حيدرة يُبَعبِع - 2

أنا مع الاعتصام السلمي - مفتوح ولا مقفول - لتحقيق المطالب.. خاصّةً إن المطالب مش بتتحقّق غير بكده!!

أنا ضدّ أيّ عمليّة تخريبيّة ولو كان الهدف منها نيل الحقوق، عشان في الأول وفي الآخر إحنا مش بنحارب كيان الاحتلال.. والتخريب ده عقاب للشعب مش عقاب للمجلس العسكريّ.

لو الاعتصام كده كده حيؤدّي للعمليات التخريبيّة.. يبقى أنا ضدّ الاعتصام لغاية أما نبقى شعب مسئول يعرف الصّحّ من الغلط.

لا يمكن أشارك في اعتصام الناس فيه بتطّجّن على عمليات تخريب، أو وقف حال للغلابة.

مجمّع التحرير مش بتاع الثّوّار.. ده بتاع شعب مصر كلّه.. مش يقفلوه ويفتحوه على مزاجهم..

أنا أهاجم وأنتقد المجلس العسكريّ براحتي.. ومحدّش له عندي حاجة.. المجلس العسكري حاجة.. والجيش المصري حاجة تانية.. طالما ارتضى المجلس العسكريّ تحمّل أمانة البلاد في الفترة الانتقاليّة اللي احنا فيها دي يبقى عليه تقبّل النّقد ولو كان شديد..

أنا ضدّ النقّد بالشّتمية.. عشان ده مش نقد.. دي قلة أدب.. وماهواش حميّة على مصلحة البلد مثلاً.. بل هي زياطة..

أنا على استعداد إني أرزّع للمجلس العسكري بكل السُّبُل إلا الشّتيمة.. وإلا حقّه يقاضيني.. زي ما أنا مرضاش حدّ يشتمني لو مخالفني في الرأي..

بس كده!