السبت، يونيو 07، 2014

الألبوم بقى شُكك خلاص..!


جرَّب اسمع أغنية "الميدان" لحمزة نمرة كده دلوقتي لن تتمالك نفسك من فَرط دموع الضحك الهستيري.

بيقول لك إيه:

شايف الدنيا بشكل تاني،
السما صافية.. سامع أغاني،
واللي اتغير فيَّ هو:
طعم الحرية في لســــاني

أعتقد إن حمزة نمرة لو له أن يتبرأ من أيٍ من أغانيه، وِش دي هتكون في طليعة الأغاني المرشحة لكده.


-----------
تعليقات من فيسبوك:

- جرّب تسمع بتاعة عايدة الأيوبي وكايروكي بقى، هتقلب معاك بعياط الأول ثم ضحك ع الجزء بتاع عايدة الأيوبي.. حيث لن تتمالك نفسك وستقول لها: "قريتي فيها ياختي؟"

- الثورة مستمرة #مكملين_يا_
 
- ارفع راااسك أنت ماسريييييييي.. أنت رجعت الماسري بتاع زمااااااا.. آآآ... آآآآن.. الماسري بتاع زماااا.. آآآن..
 
- الألبوم كله لم تعد فيه أغنية واحدة صالحة الآن
 
- الاغنيه الوحيده التى لازالت ممكنه هى التغريبه.
 
- بس هو كان عنده رؤية مبعدية لما قال "انت رجعت المصري بتاع زمان"
   
 
 

الاثنين، يونيو 02، 2014

أماني وأغاني


في العام 2001 أو 2002 أنشد حسين عادل قصيدة "إن الثورة قادمة لا محالة" وكانت فيما أذكر غضبًا من اغتيال الشيخ أحمد ياسين رحمه الله وتلاه الشيخ الرنتيسي رحمه الله، ثم توافقت هذه القصيدة مع اندلاع ثورات الربيع العربي فكأنه كان يقصد الربيع العربي في 2011:

إن الثورة قادمة لا محالة
وذلٌ بعد قهرٍ؟ لا استحالة
هيا يا شعب نحمل علم الوطن
هيا كي نعيد مجدَ الزمن
نصرخ في وجه الطُغاة
هاااااا هاااااا هااااااا
كي يعود مجدنااااااااا


وهنا أنتهز الفرصة وأقول له في إيجاز:

قامت الثورة وانتهت كالكلالة
وشرطوا على الرئيسِ نقاء السلالة (*)
يلا يا شعب نخلع نغادر الوطن
يلا يا شعب اجرِ الحق لك سكن
لا وألف لاااااااا
لااااااااا لااااااا لااااااااااا
خلاص كفاية أفْورااااا
-----------
(*) إشارة إلى شرط مصريَّة والديْ من يترشح لرئاسة مصر.

الأحد، يونيو 01، 2014

السكة اللي تودي..


- يا أخي انصروا الحق بقى حرام عليكم لحد امتى هتفضلوا تستهبلوا كده؟!

-- وانتو كنتو فين لما إحنا كنا هناك وقت ما كانوا بيعملوا فينا ويسووا؟


- الله؟! يعني هو انتو اللي كنتو فين لما كانوا هم بيعملوا معانا ويسووا قبل ما انتو أصلًا تكونوا هناك أساسًا!


-- يا سلام؟!! يعني هو انتو اللي كنتو فين لما كانوا بيعملوا معانا ويسووا أكتر ما عملوا معاكو وسووا بعد كده فاللي هو دلوقتي جايين تقولوا تعالوا عشان دول بيعملوا معانا ويسووا..


- لأ أنا مسمحلكش! كانوا بيعملوا معانا ويسووا أكتر ما عملوا معاكم وسووا بكتير على فكرة! إحنا قُدام أوي في الحوار ده، ياما اتعمل فينا واتسوى..


-- يا بني إحنا أصلًا.. تراك!


يأتي اللي بيعمل وبيسوي فيقوم يعمل معاهم ويسوي السليمة وينتهي الجميع إلى مزبلة التاريخ في هدوء وسكينة.