سي في؟!

نعم.. أحمد شفيق له "سي في" قويّ جدًا.. الراجل كان مدير عمليات القوات الجويّة وقائد القوات الجوية وبعدين بقى جامد فحسني مبارك مسّكه مصر للطيران وبعدين ماشاء الله عليه وعلى حواليه قام ممسّكُه وزارة الطيران.. وحاز على أوْسمة بقى ونياشين ياما.. والصراحة.. الصراحة يعني.. مفيش حد من المرشحين "الثوريين".. هَه.. حاز على هذه الأوسمة من النظام السابق، ولا عمرهم تولّوا مناصب قياديّة.. في النظام السابق.. فمنين بقى.. هَه.. إيش جاب لجاب عدم اللامؤخذة؟

أيوة ما هو المرشحين "الثوريين" دول.. كانوا معارضين للنظام السابق الحقيقة.. فأساسًا مكنش ليهم إنهم يتولوا أي مناصب تنفيذيّة.. واللي ربنا كرمه منهم وتولى مناصب قياديّة كانت مناصب مش تحت مسئولية النظام السابق.. ففعلا.. مش حيبقى معاهم "السي في".. أوسمة ونياشين يعني والكلام ده.. لكن معاهم تغيير.. ورؤية.. والحقيقة إحنا اتعمينا من الناس دي بقالنا 30 سنة وأكتر.. واتهرينا من الخبرات والكفاءات المباركيّة لما مبقيناش عارفين لا نزرع ولا لمؤخذة نقلع ولا صناعة ولا جيش قوي ولا سياسة خارجيّة تخلّيلنا قيمة أساسا..

خلاصة القول.. ماحْناش عايزين رئيس عنده خبرة سياسية.. لو خبرته السياسية دي مع النظام السابق اللي طفّح الشعب المصري.. واللي "مُفترض" قامت عليه ثورة..

فلو انت عايز تنتخب شفيق ولا عمرو موسى.. مفيش مشاكل.. انتخبه.. طالما لعبناها انتخابات محدّش يقدر يمنعك من كده.. لكن ده يبقى معناه إنك مش شايف إن مصر كانت تستحق أكتر من اللي كانت عايشاه أيام حسني مبارك.