تسمحلي أنكشك ؟

أيوة..

الأخ اللي قاعد هناك ده ومربّع إيده وعامل فيها أجنبي..

أيوة يا فندم السؤال كان موجّه لحضرتك يمكن حضرتك حلقتلي ومردّتش..

انت قافش ليه ؟!

أيوة يعني إيه اللي مضايقك ومعكنن عليك وزي ما تكون شايل طاجن ستّك على قفاك، ألا هو إيه موضوع طاجن ستّو ده إشمعنى يستخدم رمز للعكننة والضيق.. ده حتى الجدة بيبقى دايماً أكلها فيه البركة كده وحلو كده وتحسّ إنه ما شاء الله ما شاء الله يعني مش بيخلص.. إنما الأكل دلوقتي كله نواشف ويموّع النّفس إلا ما رحم ربي من اللي فاضل من الأكل ونفد من المبيدات المسرطنة مثلاً، أو شوية اللحمة اللي نفدوا من الشحنات اللي بتيجي فيها أمراض الدنيا وقشطة بتخش البلد زي الفل.

احم..

أنا ملاحظ إني تسببت في إني أعكنن عليك زيادة.. لمؤخذة أصله بيقوللك طبيعة الشخصية المصرية شخصية نكديّة كده شايلة الهمّ على طول عمرهاش حسّت إنه في أمل.

واللي مش فارقة معاه يحسسها إنه في أمل أو لا..

اللهم إلا بشوية الإعلانات الفاكسانة الحمضانة التعبانة بتاعة ابني بيتك يا شقّي، واحسبها صح تلعبها صح والهجاصي باصي ده!!.. اللي هي إعلانات بتساهم في النّكد المتفشّي للمواطن المصري.. قال يعني هو ناقص!.

واضح إني كل ما أحبّ أكحّلها أعميها..

يا راجل فرفش وزقطط وفرفش وزقطط..

مالك فيه إيه ؟!

ماتضبط كده..

انت مش واخد بالك من الانجازات الأسطوريّة اللي البلد بتقوم بها يوم بعد يوم.. وساعة بعد ساعة.. وفنية بعد فنية.. اللي هي أقل من الثّانية.

انت معندكش خبر بمصنع الجبنة اللي اتعمل ولا إيه ؟؟ ولا إن مصر اختارت طعمها ؟؟ طبعاً مانتا نايم على ودانك ومش بتشارك في العمليّة السياسيّة الرهيبة اللي مصر خاضتها وتحدّت بها العالم كله.

بدل مانتا قاعد بتكاكي على كلام فارغ إيشي دستور وهراء من ده.. يا خي متخش تثبت إيجابيّتك وتختار طعمك ولا انت مش هامّك تاكل شيبسي إيه ؟؟!!

أنا ماشوفتش سلبيّة كده الصراحة..

يعني جبنة وطفّحناكو.. شيبسي وسفّفناكو وخليناكو تختاروا طعمه بنفسكو.. إيه تاني ؟؟!!.. إيه تاني ؟؟!!

إزاي تبقى مصري وزعلان وحزين والدّمعه حتفرّ من عينك..

إزاي تبقى مصري وتبقى بائس.. واحنا خدنا الأمم الإفريقية سبع مرّات.. آخر تلات مرّات ورا بعض تتراً.

إزاي تبقى مصري وتبقى قافش.. أكبر مستورد للقمح في العالم.. واحنا فاهمين وواعيين قوي.. إنه الاكتفاء الذاتي من المحاصيل الزراعية فكرة غير عملية.. وإن روسيا وأمريكا والدول الفقرانة دي اللي بتحقق اكتفاءها الذاتي من القمح دي دول متخلفة متفهمش حاجة في الزراعة.. احنا أصل الزراعة والصناعة.. انت فاكر إن البلد ماشية كفتة كده أي حاجة.. لا يا حبيبي.. ده الكلام مدروس.. وكله موزون..

احنا لمؤخذة فراعنة ونفوت في الحديد..

وساعة الغلط.. نقرقش زلط.. مش عارف ليه بس أهو تعبير عن الغضب يعني!

ياخي إزاي تبقى مصري.. وزي ما قال الريّس، منتخب مصر كويّس ؟!

حقيقي مش فاهمك ومش حاسّك.

إزاي تبقى مصري، ومصر هي راعي السلام في المنطقة.. وشاركت في انطلاق المفاوضات المباشرة بين الفلسطينيين واليهود على أرضنا الحبيبية برعاية أمريكية واختفاء مصري وحلاقة تامّة لحماس اللي هي طرف - مهما أنكره البعض وتجاهله - لا يمكن تجاهله، يعني المفاوضات دي كلها في الفساخونيا.. بس أهه لنا الريادة في المنطقة.

إزاي تبقى مصري وزعلان.. ومصر بتقوم بدور في منتهي الحساسيّة في لبنان.. وهو إنه مفيش دور.. أيوة.. عشان منغلطش.. ومحدش يجيب علينا الغلط في حاجة.. نسيب اللي يتدخّل يتدخّل.. واللي عنده أجندة ينفّذها.. احنا مالنا..

أد إيه في حنكة سياسيّة إحنا مش مقدّرنها.. عشان احنا شعب عايز.. يلا حنعمل إيه ؟!

يابني كفاك فخراً إنك مصري.. وانت مصدّر لكل العقول العبقريّة في العالم.. وبتساهم بالشكل ده في نهضة هذه الأمم.. والعقول دي بتتجنّس بجنسيّات تانية مالهاش دعوة بينا.. وولائها بيبقى لها تماماً.. أيوة.. ده إنكار الذات.. مصر طول عمرها بتدّي العالم.. مابتاخدش!.

لو لم أكن مصريّاً.. لوددت أن أكون ماليزيّاً.. سنغافوريّاً.. بوركيني فاسّويّاً.. أي حاجة.. متفهمنيش غلط.. ده عشان أحسّ بقيمة المصري.. وأشوف يا ترى برّه بيشوفوا المصري إزاي ؟

مالك فيه إيه ؟

جعجعة فارغة وخلاص!