بالنسبة لي، جزء كبير جدًا من مأساة الإنسان المُتمدِن - وبالأخص اللي عايش في القاهرة - سببه هو تلك الكتل الخرسانية اللي مرمية بشكل عشوائي في أحياء بتتوصف إنها أحياء راقية. أي مهندس معماري أو مخطط شرع في الجريمة دي؟! لما يبقى المهمة بتاعته إنه يبني عماير كتل خرسانة لاصقة في بعض وإزاي أحشي العمارات دي شقق بأكبر قدر ممكن، وأخللي عندي أكبر قدر من العمارات في مساحة الأرض الواحدة عشان أبيع شقق أكتر، ويدفع بعد كده سكان الشقق دي الثمن في عيشة تجيب الضغط والتوتر - ما تقولش يستاهلوا عشان اختاروا، ما هم مكانوش فاهمين.. وبعدين مين اللي لاقي حتة تلمُه في الزمن ده؟! - أنا بشوف إن الحكومة اللي تسيب الحبل على الغارب للمستثمرين أو للمصممين إنهم يعملوا جرائم هندسية تمس الإنسان بالشكل ده تبقى حكومة مستهترة ومتهاونة في حق شعبها. أما يبقى إنك تلاقي مساحة خضراء إعجاز ما بعده إعجاز في أحياء مفترض إنها أحياء مُراعى فيها الجانب الجمالي والصحي، ما بالك بالأحياء اللي بتتوصف إنها أحياء شعبية دول يعلموا في نفسهم إيه؟!. عيشة الإنسان دي شئ مهم، مش عارف واللهِ المفروض نقولها إزاي؟ أما بتكون بتتكلم في بديهيات كده بيبقى الموضوع صعب، أصلك هتفهمهم إزاي إن: المفروض تكون عايش في مكان هادئ يساعد أعصابك إنها تكون في وضع صحي مش متوتر علطول، وميكونش فيه دخان، ويكون المساحات الخضراء فيه شئ أساسي، وما ينفعش القهاوي البلدي تبقى موجودة تحت العماير، فيه عيال صغيرة بتعدي مينفعش تشم رائحة دخان الشيشة وتسمع القبضايات الرجالة وهم بيشتموا اللعيبة في الماتش، ده فضلا عن إن ما ينفعش يبقى في إشغال للمساحة الفاضية اللي قدام العمارة عشان السادة رواد القهوة يبرطعوا فيها والسكان يمشوا من وسطهم. إنما تعرف، المشكلة إن الموضوع انتكس ع الآخر، لأن القهوة دي أساسا بتتملي من سكان العمارات، عايز أقول لك إن حبهم للمكان ممكن يكون جزء كبير منه إن مكنش كله بسبب القهوة البلدي اللي تحت بيته. يا سيدي أنا مش بقول لك ما تقعدش على قهوة بلدي ومش عايز تشيش ما تشيِّش ولا تتنيِّل بس بعيد عني، عايز كيفك اتكيِّف بعيد! إنما أنا ذنبي إيه يطلع لي دخان الحجر بتاعك أشمه في البلكونة بدل ما أشم الهوا زي خلق ربنا. طبعًا ولا حيّ ولا قسم ولا أجدعها تخين في المحافظة ياخد باله، ما القهوة مخالفة أساسًا، بس صححت أوضاعها - مع اللي صححوا يعني هي جت عليها - مع الحي وقام معلق بانَر بطول القهوة: قهوة مش عارف مين، وقام فاتح مطعم الناحية التانية من العمارة رستوران مش عارف مين، غالبا مشويات هَوْ هَوْ بمذاق عالي ودِهنة بتنِزْ! الرحمة حلوة يا خوانا!!
ليست هناك تعليقات:
إرسال تعليق