بخصوص ما يجري حابب أتكلم عن قضية هامة، الحقيقة هي بقالها فترة طويلة وكنت حابب أعلق ساعتها ولكن مش عارف إيه اللي عطَّلني ساعتها.. المهم إبريل اللي فات تُوُفي مخرج اسمه Gene Deitch وهو مخرج حلقات كارتون. لحد هنا تمام و RIP وبتاع إلا إنه اللي إستوقفني وأدهشني واذبهلِّني إنه انتشرت صورة وكأن توم وجيري حزانى على فراق الراجل وأنه توم وجيري من أجمل إبداعاته. لا معلش أنا آسف. أمال نودي فين جمايل Joseph Barbara و William Hanna يعني؟! ليه بجد نتعدى على تاريخ الأفاضل دول اللي رسومات توم وجيري اتمرمطت من بعدهم إذا كان على إيد Chuck Jones ولا Gene Deitch أنا آسف يعني!! توم وجيري يعني نلاقي في آخر تتر البداية اسمين الكبارات دول ووراهم اسم Fred Quimby ونعي تمامًا وندرك كل الإدراك إنه من بعد الحقبة دي بدأ العك..
وبعدين يعني ما Deitch له حاجات جميلة في Popeye وعرفت إنه كان في شخصيات كارتون تانية من إبداعاته الخاصة حبكت يعني نربطه بتوم وجيري اللي بوظُه أساسًا. ده قلب الحلقات سيكوباتية جدًا لو تفتكر معايا عزيزي القارئ حلقة الفضاء دي.. حاجة سواد يعني بعيدة كل البعد عن روح توم وجيري الأصلية بتاعة الأربعينيات الحلوة دي.
فشوية تقدير لو سمحتم وبلاش شغل التلفيق ده.. العبث في التاريخ مش هيوصل لكم لحاجة!
* الصورة من توم وجيري عصر Deitch وأعتقد بتتكلم عن نفسها مش محتاجة يعني *
ليست هناك تعليقات:
إرسال تعليق