مدوّنة رئيس سابق - هوّانتو شيلتوني ليه؟

زي عادتي وانا بقرا البتاع ده كل يوم الصبح كده.. كنت قاعد بفكّر..

والله الواحد كان محتاج فترة النقاهة دي قبل ما يرجع العمل العام تاني..

المهم يعني.. كنت بفكّر كده في الأحداث اللي حصلت والكلام ده!

جه في بالي.. الله؟.. هو الشعب أصرّ إني أمشي ليه؟

ماهم ماشيين على الخطّة اللي أنا كنت حاططهالهم وقلتها لهم في الخطاب بتاعي اللي قلته وقت البتاع ده!

قلت نعمل تعديلات دستورية.. واهم قاعدين يترّزوا في تعديلات دستورية..

قلت حنقبل الطعون المقدمة في الأعضاء اللي كسبوا بالتزوير.. واهم بيعيدوا انتخابات مجلس الشعب أهُه..

يعني بس فرهدة وخليتوني أروح شرم الشيخ وشرم العجوزة.. وأروح وآجي على محاكمات وانتو أساساً مشيتو ع الخُطّة اللي أنا كنت راسمهالكو..

وبعدين قاعدين فرحانين أوي إني مشيت؟

طمّا المجلس العسكري اللي بيحكمكوا ده.. أنا اللي معيّنهولكو..

واهو لبّسكو في وثيقة لوز العنب تخللي الجيش يحكم وهو مايحكومشي!

قاللك ثورة!

انتو فاكرين مصر سهلة أوي كده..

إوعاكوش تكونوا فاكرينها تونس.. عاركة بلدي تطير رئيس جمهورية ويهرب على برّة..

لا يا حبايبي.. مصر حتفضل مصر.. والشرعية حتفضل شرعية.. ومطّلعوهاش فدماغي لأعيّن نفسي رئيس الهيئة الشرعية.. حاكم أنا قديم أوي واعملها.. واللي خلاني القائد الأعلى للقوات المسلحة والقائد الأعلى للشرطة يخليني أبقى شيخ الأزهر لو حبيت كمان.. مانا اللي كنت بعيّنه ولا نسيتوا!

شعب نمرود.. ميعجبوش العجب ولا الصيام في الـ..بتاع ده!