البرادعي.. والميكروفونات

امبارح قرأت تصريح للسيد وزير شئون مجلسي الشعب والشورى السيد مفيد شهاب وهو الوزير الأسبق للتعليم العالي، قرأت له تصريح بيقوللك إيه بقى.. إنه خطأ انه الدكتور محمد البرادعي يترشح للانتخابات الرئاسية.. ليه بقى ؟؟.. لأنه يفتقد الخبرة الحزبية ومتطلبات العمل السياسي..

واحد رئيس هيئة دولية معترف بها في الدنيا كلها وبيتعامل مع كل رؤساء العالم وخبير في التفاوض وخبرة في الحقوق والقانون مش منتظر منه يكون عنده خبرة سياسية.. !!!.. أمال مين اللي عنده خبرة سياسية..

لا حقيقي يعني إذا كان واحد زي ده معندوش خبرة سياسية.. ولا عنده فكرة عن الخبرة الحزبية - قال يعني هنا في أحزاب أساساً - يبقى مين اللي عنده.. سيادته اللي كان وزير تعليم عالي محناش عارفين لازمته إيه.. ولا لما كان وزير شئون مجلسي الشعب والشورى اللي لدح دلوقتي - فعلاًَ - مش عارف إيه لازمة المنصب ده.. تحس كده إنه عامل زي منصب محمود الجوهري لما اتعيّن المدير الفني للاتحاد المصري - وزير الشئون الكروية - بس الفرق إنه الجوهري مستحملش الهجص ده وحس إن وجوده مالوش لازمة فاستقال.. إنما ده على أي أساس بيعتبر إنه البرادعي مفتقد للخبرة السياسية..

لا وكمان في حملة من الصحف القومية على البرادعي مش مفهوم سببها.. لمجرد إنه بني آدم شاف في نفسه الأهلية إنه ممكن يبقى رئيس للبلاد.. عادي يعني يا جدعان هو كان عمل إيه.. ما هو لو فيه انتخابات محترمة حيخش ولو هو فعلاً مش مناسب - الناس مش شايفاه مناسب للحكم - حسيقط في الانتخابات وخلصنا.

أنا شايف ان واحد زي ده ممكن يبقى مفيد للبلد - وله من المؤهلات ما يساعده للوصول للمنصب ده - على الأقل فيه ممارسة سياسية عملها وعارف العالم بيمشي إزاي والعالم كمان عارفه كويس أوي ومش مفروض علينا من حد..

أعتقد إنه الرئيس مبارك نفسه مش حيحط في دماغه واحد عشان حب يفكر يترشح قصاده.. مبدئياً المفترض إنه مش فاضي للكلام ده وكمان هو عارف - ولازم يعرف - إنه لازم يبقى في غيره يقدر يشيل المسئولية.. وإلا تبقى فعلاً خربت.

المشكلة في الأرزقية والمنافقين وأصحاب الأبواق اللي بيليّسوا للحكم والحاكم أياً كانوا.. هو اللي يخربوا أجدعها بني آدم يمسك..