة شل حركة المرور - فما المرجو إذًا من مثلِ هذه الأفكار؟

نفس الكلام عندي ينطبق على فكرة: "العصيان المدني" أو "الاضراب"،

رأيي أنه إذا لم يكن لديك زخم شعبي ورغبة حقيقية في العصيان المدني فإن ما تفعله لا ينتج شيئًا غير تعريض الفئة المناهضة للانقلاب إلى الخطرِ البيِّن، لأنه سيُحصروا بدقة وقتها، دعنا نتذكر إضراب السادس إبريل في العام 2008 وقت حكم مبارك وقت أن كان جُل الشعب المصري يلعن السرقة والفساد، وقتها: على المستوى العام، فشل الإضراب.

أعلم، أن إضراب 6 إبريل سمَّع بقوة في ثورة يناير فيما بعد، ولكن للأسف: الحال غير الحال الآن، لأنه علينا الاعتراف أن الشعب المصري منشق، ليس الكل مع الانقلاب طبعًا، ولكن قطاعًا كبيرًا منه كفر بالثورة وبالحرية ومنهم من كفر بالكرامة الإنسانية، وبالتالي: فإن صدى الإضراب أو العصيان المدني اليوم لن يلِجَ بنا إلى إنهيار لنظام حكم الاستبداد الحالي، وإنما سنضيِّق الأمرَ علينا - كرافضين للانقلاب - أكثر وأكثر، وسيعلو نجم الاستبداد والقمع أكثر فأكثر.

ختامًا أقول أن هذا اجتهادي، يحتمل الصواب ويحتمل الخطأ، وأسأل الله تعالى أن يهدينا الحق ويرزقنا اتباعه إنه وليُ ذلك والقادر عليه.

الخميس، سبتمبر 12، 2013

بيوت الله، وأوقاف الحكومة! (مسجد يوسف الصحابي)

مسجد يوسف الصحابي بالنسبة لي مش مصلى بصلي فيه وأمشي، مسجد يوسف الصحابي يعني:

- أحسن صُحبة بإذن الله تشوفها هناك،
- مقرأة والدي بعد صلاة الجمعة هناك،
- درس مصطفى حُسني كل يوم أربع،
- درس فاضِل سُليمان ما بين التراويح،
- الأنشطة،
- العيال اللي بتجري تلعب وتتمرمَغ على أرضِه،
- الشيخ محمود بتاع زمان الله يمسِّيه بالخير بقى،

ساءني جدًا لما رُحت أصلي العشاء النهاردة هناك وشوفت الورقة المعلقة برَّة بنفسي: إن المسجد هيتقفل بعد الصلاة بنصف ساعة ونرجو الالتزام "منعًا للإحراج".

قلبي اتقبض وأنا داخل ألحق الجماعة، مع قلة الضوء اللي فيه حسستني إنه الجامع اتغيَّر ومبقاش مسجد يوسف الصحابي اللي الواحد اتعوَّد عليه..

معقولة يبقى حاله كده بعد ما أنواره كانت بتملا مصر الجديدة كلها،

ويحزنك إنه عمره ما كان له موقف معادي للسُلطة بالعكس، مافتكرش إنه جِه فيه إمام إلا وكان مفاد خطابه إنه نهدِّي اللعب ونعمل على إصلاح أنفسنا والدعوة الحسنة وغيره..

ليه يسدوا في وشوش الناس بيوت ربِّنا؟!

هم ليه مُصرِّين يصنعوا الإرهاب بإيديهم؟!

الأربعاء، سبتمبر 11، 2013

بيوت الله، وأوقاف الحكومة!

أذكر من كام سنة كده أيام حكم موباريك كنت في التجمع الخامس أنشد مسجدًا للصلاة، وصلت للمسجد بعد ما الصلاة كانت خلصت ولما شوفت إن المسجد مقفول تمامًا كنت في غاية الضيق.

حسيت إن الناس بتقفل في وشَّك بيوت الله وبتمنعك من الصلاة،

مهما كان تبريره لكده، في النهاية وقع ده عليّ كان: بقفل في وشك باب بيت الله.

اليومين دول ومع القرارات اللي أصدرتها وزارة الأوقاف بناءً على التعليمات الأمنية، زي: منع جمع التبرعات ومنع الأنشطة ومنع المقارئ تحت دعوى إن المساجد "للصلاة بس!"، افتكرت جدًا اليوم ده، وحزنت لتضييق مفاهيم الناس، وتحويل الدين لطقوس وبس! وتفريغ فكرة "المسجد" من حقيقتها، للمسجد للصلاة أيوة، بس هو كل حاجة تانية.

المسجد كل حاجة: صلاة، وتجمعات لفعل الخير، وتجمعات لمناقشة أي حاجة في البلد، ومجالس علمية (شرعي وحياتي)، وتواصي بالحق و.. و..

لما أعرف إنه من كام يوم مسجد يوسف الصحابي (اللي عمر ما تولى إمامته حد يهاجم السلطة) أعلن إنه نظرًا للظروف الأمنية الجامع هيتفتح قبل الصلاة بنُص ساعة وبعدها بنُص ساعة ووقف كل الأنشطة اللي كانت فيه يبقى حرام!

إيه ذنبنا إن خطابك عقيم وإن الناس عارفة إن روح الإسلام مش في اللي بتقوله، فالناس بتجتهد في الجامع عشان ترضي ربنا.. تقوم عشان تجبرها على سماع اللي بتقوله وبس تمنع اللي بيعملوه بشكل أمني!!

لو خطابك اللي ع المنبر فيه حقيقة الإسلام كان الناس راحولك وقصدوا رضا ربنا في اللي بتقوله، لكن عشان مش دي الحقيقة وفيما يبدو إنك عارف الكلام ده، فببتعامل "أمنيًا" مع بيوتِ الله وبتمنع الأنشطة اللي عامله حركة للناس في سبيل الله.

العقاب الجماعي من سِمات الدول الديكتاتورية الهشَّة اللي مش فالحة غير بالحديث بالسلاح وفرض رأيها بالقوة الأمنية، لكن انت لو حقاني تواجه الإرهاب بالقانون - لو وُجد - وتسيب اللي بيشتغل يشتغل.

المساجد بيوت الله.

ربنا يتولانا برحمته.

الأحد، سبتمبر 08، 2013

جاهزون لأي شئ، حصل اللي حصل

مع تقدم الزمن ابتداءً من يوم 28 يناير 2011 وأنا أتبلد تمامًا تجاه ما أسمعه من أخبار فيما يخص السياسة أو الدولة أو الإنسانيات في هذا البلد بصفةٍ عامة، وكانت أقصى حالات الصدمة والترقب - وحقًا أقول - حينما رأيت صور ولافتات حسني مبارك تُقطَّع وهي أعلى المباني الحكومية، وقتها شَعُرت أن حاجزًا حقيقيًا داخلي انكَسَر، وأنا لا أخجل من الاعتراف بذلك. قبل اندلاع موجة 25 يناير كنت لا أتصور أن التغيير في مصر سيأتي بهذه الطريقة، أو بالأحرى لم أتخيل أن المظاهرات ستنجح في إزاحة حسني مبارك العتيد من كرسيِّه المغرِّي على الرغم إنه معاه كل أسباب البطش والتسلُط. وكنت أظن أن الحالة التونسية لا يمكن قياسها على مصر بأي حال، لأني لم أكن أتوقع أن الجيش المصري سيحذو حذوَ الجيش التونسي في هذا الصدد فيرفض ضرب المتظاهرين ويُجبر الرئيس على التنحي.

غير أنه مع تقدم الزمن يتبيَّن إنه أصلًا مُدخَلنا في الأمر محدود للغاية، وأنه في النهاية سواء كان هياج الشارع مُنَظَّم أو غير مُنَظَّم فإنه يُستَغل من قبل الأطراف التي تلعب السياسة في البلاد من قديم الأزل.. وأدَّعي أنه حتى هذه اللحظة لا يمكن الجَزم بـ "أين الحق الأبلج؟" ولكن فيما أرى يمكن التعرف على كثيرٍ من "الباطل اللجلج"، والآن لدي قناعة - قابلة للتغيير - أننا مجرد طرف في معادلة كبيرة جدًا، وأننا لسنا طرفًا إيجابيًا مُبادرًا، بل يخدِّم على أطماع آخرين في الوقت المناسب.

ثم أني وبتتابع الأحداث، من استفتاء شرخ الشعب المصري إلى انتخابات البرلمان إلى حل البرلمان (أين البرلمان؟) إلى انتخابات الرئاسة وظهور قُطبَيْ المسرح المصري كفيلم طيور الظلام وحتى انقلاب 3 يوليو 2013 وأنا أتبلَّد وأفقد الإحساس بالأمور تمامًا أو أفهم الأمور على حقيقتها نوعًا ما لا أدري.

للحق كنت في غاية الهدوء والاسترخاء بينما كنت أستمع للسيسي وهو يتلو بيان الانقلاب، ولم يكن ذلك من باب تقليل حجم الموقف أو استهانةً به.. ولكن نفسي ألِفَت شألبظات المسرح العام المصري فظهرت حقيقة الدولة المصرية الكُفتويَّة وعِشنا على الحقيقة انقلابًا عسكريًا واضحًا كوضوحِ الشمسِ مُتَلَبِّسًا بنكهة شعبية ذات خلفية فلولية، ومعها حَسني النوايا على كثير من مثقفي السلطة المُنَظِّرين - على كل لون يا حلاوة - على كثيرٍ من نُشطاء الثورة الجعجايِّين على غير ذلك.

وبالمناسبة أنا سعيد بذلك، طالما أن حرقة الدم لن تأتي بنتيجة في كل الأحوال، فأعتقد أنه من الحِكمة فعل ما يُمليك عليك اجتهادُك تبغي به رضا الله وفقط من غير أن تتألم من تقلب الأوضاع في هذا الوطن الحلابِسَّة.

فقط ابكِ على ما كان منك من تقصيرٍ في حق الله، وترحَّم على من مات في سبيل الحق.


طرفة للعبرة | العقد اللولي

طُرفة للعِبرة:

يُحكى أن قرينة الرئيس السابق موباريك ادَّعَت أن عُقدها اللولي قد سُرِق، فهاج القصر كله وشكَّ الكلُ في الكلُ، وكلف الرئيس وقتها وزير داخليته بالبحث عن السارق والقبض عليه، واسترجاع العقد اللولي لحرمِه المصون. 

لم يتجاوز الأمر بعض اليوم حتى وجدته في أحد أدراج الكومود بجانب السرير، فقالت لزوجِها أن: خلاص لقيناه. بعدها اتصل بوزير الداخلية ليُخبره أن العقد اللولي لم يُسرق فلا داعي للالتزام بالأمر السابق إصداره، فكان رد وزير الداخلية:

طب واللي اعترف ده يا فندم هنعمل فيه إيه؟!

الثلاثاء، سبتمبر 03، 2013

وبكرة تشوفوا مصر - (تكملة)

علق الأخ الكريم المهندس حسين أبو سُبيْع على الرسالة السابقة، (وبكرة تشوفوا مصر) فقال (وقد علقت على كلامِهِ بالأحمر):

"ممكن باختصار - غير مُخلّ على فكرة - يكتب : كانت الأحداث بين الخامس و العشرين من يناير إلى الثلاثين من أغسطس حافلةً بالمساخر التي لا يمكن أن تُذكر في كُتب التاريخ ، و إلا ظنّ القارئ بكابتها ذهاب العقل، فعلى سبيل المثال لا الحصر:
- قامت السلطات المصرية بالتحقيق مع حمامة ،و بطة ، و سمكة قرش. (وقيل مع النِمر تشيتوس لأنه خرفش بينما كان القائد العام يرفع البنطلون فظن الحاضرون أن البنطلون فُتئ)
- كيلو البطاطس في عهد السيسي كان سعره دولاراً كاملاً ، بينما كان سعر المانجو في عهد مرسي نصف دولار، علماً بأن أهم أسباب الخروج على مرسي كانت الوضع الاقتصادي الذي وُصف آنذاك بالمتردي.
- قامت الثورة على مرسي بسبب مشكلات الوقود و الكهرباء و الأمن ، و كان الوزراء الثلاثة القائمون على هذه المهام هم وحدهم الباقون في التشكيل الحكومي بعد الثورة!
- لجنة الدستور الذي كُتب في عهد الرئيس مرسي المنتخبة من الشعب على مرحلتين وُصفت بأنها لا تمثل طوائف الشعب ! ،بينما لجنة العشرة المسؤولة عن كتابة دستور ثورة 30 يونيو لا يعلم أحدٌ (حتى جوجل نفسه) عنها شيئاً.
- الفتاة صاحبة قضية كشف العذرية (سميرة إبراهيم) التي اتهمت اللواء (آنذاك) عبد الفتاح السيسي بالمسؤولية المباشرة عن جريمة هتك عرضها، و اعترف هو نفسه بالجريمة، كانت من أشد المؤيدين له و لقيادته للبلاد! (وقالوا أن سِت البنات توافق على ما فعله الجيش على الرغم ما تعرضت له على أيدي الشرطة العسكرية في الواقعة المشهورة)
- تمت محاكمة الرئيس مرسي بالمسؤولية عن مقتل مجموعة من الشباب حول القصر ، علماً بأن عددهم عشرة ، تسعة منهم إخوان! (والعشرة كانوا يعتصمون اعتصامًا مخالفًا للقانون أمام القصر الرئاسي، وفي المقابل قُتل أكثر من ألف معتصم في رابعة ولم يتجرأ أحدهم على طلب محاكمة قاتليهم)
- البلتاجي متهم بقتل متظاهرين ، كان هو نفسه منهم.
- صفحة كلنا خالد سعيد التي كانت وسيلة الحشد الرئيسية لثورة 25 يناير تم ضرب مسؤوليها في ثورة 30 يونيو ، و مع ذلك بقوا مؤيدين لها حتى الثالث من يوليو ، ثم اختفوا تماماً، و اختفت معهم ثوريتهم ، بل اختفت كذلك قضية خالد سعيد ، و أصبحت أمه تُضرب في المحكمة ! (في الغالب الصفحة كانت فوتوشوب)
- أحد التُهم الإعلامية الموجهة للإخوان هي التسبب في إسقاط الأندلس. لعل المقصود هنا كان هو كباريه الأندلس ، الكائن بشارع الهرم ، بجوار "مسرح الزعيم". (نعم وقد قيل في ذلك أن الملك خوان كارلوس قال: سماني أبي خوان على اسم جماعة الإخوان وذلك امتنانًا لهم للدور الذي قاموا به في إسقاط في الأندلس)
- كل الشباب الذين اتهموا الإخوان بخيانتهم في مواجهة العسكر في "محمد محمود" علماً بأن خيانة الإخوان اقتصرت على الامتناع عن المشاركة، قاموا هم أنفسهم بالتواطؤ مع العسكر! (وقد أحال البعض الضربة التي تلقتها سوريا على يد الولايات المتحدة لعدم نزول الإخوان في محمد محمود)

و عند هذا الحد ، انفعل كاتب التاريخ على من يقوم بإملائه قائلاً : يلا من هنا يا بن العبيطة!
"

الاثنين، سبتمبر 02، 2013

وبكرة تشوفوا مصر..

ها هو قد شارف أواخر السبعينيات من عمرِه، هذا الذي كان في العشرينيات وقت ثورات الربيع العربي والأحداث الجِسام، يجلس مستقبلًا البحرَ وقت المصيف، بجانبه التِرمس واللب والسوداني وتشكيلة من مختلف المسليات، بالإضافة إلى زجاجة سفن أب.

يرن جهاز Smart CC الخاص به "بوري بوري، بوري بوري"..

يقول في نفسه: "يــاه، ده الواد حسين، الـ*** ده مش ناوي ييجي بقى"، ويرد على الهاتف:

- إزيك يلا!
- إيزيك يابني.
- إيه يابا، إنجلترا خلاص بالحلاوة دي؟
- يابني مانشستر يابني..
- طب تعالى تِف ع البلد وارجع طيب.
- مانا جاي أنا جاي.. أنا.
- يا إبني انت ليه مش عايز تعترف بقى؟!
- مصر يابني..
- آه..
*ضحك هستيري*
- إزي عيالك وأحفادك يا عم انت؟
- أهو، بصيف مع الواد زياد..
- إزاي العياللللللللل؟
- والله العظيم تسافر ولا تتنيل زي مانتا!
- قشطة، أنا هبقى أنزل مصر كده على 27 سبتمبر..
- طب ابقى لاغيني بقى..
- قشطة، هانزلك أنا والمدام بقى..
- حابيب قلبي!

"تريك"..

يقول في نفسه: "سبحان الله يا أخي، الواد ده.. هممم، ماشي".

يأتيه ابنه زياد ليجلس معه ساعة على البحر، فيرحب به:

- يا هلا يا هلا،
- أبابا :)
- صحيح الواد اسمه إيه ده فين دلوقت؟
- مالك يابابا وبيمتحن :)
- بيمتحن؟ وسايبه جاي هنا..؟ مش كنتو تيجو أما يخلص امتحانات؟
- ما قشطة يخلص هو ويبقى ييجي مع نفسه وأنا أضيع أجازتي ليه؟!
- آه صحيح.. (صمت).. وهو بيمتحن إيه النهاردة؟
- تاريخ.
- هوبا!
- إيه؟
- لا أبدًا، أصل التاريخ ده حكاية تملي لما بتبقى في مناهج الحكومة بتبقى ماسخة ومالهاش علاقة بالواقع.
- مناهج إيه يا حاج؟! دلوقتي بيطلبوا من الولد يعمل Thesis عن الحقبة التاريخية اللي المفروض يدرسها وبيناقشوها معاه، ولو عرف يقنعهم باللي عمله ينجح معرفش مياخدش الدرجة.
- لا يا راجل؟
- زي ما بقول لك كده..
- يعني مفيش مناهج؟ ده إيه السبهللة دي!
- أصلهم لقوا إنه كده كده مناهج التاريخ بيتحلق لها فقالوا الولاد نفسهم كأنهم هم اللي بيكتبوا التاريخ..
- طب والعيال بقى بيجيبوا التاريخ منين؟
- سيرش..
- سيرش آه، جوجل برضو؟
- لأ جوجل مبقاش إنجِن للبحوث العلمية عشان بقى ملهلط وبيعرض أي هبل في الجبل، دلوقتي بقى فيه حاجات موسوعية متخصصة ولها اشتراكات بالدولار.
- وهو مشترك فيها بالدولار؟
- آه.
- إيه؟!
- وفيها إيه؟
- لأ مفيهاش حاجة بس أصلك مش حرامي يعني..
- بالدولار يا حاج بس أسعار رمزية يعني..
- همممم.. ماشي..
(صمت)
"تليفون زياد يرن، روك روك.. روك روك"
زياد يقول متوجسًا:
- أهو خلص أهو؟
- هو إيه بالضبط؟
- مالط خلص الامتحان، ما الأبليكيشن ع الـCC اللي معايا باعتلي ريبورت بيقول لي إنه خلص، أما أخش أشوف عمل إيه؟
- فعلًا؟
- الحمد لله الواد نجح أهو :)
- عرفت منين؟ هو انت عندك الرسالة اللي كتبها واتناقش فيها؟
- لو ع الرسالة ممكن أجيبها، بس أنا عرفت إنه نجح من الـ report اللي بعتهولي الـ app، بس أخش لحضرتك أشوف..
- يقول في نفسه: "تخش فين يا عم انت؟"
- أهو، دي الـ Thesis اللي قدمها، وتعليقهم عليها إنه بحث متميز، ولكن لم فيه قصور بخصوص حُقب زمنية معينة من تاريخ مصر.
- تقدر تعرف أنهي حُقب اللي خفق فيها؟
- آه، ما هم كاتبين: مكنش بحثه كويس بخصوص: فترة ثورات الشعب المصري ضد الاستبداد..
- ما لازم ميعرفش يتنيل يكتب كويس عنهم دي كانت فترة بنت ستين كلب!
- ليه يا بابا؟! ده دي اللي شكلت تاريخ مصر.. يعني مصر قبل 25 يناير، غير مصر بعد 25 يناير..
- وحياتومك انت كمان؟!!! بقول لك إيه؟؟؟!!!! بقول لك إيه؟!!!! أنا مش ناقصك استظراف انت كمان!!!
- فيه إيه بس؟! هي مش مصر قبل ثورة 25 يناير كان يحكمها محمد حسني مبارك اللي عصره اتسم في أواخره بالفساد المالي والإداري، فالشعب المصري طلع عليه في 25 يناير 2011، فانشال في فبراير 2011 بعد ما الجيش اتدخل وحمى الثورة؟
- آه يا قلبي!
- سلامة قلبك يابابا، وبعدين اتعملت انتخابات برلمان ورئاسة، وفاز في الرئاسة مرشح الإخوان اللي قعد يأخون في الدولة فثار عليه الشعب في 30 يونيو فاتشال بعد تدخل الجيش اللي حمى البلد من تآمراته الخارجية ومن جماعته الإرهابية..
- في نفسِه: "ابني أنا اللي بيقول الكلام ده؟!!!"، ثم يهِب فيه:
- بقول لك إيه؟! ممكن تجيبلي هو قال إيه في الرسالة بتاعته بخصوص الكلام ده؟
- حاضر، ثواني وأشوف لحضرتك.. هممم.. ثورة عرابي، ثورة يوليو، همممم.. ثورة 25 يناير.. بيقوللك بقى..
- هات أقرأ أنا،
"ولما كان الحال في غاية البؤس على الصعيد الاقتصادي والاجتماعي والسياسي، ولما كانت كرامة الإنسان المصري لا قيمة لها كما ذكرنا سالفًا، ظهرت دعوات للخروج على الرئيس المصري محمد حسني مبارك، واختير ميعاد 25 يناير لأنه يوم عيد الشرطة التي كانت أداة البطش للرئيس السابق، وبالفعل خرجت أعداد مهولة، ولم يكن لها قائد - حينئذ - ثم تبع ذلك خروجٌ أكبر يوم 28 يناير فيما سُميَ وقتها بجمعة الغضب، فلم يكن أمام الشرطة وقتها غير الضرب في مقتل وبالفعل استُشهِدَ المئات من الشعب المصري العظيم إلا أنه تبع ذلك أعمال حرائق لأقسام الشرطة وكثُرَ السلب والنهب وغابت الشرطة في مشهدٍ غريب لم يألفه الشعب المصري. بعدها تدخل الجيش فأزاح مبارك عُنوةً من منصب الرئاسة وحل البرلمان المُزَوَّر وعطَّل العمل بدستور 71 وكل تعديلاتِه. 
...
...
فكان الاستفتاء الذي فتأ الشعب المصري نصفيْن، وشحذ كل طرف هممه لشيْطنة الطرف الآخر بما فيه وما ليس فيه وذلك بحسب ما اطلعت على وثائق القنوات الفضائية وقتها ومانشيتات جرائد الأحزاب،
...
...
...
ففاز محمد مرسي مرشح جماعة الإخوان المسلمين على نظيرِه الدكتور أحمد شفيق المحسوب على نظام حسني مبارك، ومنذ ذلك الوقت وعاش الشعب المصري فترةً عصيبةً ما بين ضيقِ العيش الاقتصادي وتردي الخطاب الديني وحصرِه في أمور حماسية، وما بين خطاب إعلامي في غاية الرُخص ما بين الطرفين،
...
...
...
... واستجابةً للوضعِ في الشارع، قام الفريق أول عبد الفتاح السيسي وزير الدفاع بانقلابٍ عسكريٍ أزاح فيه الرئيس المنتخب محمد مرسي وعطَّل الدستور المُستفتى عليه..
...
...
يختلط هنا الأمر كثيرًا بين جهات الدولة الرسمية التي أكدت وجود السلاح المكثف باعتصامات رابعة العدوية والنهضة، وبين أنه بعد الفض لم يتم اكتشاف هذه الأسلحة الغزارة التي كانوا يسوقون لها قبل عملية الفض التي قُتِلَ فيها أكثر من ألف مصري على أقل تقدير، وكما وصفت منظمات حقوق الإنسان العالمية وقتها أنه استُخدمت قوة مُفرِطة قاتلة Excessive Lethal Force في الفضّ.
...
...
...
بالاطلاع على مصادر المعلومات المتاحة، يتبين لنا أن أهداف الثورة التي قامت في25 يناير 2011 قُضيَ عليها بالكامل في 3 يوليو 2013 ببيان عبد الفتاح السيسي الذي أزاح فيه مرسي عن السلطة، ليس لأن مرسي كان رمزًا للثورة، ولكن لأنه بإزاحة مرسي عن الحكم تم إجهاض إرادة الشعب المصري في كل الاستحقاقات التي أدلى فيها بصوتِه. ومن هنا، انتكست إرادة الشعب المصري وتيقَّن أن البلاد ليست له.

وقد شهدت مصر تبايُنًا في مواقفها الخارجية تجاه قضايا سوريا و..
.."

الثلاثاء، أغسطس 27، 2013

في حزب النور - تغريدات

1- يا بتوع حزب النور، المادة 219 مش هتجيب الشريعة للحكم.. انت كده بترسخ لدولة القمع والظلم والاستبداد إنها تترسخ، فين الشريعة اللي ف كده؟

2- يا حزب النور اعترافك بالانقلاب هو أكتر شئ هيفشخنا إحنا قبل ما نشوف أصلًا إزاي نطبق الشريعة.. انت ولا حاجة بالنسبة للعسكر غير كونك cover لهم.

3- يا حزب النور انتو مطعنتوش الإخوان بس، انتو فعلًا اخترتوا خندق تاني غير خندق "الحق"، انتو literally فشختونا. ولا هتطولوا منهم حاجة btw يعني!

4- بس من أكثر ما تعلمناه في التلات سنين اللي فاتوا دول.. إنه: والله العظيم: يعرف الرجال بالحق، ولا يعرف الحق بالرجال. لا يعرف الحق بالرجال.

5- إنما فسدت الرعية بفساد الملوك، وفساد الملوك بفساد العلماء، فلولا القضاة السوء والعلماء السوء لقل فساد الملوك خوفا لإنكارهم~ أبو حامد الغزالي

الاثنين، أغسطس 26، 2013

في طلب السفرِ والترحال - للإمام الشافعي (رضي الله عنه)

ما في المقامِ لذي عَـقْــــــــلٍ وَذي أَدَبِ ... مِنْ راحــــةٍ فَـــدَعِ الأَوْطـانَ واغْتَــرِبِ
سافِرْ تَجِدْ عِوَضًـا عَمَّن تُفارِقُــــــــــهُ ... وَانْصَبْ فَإنَّ لَذيذَ العَيْشِ في النَّصــــــبِ
إنّي رَأيت رُكـودَ الـماءِ يُفْسِـــــــــــدُهُ ... إنْ ســاحَ طابَ وَإنْ لَمْ يَجْرِ لَمْ يَطِـــــــبِ
والأسد لولا فِراق الغابِ ما افتَرَسَتْ ... وَالسَّــهْمُ لولا فِراق القَوْسِ لَمْ يَصِـــــــبِ
والشَّمْسُ لَوْ وَقَفَتْ في الفُلكِ دائمــــــةً ... لَمَلَّها النَّاسُ مِن عَجَــمٍ وَمِنْ عَــــــــــرَبِ
والتِّبرُ كالتُّـرب مُلقى في أماكــنـــــــه ... والعـــودُ في أرضِـــهِ نوعٌ مِنَ الحَطَـــبِ
فإن تـغـــــرّب هـذا عـــــَزّ مطلبـــــــُه ... وإن تـغـــــرَّب ذاك عـــــزّ كالذهـــــــبِ

الأحد، أغسطس 25، 2013

المُستَخْلَص..

إذا كنا نعرف يقينًا أن الآخرةَ هي "لا نهاية"، فمهما بلغ طول أجلك، فإن الدنيا ستظل نسبةً للآخرة صفر. وبالتالي فمن سوء التقدير - الذي يصل إلى السفه - أن تضيع وقتك في الدنيا لأجل الدنيا التي هي "صفر" وتُهمل الآخر التي هي "لا نهاية".

وبالتالي، من الحكمة أن تكون كل أفعالك في دنياك للآخرة.. لا تضيِّع جُهدًا فيها إلا من أجلِ الآخرة.

يقول رب العزَّة: "والآخرةُ خَيْرٌ وَأَبْقى".

مشكلة الإنسان أنه لا يقدِّر إلا ما يراه أمام عينيْه، ينغمس في الدنيا التي يعيشها ويدركها بحواسِه الخمسة انغماسًا يجعله يُفتَن بها فيظُن - واقعًا - أنها نهاية المآل وأنها هي الغاية في حد ذاتها، وقد يكون هذا الإنسان مؤمنًا بالله وباليوم الآخِر، فإذا ما سألته عن الآخرة ذكر لك أشراطها وأماراتها وأحداثها تفصيلًا كما حفظ من الأحاديث النبوية ولكن واقعه الذي يعيش به ينافي تمامًا أنه يعمل لهذه الآخرة التي هي الغاية.

كان للشيخ الشعراوي - رحمه الله - قولًا في هذا الصدد يقول: "الدُنيا أهم من أن تُهمل، وأتفه من أن تكون غاية"، وهذه عين الحِكمة، فالقول أن نعيش لله (نعيش للآخرة) لا يعني الدَّروشة والانعزال عن الدنيا وإنما على النقيض تمامًا هو يعني الاهتمام بكل تفاصيل الدنيا ودراسة كل ما بها لأنها هي المعبر للآخرة، فإن أبليت فيها بلاءً حسنًا كان مآلك كما وعد رب العزة في جناتِ الخُلد - برحمته - وإن كان بلاؤُكَ فيها بلاءً خاسرًا كان مآلُك النار أعاذنا الله منها وتاب عليها.

يقول ربُ العزة: "فَمَن يَعْمَل مِثْقالَ ذَرَّةٍ خَيْرًا يَرَه، وَمَن يَعْمَلْ مِثْقالَ ذَرَّةٍ شَرًا يَرَه".

يعني، من متطلبات أن تعيش للآخرة، أن تدرس الدنيا بحذافيرها لتعرف كيف تسعى لرضا الله سبحانه وتعالى في كل منحى فيها!

كيف ترضي اللهَ عز وجل فيما أمر من عبادات؟
كيف ترضي الله عز وجل في تعاملاتك مع أهلِك وأصحابِك وعيالِك؟
كيف ترضي الله عز وجل في طلبِك للرزق؟
كيف ترضي الله عز وجل في مالِك؟
كيف ترضي الله عز وجل في جِهادِك؟
كيف ترضي الله عز وجل وأنت تستخدم نِعمَه التي أنعم عليك بها؟

وبالتالي فعلى الجميع - والكلام لي أولًا - أن نعدل البوصلة، أين تتجه بوصلتنا؟

وعلينا أن نعيد تقييم الأمور، فما كان من أعمالنا يُعمل لغير وجهِ الله عز وجل (فقط لسد الطلب الدنيوي) علينا أن نراجع ونجدد النية ليكون لله وحده، والأمر لا يقتصر كما أسلفت على العبادات وفقط، وإنما في كل مناحي الحياة.

ومن ذلك أن تجتهد عظيم الاجتهاد أن يكون اللهَ غايتك، فلا تكون في موضعٍ يكره الله سبحانه وتعالى أن يراك فيه.. ومن ذلك أن تراعي اتخاذك للأخلاء، ومن ذلك أن تدعوَ إلى الله باللين وبالرِفقِ في القول، وأن تنهى عن المُنكَرِ باللينِ والرِفقِ في القول. فإذا كنت في منصبٍ تنفيذيّ يُمكنك من إقامة حق الله فلتراعي الآخرة في كل قراراتِك، ولا تدَّخِرَ جُهدًا كلما حانت لك الفرصة لاستِعدالِ ما جنح عن الحق ولو كره المنافقون وثبَّطك عن ذلك المثبِّطون.

يقول جل وعلا: "مَنْ كَانَ يُرِيدُ الْحَيَاةَ الدُّنْيَا وَزِينَتَهَا نُوَفِّ إِلَيْهِمْ أَعْمَالَهُمْ فِيهَا وَهُمْ فِيهَا لا يُبْخَسُونَ، أُولَئِكَ الَّذِينَ لَيْسَ لَهُمْ فِي الآخِرَةِ إِلاَّ النَّارُ وَحَبِطَ مَا صَنَعُوا فِيهَا وَبَاطِلٌ مَا كَانُوا يَعْمَلُونَ"

ذلك لأنهم وضعوا الدنيا وريائها فقط نصب أعينهم،

ويقول الله تعالى: "قُل إِنَّ صَلاتي وَنُسُكي وَمَحْيايَ وَمَماتي للهِ رَبِّ العالمين، لا شَريكَ لَهُ وَبِذلكَ أُمِرْتُ وَأَنا أَوَّلُ المُسْلِمين"


علينا أن نتدراس السيرة النبوية العَطِرة، وسيرة أصحاب رسولِ الله (صلى الله عليه سلم)، لنرى كيف كانوا يعملون، ولنعيشَ كما كانوا يعيشون، وأن نتخذ رسول الله صلى الله عليه وسلم قدوةً حسنة كما أمرنا رب العزة في كتابِه: "لَقَدْ كانَ لَكُم في رسولِ اللهِ أُسْوَةٌ حَسَنَةً لِمَن كانَ يرجو اللهَ وَاليَوْمَ الآخرَ وَذَكَرَ اللهَ كَثيرًا".

نريد أن نكون ممن يرجون الله واليوم الآخر، وأن نذكرَ الله كثيرًا. 




الاثنين، أغسطس 19، 2013

الجنود..

يقول رب العزة: "إِنَّ فِرْعَوْنَ وهامانَ وجُنودَهُما كانوا خاطِئين".

***

وكان شيخ الإسلام ابن تيمية فى سجنه بسجن القلعة بدمشق، فجاءه جلاده فقال: اغفر لي يا شيخنا فأنا مأمور. فقال له ابن تيمية: "والله لولاك ما ظلموا"..

***

ويُروى عن الإمام أحمد بن حنبل، أنه حينما كان مسجونـًا في محنةِ خلق القرآن سأله السجان عن الأحاديث التي وردت في أعوان الظلمة، فقال له: الأحاديث صحيحة،
فقال له: هل أنا من أعوان الظلمة؟ فقال له: لا، لست من أعوان الظلمة، إنما أعوان الظلمة من يخيط لك ثوبك، من يطهو لك طعامك، من يساعدك في كذا، أما "أنت فمن الظلمةِ أنفسهم".

الجمعة، أغسطس 16، 2013

دائرة الدم التي لا تنتهي

أنا شايف إن الموضوع قلب إن الناس بتنزل فالجيش يموت فيهم، الناس تنزل فالجيش يموت فيهم.. وحتى القتل بيكون بقلب جامد أوي وأجرأ كثيرًا مما كان عليه القتل فمن قبل، الجيش خلاص حط ضهره للحيط وواضح إن أسلوب المسيرات والاعتصامات مش هيجيب معاه نتيجة لأنه فيما يبدو متغطي كويس أوي برة ومش فارق معاه إن شالله الإخوان كلهم يموتوا ولا طبعًا هيفرق معاه بعد كده النعاج اللي هيعارضوا عشان لعاعات الحكم. فكده الدنيا ماشية في سكة - غير إنها قطران ونيلة - فمش معروف حتى أبعادها.

فهل الصح الاستمرار في النزول والمسيرات؟ ولا لازم يكون فيه تفكير برة الصندوق شوية! دلوقتي الاعتصامات كلها هتتضرب والفكرة إنه الناس نفسها - اللي عايزين الدنيا تخلص وخلاص - مباركين لكل تصرفات الجيش والشرطة من قتل وخلافه، فهل برضو ننزل في اعتصامات بحشود واحنا عارفين إنها هتتضرب وكمان مش هتعمل لنا النتيجة اللي إحنا عايزينها؟!

المرحلة صعبة جدًا، بس عامةً أي حل مينفعش يقبل - في وجهة نظري - بأي من:

1) الاعتراف بالانقلاب.
2) الخروج الآمن للسفاحين.
3) إرادة الناس. يعني أي حل جاي على أنقاض الانقلاب مينفعش ينبني على آثار الانقلاب، لازم نرجع فيه لإرادة الناس عشان ياخد شرعية.

إنما بالطريقة دي، الشباب بيموت.. والجيش والشرطة بيتوحشوا أكتر، والأسوأ المجتمع إنسانيًا بيتبلد وحتى مبيتعاطفش مع اللي ماتوا!

اللهم بَصِّرنا وعَلِّمنا وفُك كربنا، لا حول ولا قوة إلا بك.

الخميس، أغسطس 15، 2013

فض اعتصام رابعة العدوية (6) - تغريدات




1- السيسي كان رئيس مخابرات حربية فمفترض إنه راجل بيفهم أو على الأقل عنده تقارير معلومات إن عمله ده هيولع البلد.

2- ومش منطقي إنه حتى لو إنسان وسخ إنه يكون عايز البلد تولع عشان مش مصلحته إن البلد تولع كولعان كده في حد ذات.

3- فيا إما هو مبيفهمش وده شئ أنا مستبعده، يإما قاصد الدنيا تولع عشان يطلعله كل الـ potentials اللي معارضاه وغيره عشان النفخ يبقى على وضوح.. 

4- زي كده ما أمريكا سابت أفغانستان يبقى فيها كل الجهاديين اللي في العالم كله وقامت ضارباهم ومحتلة البلد بالكامل.

5- فالظاهر الجيش بيعمل التفريز ده كل شوية في البلد عشان يفشخ التيارات الجهادية اللي موجودة فيها من حين لآخر.

6- الموجة الأولى في التسعينيات ودولوقتي ميعاد الموجة التانية..

7- بس المرة دي بقى قلبت إن هو نفسه اللي بيقلب ناس عادية إنها تشيل السلاح بعد المجازر اللي حصلت واحدة ورا التانية.

8- يا رب خلصنا من الظلمة والمفسدين واللي بيتجبروا في الأرض.. يا رب ليس لنا إله غيرك، ولا حول ولا قوة إلا بك.

فض اعتصام رابعة العدوية (5)

في ناس من الأول بيستقوا أخبارهم من مصادر الإعلام الموالية للدولة العتيقة المصرية، ودول الكلام مبيبقاش موجه لهم هم عاملين كده من الأول وربنا يتولانا وإياهم برحمته.

إنما فيه ناس قبل كده كانوا ثوار، والواحد كان بيغبطهم على صدعهم بالحق، دلوقتي بقوا يجيبوا أخبارهم من المصادر دي، دول الحقيقة بيبقى لهم تخيل في دماغي كده مش هقوله كله بس من ضمن التخيل ده إن بيطلعلهم قرنين، ومع الوقت القرنين دول في ازدياد..

أنا مش مقتنع إن العيال دي مضحوك عليها ولا إنهم شايفين دلوقتي خلصنا من الإخوان وهيفوقوا بقى للجيش وبتاع، لا.. هم اقتنعوا خلاص إن أحسن لهم يطاطوا للدولة المصرية الفشيخة اللي عمرها ما عرفت غير القمع ولو كان ده على حساب حريتهم الشخصية.. بس يا عيني هم ميقدروش يصدعوا بكده عشان تاريخهم في الميدان وبتاع.. خلاص بقى يردد نفس سفاهات الإعلاميين الهُطل ونواحهم وحرننتهم وعدم مرجلتهم تمامًا. أو منهم اللي بيتعمد يبيِّن إنه خلاص يا جماعة أنا Off Politics وإياكش تولعوا في بعض.. لا يا باشا، انت نفسك ناس معينة هي اللي تولع، وعارف إن التاني كده كده معاه أدوات البطش كلها، فمن الآخر كده قررت تكسكس له.