كانت ثورة دي يا كابتن؟ ثورة صحيح؟!

هذه الخاطرة ليست تحليلية ولا نقدية.. بل هي افرازات واحد مفقوع جدّاً..

وقد تجد مثلها الكثير فلا تنتظر أطروحة عبقريّة ولا حاجة!!

وقد تجد في المحتوى أخطاء إملائية فلا تُعِرْها اهتماما.. فمن الغيظ قد لا أدري أي زر أضغط عليه..

والتشكيل كذلك يعني ماتّدُّقِّش!

أنا عايز بس أسمع واحد ابن حلال كده يقوللي البلدّ دي اتعمل فيها ثورة!!!

لا صحيح؟!!

معرفتكش أنا بقى!!

انتخابات حرة نزيهة سميرة مشيرة.. بعد الإطاحة بنظام مبارك الأيّــا يا كسكليا.. منتظر أن نحتار فيها بين الحلو والحلو بشرطة.. الثوري والثوري بشرطة.. مش بين رمز المنفاخ ولا رمز النفاق ولا رمز الـ.. إيه؟!

يا إخوة استرجعوا كده.. هَه.. سنة ورا كده.. حسني مبارك لما كان بيرفص عشان ميسيبش الحكم عيّن لنا ميـــــن؟

اسم الله عليكو!!

وكان موقف الثورة إيه بقى ساعتها؟؟!!!!

لاااااا.. لا مبارك ولا سليمان.. الكلام ده كان زمان!!

معروفة أهِه!!

طب.. بدل بقى ما عمر سليمان ده يبقى نائب ريّــس.. حيبقى ريّــــس!!

ودوّروا كده على أنشف حيطة عندوكو في بيتكو - تكون حيطة خرسانة ولا حاجة - ودبّـــوا فيها دماغكوا..

لا مش كده وبس..

وخود دي كمان..

رئيس وزراءه.. اللي طلعت - أو كانت حتطلع - مليونية مخصوص عشانه عشان ينكشح!! بيقول.. مش انتو ماكنتوش عايزنّــي رئيس وزرا..

طب حبقى ريّــــــس!

الحقيقة ده كان فارس الواحد م الأوّل بس الواحد كان بيقول في نفسه البلوفر صعب أوي يعملها فاكس الصراحة.. لكن لما "باط هوين" يعلن عن نفسه مرشحا لرئاسة الجمهورية.. يبقى كُرّ كل حرقة الدم بقى!

لا أنصحكم بمتابعة موقع الحملة الرسمية لمهيب الركن عمر سليمان على تويتر عشان نحافظ على ثورة الكركديه الاستراتيجية في البلد!!

أصل الكركديه الساقع دلوقتي بقى ثروة لا تقدر بثمن!!

لا تقدر بثمن..

لما تلاقي أحدهم بيقول.. عمر سليمان كان ضد النظام..

يبقى إما تمسك نفسك.. وتضرب الكركديه الساقع..

أو تدوّر على أقرب كازارولّــة جنبك وتجيب اللي في معدتك وتخشّ تنام بقى..

ولما تلاقي شفيق بونبوني مرشح لرئاسة مصر الثورة بيقوللك حسني مبارك ده مثلي الأعلى..

يبقى تقول..

إيه؟!

وبما تلاقي بقى عمرو موسى - الشيك أوي أبو صور من غير كرافتة قال يعني كده شاب روش - ده الثوري اللي وسطهم.. اللي مكنش عايز حسني يمشي وكان بيشيد به في فترة حكمه.. يبقى تـ.. تـ.. تنقلب على جنبك الأيمن وتحسبن في سرّك..

ولما بقى تلاقي المرشحين - المفروض إنهم ثوريين - قاعدين بيتقصّــوا واحد ورا التاني.. يبقى انت أكيد.. أكيد في مصر الثورة!!

المفروض إننا أبقى قمت بثورة ضد نظام فاسد واجيب بعدها رئيس جمهورية مكنش له في السياسة في عهد مبارك عشان أضمن إنه ميكونش اعتُقل في وقته عشان أضمن إنه مش محتاج ردّ اعتبــــــــــــار!!!

يا جدعان هو كان فيه سياسي محترم مناضل مش معتقـــل!!!

ليه؟!

ليه؟!

كل مرة كده؟!

أنتم تحرقون أغصان الزيتون..

والفول والعدس أبو جبّــة..

فلتتحمّــلوا بقى..

عشان بيلســـــع!!!

واللهُ الموفق والمستعان.