دلتا فورس!

هل تعلم أن قوات دلتا فورس الأمريكية التي قامت بالعملية العسكرية لخطف رئيس جمهورية فنزويلا بعد تعطيل أنظم الدفاعات وبعد عمليات استخباراتية سابقة وانبهر العالم بدقة العملية ونجاحها هي ذاتها قوات دلتا فورس التي فشلت في مشاركتها قوات استطلاع الاحتلال الإسرائيلي في عملية إنقاذ الأسرى بغزة وأُصيب منهم بضعة نفر في المعارك مع المقاومة؟

حيا الله المقاومة ألف مرة والله.

تطبيع اقتصادي دون تفاهمات سياسية!!

رئيس هيئة الاستعلامات يقول أن صفقة الغاز الأخيرة مع الاحتلال - والتي هي أكبر صفقة من نوعها في تاريخ الاحتلال - يقول أنها تجارية بحتة وفقا لآليات السوق وأنه لا مآلات سياسية لها (يعني أنها لا تعني توافق مصر والاحتلال سياسيا)

---

انا مش عارف امتى أصبح التطبيع الاقتصادي التام مع أي دولة لا يعني بالضرورة التوافق السياسي، وكأننا مش عايشين معاهم في نفس العالم وشوفنا البلاد بتعمل إيه أما يكون بينهم توترات سياسية. وعلى مدار التاريخ، مش بس مؤخرا.

هو نفسه الاحتلال اللي كل شوية عمدا يطلع مسئوليه يهددوا بالتهجير و"إضرار الأمن القومي المصري" هو نفسه اللي أنت بتعمل معاه صفقة غاز مشينة من حيث:

- دعم مالي كبير لكيان الاحتلال وتقوية لموقف الملعون نتنياهو في حكومته.

- اعتمادية على الاحتلال لتأمين مورد استراتيجي هام في مصر زي الغاز الطبيعي، إزاي تعتمد في حاجة زي دي على دولة انت بتطلع تقول رسميا إنك مش على وفاق معها

- إن ده غاز مسروق، الاحتلال غاصب أراضي العرب وسارق غازها وانت بتشتريه منه

أنا مُدرك والله إننا ضعاف، والله يجازي اللي كان السبب - بس بتفرس من التصريحات المضللة اللي حتى لا تحترم إننا عايشين والله معاكم في نفس العالم وشاهدين على اللي بيحصل من عقود.

الإنسان عدو نفسه، ومتورط فيما يجهل

طبعا معروف إن الإنسان عدو نفسه وده لو شواهد كتير في الحياة زي ماحنا عارفين ، لكن يا أخي بأقف متعجب ومستغرب ومندهش من خصلة محددة معرفتش دوافع لها سوى الزيطة فقط والدوافع دي لا تكافيء مآلاتها إطلاقا اللي ممكن توصل للحـرب من الله. 

وطبعا الموسم الحالي بتتجلى فيه هذه الخصلة - وهو مولد السيد البدوي، أنا هنا لا هتناقش في أصل الموضوع ولا ما يحوفه من بدع ولا منكرات مصاحبة، أنا اللي فارسني الشباب الشبح اللي في وسط استنكاره للي بيحصل يقوم متمسخر على السيد البدوي نفسه، أو طاعن في ولايته، عن جهل واضح. وهو كان يسعه يسكت، أو لو حارقاه كان ممكن يستنكر المفاسد اللي ممكن بتحصل في مثل المناسبات دي، إنما ازاي وازاي - لازم نخوض في علماء قضوا من مئات السنين.. لا انت ولا ابوك ولا جدك عاصرته، واللي قرأت عنه في كتب السنة تلاقي الناس تشهد لهم بالعلم والولاية. فتقرر تلبس نفسك في الحيط وتخوض في أعراض وتعادي أولياء وأنت وأنا وكلما غلابة. ما تسكت يا سيد؟! ما تتكن يا سيدي.. ما تنكر الظاهر الفاسد من اللي بيحصل لو مش قادر ما تسكتش دون التعرض لعقائد الناس ودون تناول سير علماء بالسوء فتروح أنت في ستين داهية.

إنما الدور والباقي على اللي بيعمل شير، واللي بيشجع واللي بيـهاها على المنشورات اللي زي دي ومستسهل تبعاتها.

شوية أسئلة..

وقعت مصر والسعودية وقطر على بيان أدانوا فيه بشكل صريح وواضح ورسمي لأول مرة ٧ أكتوبر (طوفان الأقصى) وكذلك طالبوا فيه حركة حماس بالتخلي عن سلاحها واعتبار منظمة التحرير هي ممثل فلسطين الوحيد، مفيش تعليق بس شوية أسئلة:

* هل لو كان منظمة "التحرير" بتقوم بدورها فعلا من عقود وكانت بتقاوم الاحتلال، كان هيبقى فيه مبرر لظهور حركات وفصائل أخرى لمقاومة الاحتلال؟ ولا ظهور الفصائل دي معناه إن منظمة التحرير فقدت دورها؟

* هل ببساطة متصور إن المقاومة تختفي لو قرر قادتها النزول لرغبات القوى العالمية دي؟ ولا طبيعي هتفضل موجودة ولو يشكل تاني ويمكن أشرس لأن سبب وجودها هيفضل موجود وهو وقوع الظلم على فلسطين ولأنها لا تزال تحت الاحتلال؟

* هل طبيعي بكل بساطة حل الموضوع إننا نعمل دولة فلسطينية تكون منزوعة السلاح ملهاش سيادة ولا أي قيمة؟ طب ده هيحل إيه؟ ده هيعمل إيه أساسا غير إن الاحتلال يشرعن احتلاله ويضم مزيد أراضي ليه - رسميا فضلا عن إنه موجود بالفعل في غالب فلسطين - ؟

* لما الدول العربية تقترح نزع سلاح المقاومة - آخر سلاح موجه صوب العدو وبشكل مباشر - إيه يا ترى تصورهم عن حل القضية الفلسطينية؟ هل هم متصورين إن دولة الاحتلال هتعمل مراجعات فكرية وترجع تنسحب لحدود ٦٧ وتسيب القدس عن طريق مفاوضات سياسية؟ هل يمكن تصور عدو بالسلوك اللي احنا شايفينه ده إنه يرتدع بأي حاجة غير القوة؟! إسرائيل اللي ضربت - بخلاف غزة - في الضفة الغربية واستولت على أراض جديدة، وضربت قصر الرئاسة ووزارة الدفاع السورية، وضربت في لبنان، وضربت قي إيران وضربت في اليمن ولا تزال بتقول هضرب وهعمل إسرائيل الكبرى وأشكل وجه الشرق الأوسط من جديد.. دي نوعية ممكن ترجع بالمفاوضات وما يصحش كده؟!

* هل يمكن تحت أي حال من الأحوال تفضيل مجاورة عدوك السابق والحالي واللي بيلقح كل شوية بطمعه في الأراضي بتاعتك عن طريق متطرفي حكومته ومسئولي المستوطنات على الجار العربي اللي بتربطك به علاقات نسب وعوايل واحدة فضلا عن إنهم عرب زيك؟!

الأمة مدينة لهم..

الأمة يجب أن تشكر المقاومة على طوفان الأقصى.

المغلوب على أمره اللي كان بيتفرج على نشرة الأخبار وشايف اعتداءات اليهود على الأقصى وبدء تنفيذ مخططهم لتهويد بيت المقدس بالكامل، هذا المغلوب ما ينفعش أبدا ييجي دلوقتي ويلوم المقاومة على الدمار اللي عمله الاحتلال في القطاع.

الأولى هو شكر المقاومة إنهم يقيمون الجهاد ضد المعتدي، ونفذوا فرض الكفاية اللي لولاه لأثمنا جميعا - ودي من رحمة ربنا إنه جعل في عصرنا هؤلاء القوم. والأولى هو الدعاء لهم ودعمهم قدر الاستطاعة لأن خلاف كده سقطنا جميعا.

والدعاء للمستضعفين أن ينصرهم بعز، ويرفع عنهم بلاء الحصار والجوع وفقدان الأحباب.

والدعاء لأنفسنا أن يغفر الله لنا ويعفو عنا، وإنا لله وإنا إليه راجعون.

من يفهم الاحتلال؟

داخلين في سنتين من معركة طوفان الأقصى فقط فهمنا إن أكتر حد فاهم الاحتلال وعارف يتعامل معاه وقاطع عليه هم المقاومة، خلاف كده إما عبده حناكة أو مطبع صهيوني أو مغلوب على أمره.

بودكاست الشتيمة

 البودكاستس الترفيهية بقالها فترة واخدة أهمية وانتشار كبير، وملاحظ أن أصبح عشان الفنان أو الرياضي أو أي شخصية مشهورة ينتشر ويسمع مع الناس ضروري يعمل بودكاست مع حد، ومبقاش فيه قيود على نوعية المحتوى، يعني عادي هتلاقي مذيع بالأساس مذيع رياضي عمل بودكاست مع فنانين وكوميديانات وبالفعل الحاجات دي بتجيب مشاهدات عالية وتجرّ بالنفع عليهم.

والبودكاستس مش حوار إعلامي وكده لكن كما هو معروف فهو حوار لكن بأريحية أكتر وكأنهم اصحاب وبيدردشوا وقاعدين براحتهم في البيت على كنب ومفيش التزام بلبس فورمال ولا حاجة، لا الناس ناقص تطلع بالبجامات عادي.

المشكلة إنه مع الأريحية دي، أحيانا كتير مستوى الحوار بيتدنى جدا لحد التلفظ بأقذر الألفاظ اللي مش المفروض تسمعها إلا في الشارع أو على القهوة - يعني سبّ صريح بالأم والأهل ورمي بالأعراض وتلفظ بأبشع الكلمات اللي مكنش متصور أبدا إنها تتقال في برامج كل الناس بتشوفها.

الموضوع مش متوقف بس عند فرد أو اتنين بيتكلموا بالطريقة دي، فخلاص هنقول دي تصرفات فردية وسهل نحذر من الأفراد دول وخلاص، لأ.. الفكرة إنه الأشخاص دول نفسهم بقوا يستضيفوا فنانين معروفين عند الناس ومحبوبين في بودكاستس، وأثناء الحوار بتحصل الشتيمة وقلة الأدب دي - آه طبعا بيتحط عليها تشويش، لكن أنت بتبقى عارف بالضبط إيه الشتيمة اللي اتقالت لأن جزء منها بيبقى مسموع وتقدر تعرف من السياق كمان - فأصبح الموضوع مستساغ عادي جدًا. وللأسف منهم اللي كان مشهور بالفعل ومحبوب عند الناس وبعدين بدأ يظهر في البودكاستس دي وهو نفسه بقى يشتم عادي وبيواكب الموجة دي.

أسوأ من ذلك إن بيكون فيه بنات ضمن فريق العمل صوتهم واضح وأحيانا بيشاركوا في الحوار مع الضيف، نفس الحوار اللي المستضيف ده قاعد بيشتم فيه وبكل أريحية.

أولا: تساهل عجيب جدا من الدولة اللي أوقات كتير بتحبس ناس بالفعل عشان تهم مثيلة (نشر الفاحشة وخلافه)، النماذج دي موجودة وبتشتغل عادي جدا ومحدش قرص ودانهم حتى عشان يبطلوا القرف ده.

ثانيا: سبب كتابة المنشور ده إن الموضوع منتشر على قنوات السوشيال ميديا العادية خالص، فعادي جدا بنتي أو ابني وهو بيقلب يتفرج يخبط في فيديو زي ده ويلاقي حجم التفاعل اللي عليه وحجم الشهرة اللي فيها الناس دي فينبهر وعلى الأقل هيتقبل قرف زي ده في المجتمع.. فاعتبروها توعية إننا ناخد بالنا على عيالنا واللي يعرف الشباب دول بشكل شخصي ينصحهم نصيحة صادقة إن الزخم الحالي ورا شهرته هيروح خصوصا إن غالبهم معندهمش مواهب حقيقية سوى إنهم بيشتموا بقذارة في هزارهم والشهرة دي هتروح لحالها والفلوس اللي من وراها هتخلص وهيفضل الذنب ده للأسف إلا أن يتوبوا.

وسيدنا النبي صلى الله عليه وسلم قال: "سباب المسلم فسوق..." وقال "ليس المؤمن بالطعان ولا اللعان ولا الفاحش ولا البذيء" وقال "إن اللعانين لا يكونوا شهداء ولا شفعاء يوم القيامة".

قرابين الولاء

في الكام أسبوع اللي فاتوا اتلعب بالوعي العربي بشكل عنيف، اتصدرت فكرة إن ترامب بدأ يهمل ناتانياهو وانتشرت أخبار إنه بدأ يلغيه من اهتماماته وإنه فاوض المقاومة مباشرة على إطلاق سراح الأسير الإمريكي الإخرائيلي دون الرجوع لها، وتصوير - إما بحسن نيه أو سوء نية - من البعض إن زيارته للخليج كانت فتحة طاقة النور لوقف إطلاق النار وإنه خلاص هيعلن إقامة دولة فلسطينية!

بينما حقيقة الأمر إن الزيارة كانت فقط إعلان تجديد الولاء للإمبراطور البرتقالي، وإن تم خداع المقاومة بصفقة الأسير على أن تكون حسن نية تجاه إدارة أمريكا القادرة على فرض وقف إطلاق النار، والحقيقة إنها كانت من ضمن القرابين اللي تم تقديمها للإمبراطور البرتقالي قبيل زيارته، واشتد الضرب والقصف من الاحتلال بشكل غير مسبوق نن بداية الحرب وبعد تمام زيارة ترامب يتم التجهيز لأكبر اقتحام بري للقطاع وورود الأخبار عن نوايا جادة وأفكار حاضرة للتهجير - وكل ذلك لا يمكن إلا بموافقة (أو أزّ) من سرطان الكوكب أميركا وإعلان الولاء للإمبراطور وتأكيد أهليته لأدارة الملف، فقط أرادوا تأمين أنفسهم وهو الحال من قبل وحسبنا الله ونعم الوكيل.

ويمكرون ويمكر الله، والله خير الماكرين.

اللهم لا تجعل لأعدائك سلطانا على المؤمنين وارحم عبادك المستضعفين واغفر لنا يا أرحم الراحمين.

صلى الله عليه وسلم..

صلى الله على من كان يصل الرحم، ويحمل الكَل، ويكسب المعدوم، ويقري الضيف، ويعين على نوائب الحق.

صلى الله على من تعاهد على ألا يجد بمكة مظلوما إلا وقام معه، صلى الله على من هَبّ لنُصرة رجل غريب حتى أخذ له حقه من سيد قريش وقتها..

صلى الله على من انتصر للغلام الضعيف الضعيف على سيده لما رأى منه ظلما، فقال له لما كان يضربه: "لله أقدر عليك منك عليه!"

صلى الله على من قال: انصر أخاك ظالما أو مظلوما، ولما سُئل كيف ننتصر له وهو ظالم قال: تمنعه من ظلمه فذلك نصره.

صلى الله على سيدنا ومولانا محمد وعلى آله وصحبه.

من سورة القمر..

وَلَقَدۡ يَسَّرۡنَا ٱلۡقُرۡءَانَ لِلذِّكۡرِ فَهَلۡ مِن مُّدَّكِرٖ (40) وَلَقَدۡ جَآءَ ءَالَ فِرۡعَوۡنَ ٱلنُّذُرُ (41) كَذَّبُواْ بِـَٔايَٰتِنَا كُلِّهَا فَأَخَذۡنَٰهُمۡ أَخۡذَ عَزِيزٖ مُّقۡتَدِرٍ (42) أَكُفَّارُكُمۡ خَيۡرٞ مِّنۡ أُوْلَٰٓئِكُمۡ أَمۡ لَكُم بَرَآءَةٞ فِي ٱلزُّبُرِ (43) أَمۡ يَقُولُونَ نَحۡنُ جَمِيعٞ مُّنتَصِرٞ (44) سَيُهۡزَمُ ٱلۡجَمۡعُ وَيُوَلُّونَ ٱلدُّبُرَ (45) بَلِ ٱلسَّاعَةُ مَوۡعِدُهُمۡ وَٱلسَّاعَةُ أَدۡهَىٰ وَأَمَرُّ (46)

سورة القمر

جوعى ومرضى على بعد كيلومترات

٨ أسابيع كاملة لم يدخل للقطاع مكون واحد من مكونات الطعام. القطاع بالكامل جوعـ.ـان.

٨ أسابيع كاملة لم يدخل للقطاع عنصر واحد للدواء، أو أي من مسلتزمات النظافة الضرورية للبشر.

٨ أسابيع كاملة منذ قرار كيان الاحتـ.ـلال بمنع دخول أي شيء للقطاع، بمباركة أقـ.ـذز امبراطوريات التاريخ وأدناها اخلاقا.

٨ أسابيع والقصـ.ـف هيستيري وأعنف مما سبق حتى شعر به سكان العريش ودمياط، الأمر الذي لم يحدث من بداية الحـ.ــرب.

ومع شدة ابتلاء أهالينا هناك ألِفنا ما يجري وتحول التايملاين مع الوقت لتناول أمور أقل ما يقال عليها أنها غارقة في التفاهة. ما يجري عظيم جدا جدا وانفصالنا الذهني عنه هو مصيبة أعظم، وإنا لله وإنا إليه راجعون.

الشرط الغبي

شرط نزع سـ.ـلاح المقـ.ـاومة للهدنة هو شرط فضلا عن كونه من جُملة التواطؤ عليها فهو شرط غبي أصلا، يعني الاحتلال سيترك القطاع آسفا على نفسه بعد أن ينزع شوكة مقـاومته أم الأوقع أنه سيُمعن في الإبـ.ـادة وخطط التهجير. الرادع - ولو على بدائيته - هو الضامن الوحيد لبقاء القضية حيّة، من دونه سيتحقق سيناريو الهنود الحمر المنتظر تحت مرأى ومسمع العالم كله، ونرى ما يجري حاليا ولا يحرك أحدٌ ساكنا اللهم إلا رجال اليمن. هل بعد ذلك إن رفضت الفصايل هذا المقترح يُقال عنها أنها تضحي بالشعب ولا تأبه لهم؟! أم الأوجب أن يقال أن هذا مقترح خيانة وتواطؤ مع العدو؟!

إذا بُلينا، نستتر..

ما ينفعش يا جماعة تبقى في وسط اللي بيحصل ده كله وبنحتفل بماتشات الكورة ونهلل ونزيط ونشارك ده على مواقع التواصل بمنتهى الانفصال المخزي عن الواقع، يعني أنا لا يمكن أنظّر على حد وأقول إني يومي كله جد وإن القضية مهيمنة عليه، لكن يا أخي اتفرج في أوضتك على الماتش وانبسط وازعل مع نفسك لكن اتكسف على دمك وما تجيبش سيرة ده على مواقع السوشال ميديا وما تعملش شير للأخبار التافهة للاعب الفلاني ولا فريقك الأوربي الجامد. 

الناس بتُباد وتتهجر على بعد أميال مننا وإحنا قليلين الحيلة وحالنا زي الزفت، الأمة كلها في ابتلاء عظيم، إحنا لازم ندرك إن اللي بيحصل ده ضروري يكون نوبة فوقان لنا على المستوى الشخصي، ما تخلعش من الموضوع عشان مش في إيدك القرارات.. 

صح مش في إيدك توقف الحرب بأسباب أرضية مباشرة لكن في إيدك تدعي، في إيدك تقاطع، في إيدك تتكلم، في إيدك ينصلح حالك، في إيدك تنتبه للمهم اللي من ضمنه إنك ما تنشرش الهبل بتاع ماتشات الكورة ولا خلافه من الهيافات في الوقت اللي فيه فوق الخمسين ألف قضوا لربهم وفوق المليونين متشردين وجعانين ومرضى وأنت مش عارف تمد لهم إيد تساعدهم أو توقف اللي بيحصل فيهم ده.

فأرجوكم إذا بُلينا، نستتر. وإنا لله وإنا إليه راجعون.

رفض التهجير

رفض التهجير يجب ألا يكون دافعه الوحيد هو الأمن القومي للدول المجاورة، وإلا فهو يستبطن الإقرار بالقتل والتجويع والحصار لإخواننا داخل فلسطين المحتلة. 

إن ما يجري حاليا هو الحدث الأشد ظلما فيما رأيناه على مدار عمرنا، لم نشهد مثيل لما يحصل من أعدائنا ولم نشهد تخاذل مثيل من دول الجوار العربية. 

لا ضغط حقيقي لوقف الحرب ولا ضغط لإدخال المساعدات ولا أي شكل من أشكال التهديد لمصالح الاحتلال لوقف ما يحدث، مما يؤكد التواطؤ والخيانة. 

كل أشكال الوساطة لوقف الحرب لا تتعدى اقتراحات الهدنة، لكن لا يوجد ضغط حقيقي من قبل دول الجوار بوقف التعاون الجاري مع الاحتلال أو سحب مشروعات التطبيع الاقتصادي وغيره، الأمر الذي رأيناه من دول غير المسلمين في أوربا مثل أيرلندا وأسبانيا، لم نتجرأ على فعل المثيل بل بالعكس، تشير التقارير إلى زيادة حجم التبادل التجاري مع الاحتلال. وإنا لله وإنا إليه راجعون.

ليه أمريكا مش بتعمل مع إسرائيل اللي بتعمله مع أوكرانيا؟

فيه فارق كبير بين نظرة امريكا لأوروبا وعلاقتها بروسيا وبين دور إسرائيل بالنسبة لها في الشرق الأوسط.

العلاقة بين أمريكا وروسيا ممكن تروح وتيجي وهتكون قايمة على تفاهمات موازين القوى، وأنهي وضع هيخلي لأمريكا سيطرة أكتر وأكتر على أوربا. يعني فيه مجال إن علاقة أمريكا مع روسيا تتحسن عشان موائمات سياسية. فوارد ييجي رئيس أمريكي يشوف إيه الفلوس دي كلها اللي صارفينها على أوكرانيا ويعيد حساباته تاني حتى لو على حساب توتر علاقته مع كامل قارة أوربا..

إنما الوضع في الشرق الأوسط يختلف تماما. إسرائيل بتشتغل عند أمريكا في الشرق الأوسط كيان مهدد للأمة الإسلامية عشان ما تقومش تاني. 

معرفش إذا كان ده أصل فكرة نشأة إسرائيل ولا إن أوربا قررت تصدير مشكلتها مع اليهود لنا ولا يمكن السببين مع بعض، لكن الحاصل حاليا إن إسرائيل هي بلطجي أمريكا في الشرق الأوسط الحريص على تدمير أي تهديد لمصالح أمريكا في الشرق الأوسط واللي ترجمته إجهاض أي محاولة لنهوض الأمة الإسلامية من جديد.

عشان كده أيمّا اختلفت الإدارات الأمريكية هيفضل دعمها لإسرائيل أمر مفروغ منه - بخلاف الوضع مع أوكرانيا -، وضمانها للتفوق العسكري الإسرائيلي في المنطقة مفيش فيه جدال ومن ضمن عقيدة السياسة الخارجية لأمريكا اللي ما بتتغيرش. الفارق حاليا إن الطحش البرتقالي ده غشيم فبيظهر وجه الاستعماري الأمريكي دون أي تجميل.

الجميل في الموضوع إن الطحش ده حرق كل الكلام المايص المنبطح لقوة أمريكا وأظهر عيانا بيانا إنه ما بيحترمش غير اللي بيناطحه وبياخد موقف قوي قصاده، وبالتالي مسألة الاكتفاء الذاتي وأن نكون أقوياء بنفسنا والخروج عن هيمنتهم رجع بقوة، ولعل ربنا يسبب الأسباب وتقوم لنا قومة حقيقية..