مدوّنة رئيس سابق - في شأن الانتخابات

أعتقد بقى الأيام بتثبتلكم فرق أيامي من أيام غيري..

آدي الانتخابات جايّة أهه..

شوفوا الفرق ما بين دلوقتي وزمان..

دانا كنت مدلّعكوا زيادة عن اللزوم..

دلوقتي إشي إخوان، وإشي سلفيين، وإشي ليبراليين، وإشي أبسَر إيه!!

إيه ده كله..

مش كان أريح لكم هو حزب وطني.. وشوية مستقلين لما ينجحوا يبقوا حزب وطني برضه..

أنا كان قلبي عليكو مفرهدكوش..

حتى التصويت نفسه كنا بننوب عنكو فيه..

يبقى المواطن قاعد معزز مكرّم في بيته كده.. وصوته يروح الصندوق وهو قاعد مجعوص في البيت لا به ولا عليه.

يعني كان عاجبكوا نقرة الشمس بتاعة الاستفتا دي..

انتو فكركوا إن البلد كده اتغيرت!

خلاص جامدين أوي انتو بقى كده..

شايفنّي بريالة أصلكو..

هو اللي يخرب الحياة السياسية على مدار ثلاثين سنة وقبلهم بتاع تلاتين سنة كمان حيسيبلكو معارضة عليها القيمة تترشح في الانتخابات..

دلوقتي جمعيات أحزاب المعارضة عاملة رجالة وداخلة بقلب جامد في الانتخابات..

وعاملين تحالفات وبتاع!

مش مصدقني برضه.. ياخوانا انتو شعب نمرود مش عايزين غير واحد شامخ كده - زيي - يحكمكوا بحكمته ورزانته..

إنما مجلس شعب إيه وبتاع إيه بس..

مبلاش اشتغالات بقى..

وحزب الوفد عامل فيها حزب دلوقتي..

الله يرحم أيامك يا نعمان يا جمعة لما نزلت قصادي في الانتخابات..

يا بتاع الشعلة معايا يا شعب.. يا ترى لحقتوا شعلة نعمان جمعة ولا اتطفت منكو زي العادة..

هَه؟

والسيد البدوي اللي كان داخل آخر انتخابات مجلس شعب عادي وعايش فيها الدور ولا كأنه مش وادخ باله.. وإحنا مطرمخين على كله وهو أول واحد عارف.

أنا مش عارف هي الناس دي عايزة إيه؟

فلوس ومعاهم.. أمن وأمان ومحدش بيئذيهم.. ميسيبوا الحكم للي يستاهله بقى.. هو وجع دماغ وخلاص!

وقوام كده وافقتوا ع الحزب بتاع أبو العلا ماضي.. دانا كنت مدوخه في المحاكم هو والحزب بتاعه ده بتاع خماشر سنة منولتوش فيها يكون حزب.. تيجوا انتوا كده بسهولة توافقوله ع الحزب!

الإخوان كمان يبقى لهم حزب.. منكو لله خربتوا البلد!

دانا كنت نافخهم في السجون واحد واحد.. تيجو انتو توافقولهم ع الحزب عادي كده كإنهم بني آدمين طبيعيين..

وفـ وقت الانتخابات كنت بعتقل كوادرهم عشان أضمن مية المية إنهم مينجحوش.. دول كانوا بسبع أرواح ميحوقش معاهم تزوير والكلام إياه ده.. دانا لازم أحلق عليهم من كل حتة.. أمال إيه؟.. انتو فاكرين حكم مصر ده حاجة سهلة.. ده دوخة أسخم من دوخة التعلب بتاع البتاع ده!

إيه...

عامّة أنا معتمد على أولادي الكام حزب اللي قاموا دول ياخدوا أغلبية ويرشحوني للرئاسة تاني.. ممكن أمسك رئيس وزرا مش لازم رئيس جمهورية.. حاكم رئيس الجمهورية الجاي واضح إنه مش حيبقى له لازمة.. ولا أقولكم.. أنا حضبط أنا يمكن أمسك المجلس العسكري ولا حاجة..