مدوّنة رئيس سابق - لأ.. نسيج الوطن خطّ أحمر

إيه يا جماعة وغوشتوني عليكو..

ضرب.. مظاهرة أقباط.. مواجهات مع الجيش!

توء توء توء..

أنا قلت لكم م الأول.. ده شئ خطير!

وبس قعدتوا تقولولي في التحرير: مسلم مسيحي.. إيد واحدة..

الظاهر محزقتوش كويس في "إيد واحدة"..

قابلو بقى!

أمال بس "الشعب يريد إسقاط النظام.. وكلام م اللي بيتقال ده"..

متضبطوا نفسكو الأول!

شوفوا مين فيكو مُناه الدنيا تولع!

دانتو بفورتينة واحدة سبيتو لبعض!

وولعتوا في البلد!

منكو لله خربتوا البلد!

دانا كنت سايبهالكو فلة شمعة منورة على رأي الولا عمرو أديب!

أقول إيه بس!!!

أنا كنت محافظ على وحدتكو الوطنية طول مانا موجود!!

كنت نافخكو كلكو بدون تمييز!!

تيجوا انتو بعد ما أمشي تستهينوا كده بالوحدة الوطنية اللي أصّلتها فيكو..

إخص عليكو..

مش تقوللي.. كلام فارغ!

هاللهِ العظيم..

حاجة تكسف!

أوباما يقول إيه دلوقتي؟؟

حسني ساب البلد.. البلد غرقت!

هوّانا مينفعش أعتمد عليكو في حاجة أبداً..

أنا قلت أسيبهالكو مخضّرة بدل مانتو كنتو قارفنّي.. ارحل يعني إمشي ياللي مبتفهمشي!!

أديني فهمت أهُه.. ومشيت!

عملتو إيه بقى ياللي عاملين فيها مثقّفين وواعيين بالـ"وضع" السياسي والثقافي..

قاللك مصر متعددة الثقافات..

ياخي تـتّـــح!!!