مدوّنة رئيس سابق - ميُحْكووووووووومشي!

معلش غِبت عليكو شوية..

أيوة مانا بتابع حالة البلد برضه أنا مواطن شريف زيي زيكو..

إن مكنتش أحسن..

أنا في العمل العام بقالي 60 سنة.. مَبَوِنّش..

فضروري أتابع الأحداث والمجريات اللي بتعصف بالبلاد من تحت إيدكو يا شعب برّاوي.. يخاف ميختشيش!

وبعدين كمان النّت ساعات بيقع من المستشفى العالمي..

يعني مفيش وفاء حتى تركبولي نت سرعته عالية عشان أقدر أتابع وأتواصل مع أحبائي من الشعب المصري..

عامةً.. كل واحد بيعمل بأصله برضه..

المهم.. نخش في الموضوع..

أنا مش عارف لحد امتى حتقعدوا ترمّوا عليّ التهم جزافاً.. وإني بحكم البلد من طُرة..

والله دي إمكانيات بقى.. قولوا إنّكوا بتنفنسنوا عليّ وخلاص، وأنا أعدّيهالكو..

أنا مالي إذا كنتو انتو مش عارفين تشكموا البلد..

بس قعدتوا ماسكينلي ع الواحدة: يانا يالفوضى، يانا يالفوضى..

طب خدوا بقى!!

أديكو مش ملاحقين على الفوضى يمنةً ويسرةً..

بس الحقيقة.. أنا محقوقلكو..

لا بجد!

أصل أنا الصراحة مكنتش متخيل مجلس الشعب حيبقى بالإثارة دي..

عايز أقوللكو إني مش بفوّت حلقة وا.. قصدي جلسة واحدة من جلسات المجلس "الموكّر"..

لا حقيقي.. برافو.. لو كنت أعرف كده م الأول كنت سبت الانتخابات من غير تزوير م الأول..

توكشو ظريف يعني..

كل واحد فرحان بالميكروفون وقاعد يردحلي في المجلس والمجلس مش فاضي يقرر أساساً..

بس أنا عايز أشكيلكو الصراحة..

أنا فرهدت من كتر المحاكمات..

يا جدعان متعملوا المحاكمات عندي في السويت وأنا أضمن لكو النزاهة.. أنا طول عمري نزيه واللي فـ جيبي مش ليّ..

إنما الشحططة دي مالهاش أي معنى.. رايح بالهليكوبتر وجيّ بالهليكوبتر..

والرِوِش اللي ناوي ينقلني طُرة ده..

هي القوالب نامت والانصاص قامت ولا إيه يا جدعان..

اوعاكو تكونو صدقتوا..

حاسسكو صدقتوا..

لا فوقوا يا إخوة..

بصّوا حواليكو حتلاقوني..

مش أنا اللي أتقرطس..

وأساسا المحاكمات دي كوووووووولللها في الجلاش..

أنا عايز دَكَر كده يطلعني مُدان في قتل المتظاهرين..

بيني وبينكو أنا جايب فريد عشان البرستيج مش أكتر..

إنما الحق.. محامي بتلاتة تعريفة يطلّعني براءة بكل سَهولة!

أيام 25 و26 و27 محصلش مشاكل والشرطة كانت بتتعامل معاكو بمنتهى الاحترافية.. وآخرها كان غاز ورشّ ميّة وخلصْنا.. ده اللي بتتمنّوه دلوقتي بعد ما الجيش لَسْوَعْكو بالخراطيش هو والشرطة..

الهرتلة بس حصلت يوم 28، وأديكو شاهدين.. لما الموضوع أفوَر وزاد وطرطش من العادلي.. نزّلت الجيش.. لحقن دماء المتظاهرين، وللحفاظ على المنشآت العامة.. والخاصّة.. إلخ!

وحاطّيت العادلي في السجن.. هَه؟ ولا نسيتوا إنه اتحطّ في السجن في عهدي أنا! وعملت لجنة تقصّي للحقائق في اللي ماتوا..

لاقيتوا مش نافع معاكو..

قمت شيلت الحكومة..

لاقيتوا مش واكل معاكو..

فرمتّ الوطني وشيلت الأمانة بتاعته كلها بما فيها ضنايا جمال مبارك..

برضه معجبش..

لغيت ملف التوريث خالص أهُه.. وعينت عمر سليمان اللي كنتو بتغنّوا بيه قبل كده نائب ليّ.. وعملت حوار مع الكل بما فيهم - وأنا أتجرّع السمّ - الإخوان..

فلما لاقيت مش عاجب مش عاجب.. وإنكو قفشت معاكو إني أمشي..

مشيت!

كل ده في تمانتاشر يوم بس!

أتحاكم أنا بقى على قتل المتظاهرين؟!

حقول إيه؟!

مانتو ناس لوز!!

سايبين ثلاثين سنة كُسكُسي وطواجن ملوخية باللحمة وكوسة بالصلصة وفجل وجرجير.. وجايين تتكلموا في 18 يوم!

حقيقي.. انتو لقطة!

--------------------

ملحوظة: المقال ساخر، وParody لاصحى الصبح ألاقيني مطلوب للامتثال أمام النيابة العسكرية بتهمة إيهام الرأي العام إن حسني مبارك بيكتب ولا حاجة!