زمن القمم العربية الجميل..

هييييه، فين أيام اجتماعات القمة الطارئة، والقرار إما بيكون بالإجماع أو مبيكونِش، والتاني يقول له: لأ، بالأغلبية بتاع ده.. الأغلبية البسيطة، بس بقى ويتفقوا على التدخل ومساعدة أمريكا في الحرب على العراق وكده.. برضو ياخي حُسني كان بيرزع أحيانًا كده وكان له شَمخَة.. هي شمخة على ليبيا آه مفيش حاجة بس تحسُه كان مسيطَر، تلاقيه واقف مدكوك في الأرض كده مبيهموش آه.. حتى القذافي ساعتها طلع نرفزته ع الراجل بتاع جامعة الدول العربية وشتمه شتيمة فحيتة مش عارف استحملها إزاي ساعتها وقال له: انت مو عربي! أنا مش عارف الصراحة لو حد شتمني قال لي انت مو عربي ممكن يبقى رد فعلي إزاي.. بس ساعتها الراجل كتم في سره وحبسها آه.. وقال له أنا أكثر عروبة منك.. أوف أفحمه.. تقريبًا الراجل ده كان مفيد شهاب الدين.. حيث اللول يعني!

الواحد برضو بيفتقد الأكشن والساسبنس اللي كان في القمم العربية زمان، يعني تلاقي كده بتاع الكويت بيشرشح لبتاع العراق، وتلاقي بتاع العراق بيحُط على بتاع الكويت.. وبقية الخِرءَّات اللي بيتفرجوا، واللي كان بيكسكس لده ولده المهم يخرج متأمن وخلصنا..

مممم.. ولا لما حسني مبارك قدم القذافي إنه: ملك ملوك إفريقيا التقليديين، أيوة بقى يا ريس يا كايدهُم، دلعه إنه ملك ملوك إفريقيا - اللقب اللي كان بيحبه القذافي أوي - بس في نفس الوقت قال: "التقليديين"، آه عشان مينساش نفسه، حسني مبارك مش حاكم تقليدي أبدًا، إذا كان القذافي مسك الحكم 40 سنة فحسني كان بينافس يعني ومسكه 30 سنة برضو، وإحنا.. إحنا دولة مؤسسات، إنما إيش تكون ليبيا دي.. بس خلِّ بالك القذافي لو كان عنده منصب كان لوَّح الاستقالة بوجوهنا في البداية بس هو مكنش رئيس دولة ليبيا على فكرة.. أيوة بجد.. القذافي كان قائد ثورة الفاتح من سبتمبر - زي العاشر من رمضان والسلام عندنا كده - فمنصب الرجل كان شرفي يعني هو كان بيشفلح في الناس كده بحُكم إنه جامد أوي مش أكتر..

لأ الأمة العربية ولادة يا جماعة، إحنا بنغير في التاريخ.. بصرف النظر بقى بنغير فيه إزاي أهو بنغير وخلاص، ودورنا ملموس والعالم كله بيتأثر بنا.. يااه.. شوف خرَّجنا للعالم زعماء أفخاذ عظام زي حسني مبارك بطل الحرب والسلام والقذافي عميد الحكام العرب وملك ملوك إفريقيا وحافظ الأسد زعيم حزب البعث السوري ونافِخ حلب الأسطوري وصدام حسين زعيم الأشاوس وعدلي منصور..

وعدلي منصور..

وعدلي منصور.. آه.. عدلي منصور اللي بطالب برفع الحصار عن غزة.. ده ناشط سياسي عظيم يعني.. هو أنا هنسى أما كان واقف على معبر رفح ورافع شارة بيقول فيها Free Gaza وقعد ينشد بقى: لا تبالي يا غزة وتحلي بالعزة..

آه..

أمال إيه؟!