بشرة خير..

انتخابات عشان المنظر.. انتخابات السيسي

سبع تِربع اللي مرحش الانتخابات مرحش عشان النتيجة معروفة سلفًا وعشان كده كده الدولة رايحة في سكة واحدة، فالناس طبيعي تحس إنه خلاص مالوش لزوم أروح أنتخب.

مش من الحكمة خالص ترجمة إن ده مقاطعة ذات مدلول سياسي ولا هدف أخلاقي معين. بلاش أحلام مازنجر دي اللي ملهاش أي علاقة بالواقع.

شكرًا.

ثلاث سنوات..

مدهش جدًا تغيُر أحوال الواحد، فبعد الثورة علطول كنت مع الانتخاب والتصويت وإن ده عين الإيجابية وبستنكر على اللي بيستحقر الانتخاب أو يستحقر نتايجه أو يوحي بإن الموضوع مالوش لازمة ودلوقتي تتقلب الآية بالعكس تمامًا وأبقى أنا اللي شايف إن الديمقراطية دي اشتغالة والتصويت ده أداة بيمرروا به كده كده اللي هم عايزينه. والمدهش أكثر لما ألاقي ناس كتير على نفس حالتي دي، كان مع الدستور والعجلة تدور ودلوقتي ينشر كلمات مارك توين: لو كان التصويت هيغير مكنوش سابونا نعمله. 

ومدهش أكتر وأكتر إن التحولات دي يدوبك في ثلاث سنين، الواحد عشان يغير عادة فيه بيقعد يحاول فيها عشر سنين!

صحيح سنة تعدي هوبا زي الهوا، وسنة تانية تعدي كأنها عشرين سنة.. سبحان الله يا أخي.

يا رب - كلمات: سامح خيري، غناء: حمزة نمرة

يا رب..

وشكيت إليك الحال من حِمل خدني ومال
وذنوب تهد جِبــــال، من قلب كان غــايب

خدني طريقي إليك،
ورميت حمولي عليك،
بهرب من نفسي ليك،
والقلب لك تــــايب..

يا رب..

دقيت بشوق بابك
وبكيت على أعتابك
مستني لجوابك
متردنيش خـــــــــــايب..

نعصى كتير ونعـــود
لطريقك الممـــدود
ولا عمره كان مسدود
حتى بأعمالنا

وما بين ركوع وسجود
وأذان مرفوع
بتسيل بعيني دموع
طمعانة في الجنــــــــة..

نصائح من أخ "فريش"

- عليك أن تعيد النظر في قراءة أي استيتس على فيسبوك تبدأ بـ #عن وذلك تجنُبًا للمُحن والسهوكة.

- عليك أن تفكر من جديد في أي استيتس قرأتها ولكنك للأسف وجدت في آخرها #عبث، لأنها في الغالب تبدو عميقة أكثر مما تتصور أنت.

- أي واحد يشيَّر فيديو ويكتب عليه: "شوفوا القرف والخلاعة والاستهبال" = قُم بعمل أنفولو مباشرةً.

- حرية الرأي والتعبير تكفل إنك تقول اللي انت عايزُه، بس عندك انت وبالتالي: من حقي الشخصي الذي يكفله الدستور والقانون إني أمنع إنك تيجي تقرفني برأيك (تفرضه عليّ يعني). وممكن أسمح لك تقول رأيك برضو عندي عادي، ليه بقى؟! عشان أنا - أو غيري يعني - مش شخصية عامة أو مسئولة في الدولة فعليه إنه يسمع كل الآراء وبتاع.. أبدًا على فكرة! ثم إنه لما باجي أقول رأيي فده رأيي، يمثلني أنا، لم ألزمك به أبدًا ولا أطالبك بتغيير قناعاتك على الإطلاق، ففي مقابل ده مش هقبل إنك تحجر على رأيي كذلك. ده مش معناه إني مش بقبل النقاش، بس أما يبقى نقاش مش تنطيط!

- البلوك حق مكفول لكل مستخدمي فيسبوك وإلا مكنش الأوبشن ده اتعمل. ويبقى لكل واحد تقديره مين يعمل له بلوك ومين ميعملوش.لكن طبعًا يبقى باب النصائح شئ جميل إنك متخسرش الناس وبتاع والكلام ده.
- اللي يتبنى النقطتين الأخيرتين دول عليه إنه يقبل ذلك على نفسه ويتحلى بالروح الرياضية، فلو حد عمل لك أنفولو ولا بلوك متاخدش الموضوع على صدرك = خليك فريش.

- تطبيقًا لنفس المبدأ: لك الحق إنك تفكس لكل الكلام اللي أنا كاتبه ده، وخليك عارف إني هتحلى بالروح الرياضية ومش هزعل إن شاء الله = سو ماتش فريش.

انتخابات وريح كريهة..

- يا عم هو مش لغى نتايج الانتخابات اللي فاتت وعمل اللي في دماغه، خلاص يعني هو مش محتاجني في حاجة يـ Go ahead بقى ويـ Have fun ويـ Enjoy ..

-- بس قرار المقاطعة ده قرار سلبي.

- آه مانا أبقى سلبي أحسن ما أبقى مغفل مفيش مشكلة..

-- بس هم كده نجحوا في إنك تيأس من العملية الديمقراطية في مصر وإن مصر يبقى فيها نظام سياسي حقيقي..

- آه نجحوا فحت تصدق فعلًا!

‫#‏حد_قال_ورا_الديمقراطية_كفر‬ ‫#‏سوف_نبقى_هنالك_بقى‬ ‫#‏ابقى_تعالى‬