الفارق بين مرشحيْ الرئاسة..

الفارق بين مرشحيْ الرئاسة في أمريكا دي بالنسبة للسياسة الخارجية اللي تهمّنا تملّي بيبقى إنه واحد حرّاق أوي في تطبيق السيطرة على مقدّرات الدول الأخرى والتاني بيبقى شغال ع الهادي..

زي ما تقول كده همّا خرّارتين: واحدة بالكهربا، والتانية بالفحم.. واحد زي بوش ده كانت خرّارته كهربا.. سريع في نهب الدول التانية ونفخ العالم ودخّل جيوش ونفخ الدنيا، أما أوباما وكلينتون تحسُهُم شغالين بتكنولوجيا الفحم كده، عالهادي يعني.. واحدة واحدة.. وفي النهاية برضو السياسات الخارجية بتطبق والسيطرة على مقدرات الدول بتحصل، والحقيقة لومهم على الموضوع ده عبث الصراحة، متقدرش تلوم التنين إنه بيطلع نار.. هو كده، لازم يطلع نار.. حتعمل له إيه يعني.. إنما تلوم الأنعور اللي عامل فيها دَكَر وهو جعجاع ع الفاضي.. أما يبقى لينا وزن فـ أي شئ في العالم نبقى نلاقي حاجة نتمنظر بها إنما كده هُزُء أوي الصراحة!