بتوجع برضه أنا عارف
بصراحة أنا ساعات بحس إن المجلس والحكومة بيتفنّنــوا يفقعوا ع النــاس..
والغريبة إنه بيفقع على أهله وناسه.. اللي بيصدّقـــوه.
فيه ناس مصدقتش موضوع التمويل والهجايص دي وعارفة كويس من الأول إن المجلس حيكِس حيكِس مالهاش حل.. وفيه ناس تانية.. للأسف هم غلابة الشعب المصري تفاعلوا جداً مع المجلس وحسـوا إنه بقى بقينا رجالة بقى وحنقول لأمريكا لأ في وشها وإننا عندنا قضاء محترم مستقل، لأسباب ما ما صدّقوا يلاقوا حاجة زي كده يفرحوا بها على الرغم إنه اللي متابع تاريخ مبارك وحاشيته - بمعنى اللي عايش في مصر بقاله ثلاثين سنة يعني - يعرف كويس أوي إن ده نظام يستحيل يقول لأمريكا لأ ولا يستجري يبلطج على مواطن أمريكي يصول ويجول في هذه البلاد.
المشكلة في اللي صدّقوا يا عيني.. حقيقي إحساس صعب إنك تتنفخ مرة واحدة تفتكر إننا بقينا حاجة وإن النظام ده ممكن يبقى فيه الرّمق واحتمال يطلع راجل وميدّخلش في شغل القضــاء، ومرة واحدة وعلى حين غرّة يلاقي إنه "الكسكسة" لازالت زي ما هيّ وأسخم!
رأيي مكنش لازم المجلس يدخّــل نفسه في الورطة دي، كان يسيب مواجهة زي كده للي ممكن يبقى راجل وقتها.. لما تكون البلد أساسا تقدر تعتمد على نفسها..
مش يكون تسليحك أمريكي، وأمريكا بتديك معونة مشروطة كل سنة، وانت بتخدم مصالح أمريكا في المنطقة عشان ملكش انت تعمل غير كده، ومرة واحدة تعمل راجل عليها وانت لسة بتتلقى دعمهم ومتمرمغ في مساندتهم ليك - كنظام طبعاً - وعارف كويس أوي إنك كام يوم وحتكِس.. ده مالوش تفسير غير:
- إنك بتهفلَط!
- إنك فعلا بتستحقر الشعب المصري الغلبان لأقصى درجة.
- إنك بتعامل الشعب والمؤسسات اللي في البلد على إنهم لِعَب.
- إنه مفيش كرامة.
وبعدين جاي تقول: ولكن لازالت المحاكمات مستمرة!
لا تصدق فعلا راجل!!
ياخي حاكم نفسَك الأوّل..
ليست هناك تعليقات:
إرسال تعليق