دلوقتي إلحاقا بمنشور توم وجيري اللي كنت كتبته من يومين، في قضية هامة جدًا حابب في الوقت ده أرجعها لساحة النقاش من جديد. دلوقتي أنا عايز أسأل سؤال. اسأل سؤال..إزاي تم تصوير قضية الصراع بين توم وجيري إنهم اتنين بيشاكسوا بعض وإن جيري في الآخر - غالبا - بينتصر عشان هو أذكى رغم ضعفه وكلنا نـ هه وخلاص.. السؤال الحقيقي هو إزاي كنا بنقبل على نفسنا نشوف الحلقة بتخلص وتوم طلعان أيمانه إذا كان الست رمياه برة البيت ولا الكلب سبايك حاطه في الغسالة وجيري قاعد بيضحك وتقفل الحلقة على كده وعادي! يعني توم هو القط الـ Pet الرسمي في البيت لأن صحاب البيت هم اللي جايبينه وبيوكلوه ويشربوه وعاملين له السرير بتاعه إذا كان الست السمرا أو الراجل والست البيض اللي سبقوها في الحلقات، بينما جيري دخيل حافر له حفرة في الحيطة وقاعد فيها في الخباثة وكل شوية يطلع "يسرق" حتة جبنة من المطبخ، ولما توم الغلبان يطلع يجري وراه يجيبه من قفاه عشان يعاقبه وجيري يكيد له المكائد الواحدة ورا التانية ويلبسه مع أصحاب البيت ولا مع سپايك وتنتهي الحلقة بانتصاره نقبل ده عادي يعني! بص أنا معاك إنه لو كانت الحلقات بتنتهي إن توم هو اللي بيكسب مع اعتبار إنه الطرف الأقوى جسديًا كانت هتبقى قفيلة شوية اللي هو فين التويست.. بس اللي يغيظ هنا إن جيري بيتصور في النهاية إنه بطل وإنه استحق المكتسبات اللي وصل لها فقط لكونه ضعيف بس أذكى. لا يا حبيبي! لأ! مش عشان الولا دمه خفيف ويلطش وذكي وصغنن يضيع حق الغلبان صاحب البيت ويهينه بالشكل ده وإحنا نبارك ده كمان ونفرح بيه!!
لا ده كمان اللي يغيظ أكتر وأكتر أما يجيب لك إن توم كان محتاج يتعلم إنه يتقبل الغير ويحتوي المخالف وإنه الحياة بقت ألطف كتير أما بقى هو وجيري أصحاب.. تحت أي أساس ياخوانا يعني؟! الراجل لا به ولا عليه قاعد في بيته هوب نطّ له واحد شوارعي بيشفط اللبن بتاعه ويقوِّم عليه أصحاب البيت يطردوه ويلبسه مع الكلب سپايك وفي الآخر توم عليه إنه يحتوي جيري ويتقبل وجوده ويعمل معاه اتفاقية سلام وينصص معاه أكله ويدافع عنه ضد الغريب! ياخوانا شوية موضوعية وإنصاف أرجوكم!
كل الدعم والتعاطف مع القط توم ضد مؤامرات جيري اللقيط الشمحطجي ده اللي ملقاش حد يربيه مع كامل احترامي يعني.
ليست هناك تعليقات:
إرسال تعليق