الرئيس الهوشي

المُنعش واللذيذ في القرارات الدستوريّة الأخيرة إنها بتقوللك:

"والله لو لم توافقوا على الدستور القادم، فأنا مضطر أحكم بصلاحياتي الكاسحة دي لحد ما تتفقولكم على دستور، فأنا شايف إنكم ترضوا بقليلكم، وتوافقوا على الدستور اللي جَيّ ده زي ما هو كده وإلا يبقى انتو بقى اللي اخترتوا والإرادة الشعبية الفحيتة اللي جرّت البلاد لحكمي المستنير".

والمُنعش كذلك، أن التعديلات جاءت في منتهى "الدكْرَرة" على النائب

العام وحصّنت التأسيسيّة وحصّنت قرارات الرئيس، وفكّت نفسها تمامًا من إعادة الهيْكلة الحقيقيّة للداخلية، فيما يبدو إن مُرسي بيتصنع من جديد.. وتصالحه مع الشُرطة والجيش (ميزانية رقم واحد تتحطّ زي ما هي في ميزانية الدولة ولا نقاش ولا كلام) خلاه يصدّر كل الصراعات كأنها مع النائب العام.. صحيح محدّش طايق النائب العام (عبد المجيد محمود) بس الحقيقة حصر المشكلة معاه هو كأنه هو اللي مفسّد البلد (لوحده) وهو اللي مبوّظ الأدلة شئ أفعواني الصراحة..

------

الحقيقة، تزعُّم شوية الهلاهيل اللي اسمها قوى سياسيّة الاعتراض على قرارات مُرسي يفقدني الشهيّة للاعتراض عليها فقط لئلا أدعمهم، عشان كل العالم دي بتاعة مصالح نفعيّة مش أكتر، وقبل كده رضوا بانقضاض المجلس العسكري على الشرعيّة اللي ساهم فيها أكثر من 30 مليون مصري وحَل مجلس الشعب وراح بالدبّابات قفل مجلس الشعب ولا كأنه نازل عركة!

اللي نازلين مشبّكين إيديهم في الميدان دلوقتي، هي فورتينة واحدة تفسخهم من

جديد، وهم اللي وصّلونا أساسًا للفقع اللي إحنا فيه ده وخيّرونا في انتخابات الإعادة ما بين اختيارين ما كناش نتمنّى أبدًا نفقع فيهما.. كله بتاع مصلحته، والحقيقة أنا لما باعترض على قرارات مُرسي مبعتبرش نفسي في صف القوى المخرْتأة السياسيّة دي.. حتى لو وصل الأمر أروح أعترض ع الإعلان الدستوري في ميدان الحجاز لوحدي مثلًا!