مذكّرات مرشّح فلولي - نحن أصحاب الكِرش الكبير

بعاااااء!

صحّة حبيبي!

معلش أصلي لسة دابِب فخدة ضاني وفتّة لحمة محمّرة على مزاجكم..

أححححح.. الواحد عايزله كبّاية شاي تعدل دماغه..

حبعَت الولا بِشلة يجيبلي شاي من قهوة سكسكة على أول الشارع..

والله الولا بشلة ده بيخدّم عليّ فـ كل حاجة..

هو صحيح بقى يزود الأُبيّج حبتين.. بس الأمانة بعرف أجيبهم وأجيب أضعافهم بعد كدة..

إنما ميزته إنه يسدّ معاك في أي حاجة..

وقت ما تقول له بسّك على أيّ حد يلمّلك الألاضيش بتوعه من كل خُرم في الحارة اللي ساكن فيها ويعمل معايا أححححلى واجب!

مطاوي في اجناب الناخبين تلاقي.. ترويع مظاهرات تلاقي.. زقل طوب وقت المحاكمات تلاقي..

مقلّش معايا ولا مرة للأمانة..

هو بس مادّي حبّتين.. بس حيجيبوا منين يعني مالواد لخاله..

وبرضه أما يحفّ مني أجدع ما يحفّ م الغريب..

حاكم الانتخابات دلوقتي بتلمّ ياما..

دي حاجة بقت تقرف!

الواحد قبل كده كان ينزل الانتخابات لوحده تقريباًَ..

ولا إخوان بقى ولا قرف من ده!!

حاكم الإخوان كانت المباحث تلمّهم منهم فيهم وخلاص..

مكنشي فيه غير العالم الأرزقيّة اللي عايزة تكسب عشان تخشّ الوطني تاني..

أما بقى دلوقتي مبقاش فيه وطني..

بس مش حنغلب..

ده لو لغوا مجلس الشعب نفسه حنخشّه برضه..

ولا يمكن نحجز لنا كراسي في مجلس الوزرا..

مش بعيدة متقاطعوش..

يلا فتّكوا بعافية.. الولا بشلة جِه ومعاه الشاي أهُه..

أما ألحق أرسّيه يهبّب إيه آخر الشهر..

سلامات يا مواتنين..