بقلب في التليفزيون في أمان الله لقيت لك واحد بيتكلم بحرقة أوي، خلاص الولاء حيبظ من عينيه.. وبيقول: الرئيس حقق ثورة في البنية التحتية وبناء البلد.. انتو ناسيين لما كنا نرفع التليفون ساعة عشان تيجي الحرارة.. لا ومجاري إيه وصرف صحي وكل ده مكانش موجود..
طبعاً أنا حفاظاً على ضغط الدم فضلت إني مكملش متابعة النجم، اللي مستكتر على نظام بقاله 30 سنة في الحكم إنه يعملنا تليفونات تنكلم فيها ولا صرف صحي لمؤخذة نعملها فيه.. أنا مش فاهم هم متخيلين إنه الطبيعي إنه رئيس الجمهورية ميعملش حاجة خالص.. يعني هي منة إنه احنا دلوقتي بنتكلم في التليفون زي البشر كلهم.. يعني لو كنا لسة في مرحلة التليفون أبو حرارة تيجي بعد نص ساعة ده - لغاية دلوقتي - كانت الدنيا حتبقى سابقانا بأد إيه.. إذا كان دلوقتي سابقنا ييجي بخمسين سنة.. أمال لو احنا بقى لسة في العصر الحجري بنتكلم مع بعض بالحمام الزاجل ولمؤخذة بنعملها في البكابورت كانوا حيبقوا سابقنا بميتين سنة مثلاً.
هو الراجل ده مش متخيل إنه في أمم بقت قوة عظمى في ثلاثين سنة، أو حتى بقت دول لها قيمة في مناطقها الإقليمية.. زي تركيا وإيران.
أنا مش فاهم شغل المنة والذل ده حيفضل لحد امتى.. يا جدعان داحنا بادئين الصناعة والتطور والكلام ده مع اليابان.. شوف اليابان فين واحنا فين.. وأهي اليابان خارجة بقى مش من حرب عادية.. ده من حرب عالمية بقى.. وفي مدن اتمسحت تماماً.. مش حرب أنهكت اقتصاد البلد ولا حاجة..
بلاش بقى شغل النفاق المغلف بالحماسة الهجصية ده عشان كده عيب.. لإني كنت حنفعل على الإذاعة والتليفزيون كلها بسبب الراجل ده اللي حتى مانيش عارف اسمه.
ليست هناك تعليقات:
إرسال تعليق