- داعش لا تمثل الإسلام، الإسلام دين سمح، داعش لا تمثل الإسلام، الإسلام بيخلي الناس تحب بعض، الإسلام ليس داعش وداعش ليست الإسلام.
-- طيب.. داعش لا تمثل الإسلام، وإحنا عارفين.. مين بقى بيمثل الإسلام فانت واخده مقياس؟
- ...
-- طب انت عملت إيه عشان يبقى فيه كيان بيمثل الإسلام.
- ...
-- تكونشِ فاكر إنهم مش عارفين إن داعش لا تمثل الإسلام؟
- لا كتير منهم عارفين بس بيستغلوا الموقف عشان يشوِّهوا صورة الإسلام فلازم..
-- فلازم انت تفرهد نفسك وتقعد تعيد وتزيد معاهم إن الإسلام دين سمح الإسلام دين سمح من غير ما يشوفوا منك أي نموذج بيحقق الإسلام اللي بتتكلم عليه ده، فكل اللي انت بتعمله إنك زي اللي بيؤذن في مالطة! وفي الحقيقة العالم مش شايف مننا غير شجب واستنكار تصرفات داعش وماعش وفاعش وخلاص، لكن فين المثال الجامد فحت اللي بيمثل الإسلام (لو المصطلح ده صح يعني) مفيش..
***
الكلام والتفهيم مهم جدًا وأمر غاية في الحساسية والخطورة، ولازم يتصدر له ناس ويكون الناس دول على قدر من العلم والحكمة عشان يبينوا للناس اللي اختلط عليهم، لكن المشكلة اللي بتحصل دائمًا إننا بقينا بندافع عن الإسلام ونصد عنه الشبهات اللي بتتزرع فيه - الله أعلم إيه اللي وراها - ونموذج الإسلام اللي شايفينه صح ده مش موجود غير في الكتب!
لازم نشتغل غلى تطبيق الإسلام كما أُنزل على رسول الله وكما طبقه الصحابة الكرام، أو نساعد أي نماذج بتحاول تعمل ده عن علم، إنما بأنهي منطق هنتحول كلنا لمدافعين عن نموذج الإسلام اللي هو محدش بيطبقه أساسًا! حتى فين مصداقيتنا وقتها؟!
في النهاية، وتاني، هي دعوة ربنا سبحانه وتعالى وهتوصل هتوصل وبتوصل، فأذكر نفسي وإياكم بإننا يا نشتغل لخدمة دين ربنا في الأرض يا إما هنُستبدَل بناس تانية تشتغل لخدمة دين ربنا في الأرض، وربنا سبحانه وتعالى غني عن الناس أجميعن وقادر بكُن إنه ينصر دينه، المهم إحنا ننول هذا الشرف.
