مدوّنة رئيس سابق - أيّــها السّـــذّج

أهم فرضوا عليكو قانون الطّوارئ تاني يا سُذّج!

تصدّقوا إنكم مكنتوش تستاهلوني..

بس فعلا.. المجلس لعبها صحّ..

أماااااااااااال.. تربيتي..

أنا كنت فارض عليكو قانون الطّوارئ بس مش بكيفكو.. مخلّتكمش تتمنّوه من قلوبكو..

واللي كان فيكو عايز يعمل مثقّف.. كان بيلعب على نغمة قانون الطوارئ وأمن الدولة..

كان لازم أحسّسكو بجد بشويّة فوضى خلاقة كده.. تبرّر لي استخدامه..

لكن أنا اتغاشمت وطبّقته ع الفاضي وع المليان.. حتى واحنا في فترة الرخاء الاستراتيجي اللي عايشتكو فيها يا شعب نمرود..

إيه اللي أنا عملتو فيكو..؟؟ هَه؟؟ حدّ يقول..

نئيت بيكو من حروب مع إسرائيل طوال ثلاثين سنة رغد ولطلطة وزغللة..

مشفتوش جعان فيها بيدوّر على أكل في المزابل..

ولا شفتوا أطفال بتتشرّد كل يوم على الأرصفة..

ولا شفتوا سكك حديد بتولع بيكو كل عيد..

ولا شفتوا مستشفيات يموت فيها العيّان قبل ما يتعالج!

ولا شفتوا مدارس أساسها غُرَز حشيش!

إنما المجلس لعبها معاكو صحّ..

وقّعكو في الفخّ!

وبقيتم تتمنّوا تطبيق الطوارئ وجلد السّلطان!

كرّهوكم في الثّورة..

وفيكم اللي بيشعللها ويزيط في الزّيطة.. وانتو مش بتنكروا عليه..

اشربوا بقى!!

ولا أفولّكم.. خليكم اتسلوا!