بخصوص موضوع غلق المحلات فأنا لي تعليق ربما ملهوش علاقة بفكرة الغلق من عدمه،
- في البداية يلوّحون بالقانون، ثم ينذرون بتطبيقه، ثم بَعْتة.. ودي نفس السياسة اللي كانت شغالة قبل كده في كل القوانين اللي عليها جدال في الشارع.. بدايًة لما طُرح الموضوع للنقاش لم يُطرح في الحقيقة للنقاش، وإنما طُرح إنه قرار طلع وحيتم العمل به من بعد العيد، ليتضح إن لم تتم استشارة اللي حيتمَسّوا مباشرًة من الموضوع ده، ومقالولناش صراحًة ليه الموضوع ده حيطبّق وفي التوقيت ده بالذات، وكأنه حَبَكت يتعمل قبل ما مجلس الشعب يُنتخَب ويناقش هو القانون بنفسه وياخد صبغة محترمة شويّة.
- صحيح هم متراجعوش عن تطبيق الفكرة بالكامل، قالوا حننتظر لحين إصدار اللائحة التنفيذيّة للقرار، أنا مش فاهم وهو كان إزاي حيتطبّق القرار من غير لائحة تنفيذيّة.. طَب المخالف كان حيتعاقب إزاي؟ فلوس؟ كام؟ سجن مثلًا، ولا حيتشمّعْلُه المحل.. طب اللي يقفل عشرة مساًء، أصلًا حيفتح الساعة كام؟
كل ده كان حيتنفذ على أساس إيه، ولا التعامل برضُه كان حيبقى بأسلوب أمنى واقفل يلا المحل يلا، ولا شغل إتاوات بقى وكده؟
قوم تيجي الحكومة معلش يا حدوئة، حنأجل تنفيذ القرار لحد ما نشوف إيه هو القرار أصلًا..!
- بالإضافة بقى إن الموضوع مش حيمشي عافية، انت المرور عندك متنيّل أساسًا حتكَرْبِس الناس دي كلها في فترة معيّنة عشان يقضّوا اللي عايزينه من المحلات دي حتفرم الدنيا في بعض.. كمان في رأيي إمكانية تطبيق القرار في الحقيقة صعبة جدًا، على رأي اللي قال: حتطبق قرار زي ده -دلوقتي- على ناس لسة فايقة من حظر تجوّل كانت بتنزل تتفرّج عليه في الشوارع.. الموضوع ماشي سلْق بيض أوي وقرار زي ده مش شايف إنه ينفع يتسلق بالطريقة دي خاصًة إنه مفيش أي داعي للاستعجال..
آمل بس مزيد من الشفافيّة وتشركوا الناس معاكو، مجلس الشعب منحَل، اشركوا بيوت الحكمة والبحث المتخصصة في الكلام ده واشركونا - بعد إذنكم يعني - في اللي ناويين تعملوه فينا..
ليست هناك تعليقات:
إرسال تعليق