مدوّنة رئيس سابق - قال بيحاكمـــوني.. خـــونة

صحيح شعب نمرود..

بس هم فاكرين كده إنّهم بيحرقوا دمّي.. لكن للأسف نقبكم طلع على شونة..

وقلتها في المحكمة.. كل هذه التهم أنا أنكرها جميعاً..

خللي بقى عكاشة بتاع الطبّ النفسي يقول أصله قال "أنا" وده يدلّ على انتفاخ الذّات..

والله كانت قعدة لطيفة.. جديدة.. خلف القضبان ومعايا ولادي.. فيه أحسن من كده؟

والقاضي قاعد ساعة يعدّ في المدّعيين بالحقّ المدني.. يا راجل.. كبّر مخّك!

واللي جايّ يقوللي إني متّ من 2004 وإن أنا مش أنا.. حاسّه ماشي في سكّة إنه يجيب إعدام لأهالي الضحايا..

إلا ما جابوا العوا ولا عصام سلطان ولا حتى الواد بتاع البتاع ده..

ياخي إدّوا محاكمتي أهميّة طيب..

مش كده يعني..

دانا كنت ريّس عليكم بقالي 30 سنة..

وبعدين الشيزلونج مش تمام.. يعني استنضفوا مش جايبينلي كراسي بامبو أقعد عليها..

ومستخسرين فيّ الجناح الرئاسيّ اللي في المستشفى العالمي.. انتو نسيتو إن أنا اللي بانيها.. على طريق الإسماعيليّة..

اللذيذ بقى موضوع شهادة طنطاوي ده.. الحقيقة حاجة لوز العنب.. داحنا حنضحك ضوحك.. مش ضِـ.. ضوحك!

على العموم أنا مش ناوي أطوّل في المحاكمة الحقيقة..

كلها خمستاشر سنة بس أطلّع فيها ملايلكو وبعدين أرجع أقوللكم لم أكن أنتوي والجوّ ده..

يلا.. فتّكو بعافيو ولو إنكم شعب نمرود ميستحقّش.