تولع الكورة عاللي كوّروها

ده لو بيلاعبوا الكيان الصهيوني مش حيعملوا كده..

فريق الجزائر كسب الماتش ومع ذلك الجمهور الجزائري اعتدى على الجمهور المصري في السودان.. لغاية أما استخبوا منهم في شقق السودانيين وبناياتهم، وحوصروا.. وقطع عليهم الطريق.. وأصيب عدد من المصريين.. ده والجزائر كسبت.. أمال لو كانوا خسروا كانوا عملوا إيه ؟؟

لا معلش بقى أنا عاوز أتوصل لحل اللغز ده.. معلش فعلاً لما الجزائر بتلاعب تونس ولا المغرب ولا أي بلد تانية عمر ما الاعتداءات دي بتحصل تماماً.. ولا سمعت عن أن الجالية التونسية في الجزائر اترمت بالمولوتوف ولا البلا الأزرق ده.. ولا شفت في عيونهم حجم الكراهية دي لنا..

ما هو التفسير مش حيخرج من حاجتين:

- إما إننا شعب هفأ وبيستحلوا الضرب فينا ومفيش رادع عنده شخصية يوقفهم أو يوقفنا.

- يا إما في حقد مش طبيعي من قبلهم - غير معلوم سببه دلوقتي - أو على الأقل هم شايفينّا مغرورين وواخدين في نفسنا قلم ونستاهل الضرب بقى..

وبعدين أنا بشوف إنه في اجماع عربي على كده..

مش عارف احنا كنا عملنالهم إيه..

مش حاقول أفضالنا عليكم واحنا اللي علمناكم والكلام ده عشان أساساً ماعدش ييجي منه، وبعدين اللي راحوا علموا ما راحوش ببلاش، بس ياخي اعملوا حساب للأخوة في الدين.. في الديــــــــــن.. احنا مسلمين.. يعني إخوة..

والله العظيم أنا مش متخيل احساس المصري اللي شايف واحد جزائري عايز يقتله عشان ماتش كورة.. ومش حاقدر أقول أو العكس عشان طبيعة المصريين - غصب عنهم مش بكيفهم - مش بتسمح لهم إنهم يعتدوا على حد.. ودي حقائق..

والله العظيم والله العظيم والله العظيم ما التأهل لكأس العالم وللزفت هيعوّض كسر واحد اتكسره واحد من اللي اتصابوا دول، بل ولا خدش كمان..

وبعدين تعالوا هنا..

أنا مش فاهم حجم الرسمية الرهيبة اللي طبعت على المباراة دي.. إيه هو الرئيس البشير يقابل بعثتي الفريقين، وإيه هو بوتفليقة يأمر بإرسال عشرتلاف مشجع للسودان.. تقولشي أمر بإرسال عشرتلاف كتيبة لتحرير الأقصى، ولا الجسر الجوي المصري لنقل المشجعين لمؤازرة ودعم المنتخب في السودان.. دلوقتي افتكرتوا تروحوا السودان.. بالمناسبة السودان دي على وشك الانفصال خلاص كل سنة وانتوا طيبين السنة الجاية عشان مفيش دكر من العرب دول عرف يلمّهم على بعض، واستنينا لحد ما الخواجات بتوع بره قالولهم انفصلوا.. ويا محلا ده على قلوب السودانيين الجنوبين وعلى رأسهم سيلفا كير اللي قال لهم: لو ترضوا بالعبودية صوتوا للوحدة مع السودان.. جايين احنا بقى دلوقتي نفتكر السودان عشان ماتش هباب كرة.. لا ومش نفتكرها بالخير مثلاً داحنا بنجيبلهم مصايب كمان.. فالحلي بس أنس الفقي وزير الإعلام الهابط بتاعنا يقوللك حنرسل قوات للسودان لو استمر الأمر على كده.. انت حتحور على نفسك كنت تعمل سبع رجالة في بعض لما كل عسكري من ولاد مصر بيتقتل على الحدود مع إسرائيل وبعدين انت مالك أساساً خليك في الإعلام بتاعك مالك انت ومال قوات ولا نيلة..

حسبي الله ونعم الوكيل على أمة بتاكل في نفسها عشان هجايص ونسيوا هم موجودين أساساً ليه ؟؟