حكوّمه - بفتح الحاء والكاف وكسر الواو وضم الميم

كان في مرة
شارع في مصر الجديدة
اسمه فريد سميكة
ساكن فيه نجم
من نجوم الجيش
ربنا يخليلنا الجيش
ويبارك فيه
وكان رتبة كبيرة
بس مش كبيرة خالص
مرة واحدة
هوب سكالوب
الجنينية اللي قصاده
اتسوّرت
والشارع اللي قصاده
سفلتوه
لحد بيته بس
بس
بس
قالك إيه
النجم اترقّى
وبقى نجم ساطع
طب ياخوانّا يجيش مسئول
يسكن في الحارة
عشان ما يبقى
شارعها متسفلت
ولها جنينة
والمية توصل
والغاز يوصل
والكهربا توصل
ويا ريت المية
لما توصل
توصل خفيفة
من غير تيفود
وتكون للشرب
متكونش صرف
ويا سلام لو الكهربا
لما تيجي
متتقطعش
ويا ريت الغاز
لما ييجي
متنقطعش أنابيبه
بيبو بيبو
ومتغلاش
على الناس الغلابة
دي مصر حلوة
وناسها حلوة
يا عم نظيف
ظيف ظيف
الله يسهللو
ربنا يباركلك
تتجوز على خير
بس ماكانش
فيه داعي
انك تحشرنا في جوازك الجديد
تتجوز ولا
تفضل عازب
إيش حشرنا
يا عم نظيف
ظيف ظيف
لما المتحدث
باسم الوزرا
يعلن جوازك
تبقى ملك
ولا ولي عهد
واحنا يابا
جمهورية
لسة يعني
ماهياش مملكة
ده لما النجم
النجم الكبير
راعي المنتخب
والكورة المصرية
حب يعملها
ما كانتش رسمي
أصل احنا مالنا
تتجوز ولا
تفضل عازب
يا عم نظيف
ظيف ظيف
وياسطى غالي
حلمك علينا
بضرايبك دية
بيع وقلنا ماشي
دخل ويالا ماشي
لكن عقارية لأ بقى
مش كده ياسطى
مش سبيل هو
نصرف عالحكومة
مش لما نلاقي
فلوسنا الأولانية
اتصرفت فين
وعايدها إيه
تبقى تطالبنا
بضرايب تانية
وإيه هو
واحد عايش
في فيللة أبوه
مالوش دخل
يكفي ضريبتك
ليه تجبره
يبيع الفيلا
عشان ماهوش عارف
يدفع جبايتك
هي عافية
ده مش دستوري
ولا إيه
يا عم غالي
مسترخصنا ليه
شايفنا خلاص
واخدين حقوقنا
لما حتفرض
ضرايب جديدة
هم كانوا
عينوك
وزير للشفط
ولا للحكومة حرامي
ولا عشان
تحسن عيشة
الغلابة
المصريين
مكنت تبني
من فلوسنا
بيوت عشان
غلابة الدويقة
بدل ما الصخر
يهشم جتتهم
ولا كنت
تحسن بيها
مية الشرب
ولا كنت
تضمن بيها
قوت للناس
قال بيقوللك
الحاج ظيف
احنا منديش
ميت جنيه
لواحد عشان ياكل
لا انا هديهالو
لو حيتاجر
بيهم في فاكهة
يا خي
لما ياكل
ويكفّي قوته
يدوبك يعني
بعدها يبقى
رجل أعمال
ويتاجرفي الفاكهة
لكنه مش
حيبقى عدمان
مش لاقي ياكل
ولا بيت يلمّه
ويفكّر بقى
في استثمارات
يا حكومة
خليكو حلوين
دي مصر ناسها طيبين