قد لا تدري

أكتر شيء معطّل هو تصور إنك سيطرت على جوانب الموضوع كله. معطّل لأنك بتتوقف عن السعي للأحسن، بينما غيرك اللي أدرك إن لسة فيها مكمل بتواضع وشغف أكتر.

من ضمن صور الحالة دي إنك تعتقد بتمام الموضوع حسب ما أنت شايف فقط، مش متخيل إن فيه جوانب تانية أنت معندكش علم بها. وبالتالي بترفض تسمع حتى وجهات النظر الأخرى، حتى أحيانا بيوصل الموضوع إنه يوتّرك - لأنه بيهز ثقتك في بنيتك الفكرية وإزاي بتحصل المعلومات.

الحقيقة، إنه يكاد دايمًا يبقى ناقصك حتة ما تبقاش عارفها. وأنا بأشوف إن إدراكك بعدم تمام العلم ده نعمة من عند ربنا؛ لأنه بيخليك متقبّل تسمع باهتمام أكتر، وطول ما أنت بتسمع باهتمام أكتر طول ما أنت بتحصل معلومات أكتر وبالتالي آلية اتخاذك للقرار بتطوَّر فخبرتك تزيد إيجابًا.

وده ينطبق على الحياة عموما مش بس الحياة المهنية، النظرة دي بتخليك أكثر تقبلا للآراء المختلفة وتفهم دوافع الناس المختلفة ويخليك عاوز تفهم أكتر وتهدا على خلق الله.